Aýa raıy
Astana +7 °S
Almaty +14 °S
valıýta baǵamy
USD 421.58
EUR 496.83
RUB 5.53
CNY 62.20

Gúlshara Ábdiqalyqova: Óz densaýlyǵymyzǵa nemquraıly qaramaıyq, ózgege qaýip tóndirmeıik

2021 jyldyń 4 mamyr 2021 19:35

QYZYLORDA. QazAqparat - Qyzylorda oblysynyń ákimi Gúlshara Ábdiqalyqova aımaq turǵyndaryna vaktsınaǵa baılanysty úndeý jarııalady, dep habarlaıdy QazAqparat tilshisi.

Óz úndeýinde oblys ákimi elimizde halyqqa jappaı ekpe egý júrip jatqanyn atap ótken.

«Jalpy, vaktsına saldyrý densaýlyǵymyzǵa qorǵanysh ekenin eskersek deımin. Mamandardyń aıtýynsha, ekpeden keıin koronavırýsqa qarsy ımmýnıtet qalyptasady. Ekpeni alǵash alǵannan keıin ekinshi dozasyn belgili bir ýaqytta alý qajet. Sodan soń ǵana aǵzany qorǵaıtyn antıdeneniń jetkilikti dárejesi túziledi. «Vaktsına aldym» dep maskasyz júrýge bolmaıdy. Elimizdegi eresek adamdardyń 60 paıyzy vaktsına alyp, ujymdyq ımmýnıtet paıda bolǵanǵa deıin maska taǵyp júrýimiz kerek.

Vaktsınalaýǵa qarsy pikirdegi adamdar burynnan da bolǵan. Koronavırýsqa qarsy vaktsınaǵa ǵana emes, ondaı adamdar ekpeniń kez kelgen túrine qarsy pikirde. Biraq, qazirgi pandemııa jaǵdaıynan tek sol arqyly ǵana shyǵa alamyz. Máselen, álemniń aldyńǵy qatarly elderi atalǵan isti byltyrǵy jeltoqsan aıynda bastap ketti», - dedi oblys ákimi.

Aımaq basshysy úndeýinde qazir dúnıejúzinde 150 mıllıonnan astam adam vırýs juqtyrǵanyn, sonyń 3 mıllıonnan astamy dúnıeden ótkenine toqtaldy. Onyń aıtýynsha, koronavırýsty jeńýdiń jalǵyz amaly - vaktsınalaý. Álemdegi AQSh, Germanııa, Frantsııa, Japonııa memleketteri jappaı vaktsınalaýdy qolǵa aldy.

«Jappaı vaktsınalaý bizge ne beredi? Qazirgi tańda bas sanıtarlyq dárigerdiń qaýlysyna sáıkes óńirlerdegi uıymdar men keńselerde «qyzyl aımaqta» - qyzmetkerlerdiń 80, «sary» aımaqta - 50, «jasyl» aımaqta - 30% qashyqtan jumys isteýde. Eger qyzmetkerlerdiń 90%-y vaktsına alǵan bolsa, olar jumysqa tolyq jiberilip, tek 10%-y qashyqtan jumys isteıdi. Osyny eskerip, búgingi kúni bıýdjettik mekemeler qyzmetkerleri, atap aıtqanda, memlekettik qyzmetkerler, muǵalimder men dárigerler, quqyq qorǵaý organdary jappaı vaktsına alýda. Syr eliniń óner maıtalmandary, jyrshy-jyraýlary, jazýshy-aqyndary, aıtyskerleri, jýrnalıster qaýymy eldik isten qalys qalmasa deımiz. Endigi rette halyqpen tyǵyz qarym-qatynas jasaıtyn kásipkerler, bazarlardaǵy satýshylar, kafe, meıramhana, halyqqa turmystyq qyzmet kórsetý qyzmetkerleri vaktsına alýdyń kóptegen múmkindikterge jol ashatynyn túsinip jatsa jón bolar edi. Óz densaýlyǵymyzǵa nemquraıly qaramaıyq. Ózgeniń densaýlyǵyna qaýip tóndirmeıik. Qaýeset sózderge ermeıik. Sizderdi mamandardyń sózin tyńdap, mán berýge shaqyramyn», - dep atap ótti Gúlshara Ábdiqalyqova.

Esterińizge sala ketelik, óńirde ótken jyldan beri 5 794 adam qaterli vırýsty juqtyrdy. Qazir Qyzylorda oblysy «qyzyl» aımaqta tur.


Joǵary qaraı