Aýa raıy
Astana -13 °S
Almaty 0 °S
valıýta baǵamy
USD 421.58
EUR 496.83
RUB 5.53
CNY 62.20

Ilıa Jaqanov: Qaýipti indetpen kúresip júrgen dárigerlerdiń qyzmeti aýyr ekenine kóz jetkizdik

2020 jyldyń 19 qazan 2020 01:52

ATYRAÝ. QazAqparat – Qazaqstan men Qyrǵyzstannyń eńbek sińirgen qaıratkeri, kompozıtor, óner zertteýshisi Іlııa Jaqanov jurtshylyqty koronavırýstan saqtanýǵa, mamandardyń qoıǵan talabyn oryndaýǵa shaqyrdy.

«Sońǵy kezde toı, sadaqa, týǵan kún sekildi otbasylyq sharalardy ótkizý toqtar emes. Al munyń zardaby qandaı bolady? «Eldiń amandyǵy úshin, jaqynyńnyń saýlyǵy úshin dárigerlerdiń aıtqan talabyn saqtaý qajet. Alaıda, qaýipti indettiń birinshi tolqynynda jubaıym ekeýmiz eshkimmen tym jaqyn aralaspaı, maska taǵyp, qolymyzǵa qolǵap kıip, azyq-túlik, dári-dármek alýǵa shyǵyp júrdik. Osylaı saqtanyp júrsek te, bir kúnde tamaqqa tábetimiz bolmady. Basymyz solqyldap aýyryp, jótele bastadyq. Jótelmen birge entikpe paıda boldy. Qyzýymyz kóterildi. Zilbatpan júk basyp turǵandaı, ornymyzdan tura almaı qaldyq. Sóıtip, amalsyzdan jedel járdemmen óte qıyn halde aq jeleńdi abzal jandardyń qaraýyna keldik. Olar bizdi ata-anamyzdaı mápeledi. Dárigerlerdiń dıagnozdy durys qoıýy, dári-dármegi men jyly sóziniń arqasynda ǵana betimiz beri qarady», - deıdi Іlııa Jaqanov.

- Ilıa aǵa, qaýipti indetpen kúresip júrgen dárigerlerdiń jumysyna kýá boldyńyz. Olardyń eńbegin qalaı baǵalar edińiz?

– Atyraýda qaýipti indetti juqtyrǵandar kóbeıgende, aldymen №2 oblystyq aýrýhananyń ujymyna zor jaýapkershilik júktelip, aýyr salmaq tústi. Oǵan ózim de kýá boldym. Aýrýhananyń bas dárigeri, orynbasarlary, barlyq dárigeri men medbıkesi, medjigiti, barsha qyzmetkeri kúreske bilek sybana jumyldy. Gıppokrat antyna adal aq halatty jandar biz sekildi júzdegen adamdy ajal aýzynan aman qaldy. Sol úshin aýrýhana ujymyna shyn júregimizden alǵysymyzdy aıtamyz.

Bylaıǵy ýaqytta aýrýhanadaǵy dárigerlerdiń jumysyn eleı bermeıdi ekenbiz ǵoı. Shyndyǵynda qaýipti indetpen kúresip júrgen ınfektsıonıst-dárigerlerdiń qyzmeti óte aýyr ekenine kóz jetkizdik. Jedel járdemdegi, aýrýhanadaǵy dárigerler, medbıkeler men tazalyqshylar indetten qorǵaný úshin qorǵanysh kıimin kıip, tumshalanyp júredi. Mundaı kıimmen birneshe saǵat boıyna jumys isteý ońaı emes. Soǵan qaramastan, olar naýqas jandardyń janynan tabylyp, ekpesin egip, sıstemasyn qoıyp, dárilerin der kezinde berip, aýzymyzǵa sýsyn tamyzyp, qamqor boldy. Olar derti janyna batqan naýqastarǵa qanatymen sý sepken qarlyǵashtaı tynym tappady. Bar meıirimi men jan jylýyn tókti. Juqpaly indettiń qaterli ekenin bile tura, qaýiptiń ortasynda júrdi. Sol sebepten, aq jeleńdi dárigerlerge qandaı qurmet kórsetilse de artyq etpeıdi.

– Dárigerdiń shıpaly emimen birge, jyly sózi de dem bergen shyǵar...

– Iá, óz isine jaýapkershilikpen qarap, naýqastardy jyly sózimen balasha mápelegen dárigerlerdiń arqasynda jaǵdaıymyz jaqsaryp, densaýlyǵymyz qalypqa tústi. Otbasymyzǵa aman oraldyq. Keıin dárigerlerdiń belgilegen emin úıden aldyq. Úıimizge ýchaskelik dárigerler kelip, qyzýymyzdy ólshep, kúndelikti nusqaýyn berdi. Biz sekildi myńdaǵan adamdy qaýipti indetten qutqaryp qalǵan №2 oblystyq aýrýhananyń bas dárigerine, orynbasarlary men ózge de dárigerlerine, orta býyn medıtsına qyzmetkerlerine, tazalyqshylarǵa, bárine rızashylyǵymyzdy bildiremiz. Bul aýrýhanada jumys jaqsy jolǵa qoıylǵanyna kýá boldyq.

Otbasyna barmaı, kúni-túni asa qaýipti vırýstyń oshaǵynda, naýqastardyń janynda bolý úshin júrek kerek. Keıde medıtsına qyzmetkerleriniń sonshama umtylǵanyna qaramastan, qaıtys bolǵan adamdardy kórgende júregimiz qars aıyryldy. Men aýrýhanada dárigerlerdiń adam ómirine arasha túsip, jantalasqan sátteriniń kýási boldym. Sondyqtan dárigerlerge basymdy ıemin! Bar jaqsylyqqa ıe bolsyn! Alla qoldasyn!

Dertimiz asqynyp, ómir men ólimniń ortasynda jatqan kezde kim jyly sózin aıtyp, janyńa kelse, sol adam umytylmaıdy eken. Sonyń biri – Atyraý oblysynyń ákimi Mahambet Dosmuhambetov. Birneshe ret aýrýhanaǵa kelip, aýyryp jatqan adamdarmen sóılesip, naýqastardyń jaǵdaıymen tanysqan ákimniń adamgershiligine tánti bolǵanymyz ras. Dári-dármektiń der kezinde jetkizilýin, aýrýhananyń syrqattarǵa kerekti apparattarmen qamtamasyz etilýin únemi qadaǵalap otyrdy. Qaýipti indet dendegen kezde buqara halyqpen jaqyn bolyp, basyna qıyndyq túsken jandarmen qaıǵyny bólise bilý – parasattylyq.

– Qaýipti indetke urynbaý úshin ne isteý kerek dep oılaısyz?

– Mundaı indettiń aldyn alýdyń basty sharasy – saqtaný. Alaıda, koronavırýs ınfektsııasy órship, jurttyń bári aýyryp jatqan qıyn kezdi esten shyǵaryp aldyq. Qazir bári topyrlap kóshede júr. Toı, sadaqa, týǵan kúndi jasyryn toılap jatyr. Dárigerler medıtsınalyq maska taǵyp júrýdi, kóp adam jınalǵan jerge barmaýdy, shekteý sharalaryn saqtaýdy tekten tekke aıtpaıdy ǵoı.

Qazaq «Saqtansań – saqtaıdy» degendi tegin aıtpaǵan. Osynyń bárine kózjumbaılyqpen qarap, burynǵy ádetpen alańsyz júrgender, toı, sadaqa, týǵan kún ótkizetinder jaqyndarynyń, jalpy aınalasyndaǵy adamdardyń saýlyǵyna qaýip tóndiretinin oılamaıtyn sekildi. Ásirese, 30-40 jastaǵy býynnyń ókilderi maskasyz júrip, shekteý sharalaryn eleń qylar emes.

Sondyqtan, barshaǵa aıtarym, karantındik shekteýlerdi, jeke bas gıgıenasyn saqtaǵanymyz jón. Denniń saýlyǵy, eldiń amandyǵy úshin dárigerler aıtqan talapqa baǵynaıyq. Toı, sadaqany ázirshe qoıa turaıyq. Ózimizdiń de, ózgeniń ómirine qaýip tóndirmeıik. Sonda ǵana halqymyz aman bolady, elimiz órkendeı beredi. Amandyqqa, tynyshtyqqa eshteńe jetpeıdi. Osyny este ustaýymyz kerek.


Avtor Bek Mustafa
Basty sózder: Atyraý oblysy, Koronavırýs,
Joǵary qaraı