Aýa raıy
Astana +7 °S
Almaty +14 °S
valıýta baǵamy
USD 421.58
EUR 496.83
RUB 5.53
CNY 62.20

Gúlshara Ábdiqalyqova qyzylordalyq isker áıelder ókilderimen kezdesti

2021 jyldyń 13 qazan 2021 22:16

QYZYLORDA. QazAqparat - Qyzylorda oblysynyń ákimi Gúlshara Ábdiqalyqova óńirdegi isker áıelder ókilderimen kezdesti. Júzdesýde aımaqty damytý baǵytynda keleli usynystar talqylandy, dep habarlaıdy QazAqparat tilshisi.

Búgin oblys ákimi Gúlshara Ábdiqalyqova óńirdegi isker áıelder qaýymymen kezdesti. Onda aımaqty damytý baǵytyndaǵy keleli usynystary jan-jaqty talqylandy.

Jıynǵa ártúrli salada jemisti eńbek etken eńbek ardagerleri, oblystyq salalyq basqarma basshylary, oblystyq, aýdandyq máslıhattyń depýtattary men isker áıelder qaýymy shaqyryldy.

Basqosý barysynda óńir basshysy el Táýelsizdiginiń 30 jyldyq belesinde halyqpen etene jaqyn aralasatyn ártúrli saladaǵy názik jandylardyń tabandy eńbegin joǵary baǵalap, óńirdi órkendetý baǵytyndaǵy alǵa qoıǵan maqsat-mindetterdi birge oryndaýǵa shaqyrdy.

«Bıyl - Táýelsizdigimizdiń 30 jyldyq mereıli jyly. Áıelderdi ekonomıkaǵa tartý protsesiniń keshendi máseleleri meniń turaqty baqylaýymda. Osy maqsatta men aýdandardy aralaý barysynda da, jeke qabyldaýlar aıasynda da olarmen kezdesýlerdi turaqty túrde ótkizemin. Bir jyldan astam ýaqyt ishinde 92 aýyldyq okrýgke bardym. Kásipker áıeldermen jeke kezdesip, olardyń jumystarymen tanystym. Árbir utymdy usynys qaraýsyz qalmaıdy», - dedi Gúlshara Ábdiqalyqova.

Kezdesýde oblystyń qurmetti azamaty, uzaq jyldar boıy basshylyq qyzmet atqarǵan Almagúl Bojanova isker áıelderdiń belsendiligin arttyrý, olardy qoǵamdyq isterge udaıy túrde tartý qajettigin aıtyp, ortaq másele kóterýde birlesken sheshimderdi qabyldaýǵa shaqyrdy. Sondaı-aq, áleýmettik máselelerdi kóterýde depýttatyq korpýstaǵy áıelderdiń usynystarynyń mańyzdy ekenin alǵa tartty. Kezdesýde Aral óńirindegi sýdyń tapshylyǵy, qýańshylyq máselesi, Kókaral sý qoımaısyn jańǵyrtý, áıelderdiń áleýmettik jobalarmen aınalysýy syndy ózekti máseleler qozǵaldy.

Alqaly jıynda Aral aýdandyq áıelder keńesiniń tóraıymy Aqyl Sádýaqasova, shıelilik Náıla Palymbet, jýrnalıst Sársenkúl Bıqoja, oblystyq máslıhat depýtaty, QR Prezıdenti janyndaǵy áıelder isteri jáne otbasylyq-demografııalyq saıasat jónindegi komıssııa múshesi Aıda Abıbýllaeva, oblystyq áıelder keńesiniń tóraıymy Raıkúl Baınazarova óz oı-pikirlerin ortaǵa saldy.

«Búgingi erkin kezdesý aldaǵy mindetterdi taǵy bir saralaýǵa jol ashty dep esepteımin. Árıne, usynystardyń árbiri ózekti. Onyń ishinde sýdyń tapshylyǵy problemasy Úkimet deńgeıinde qaralyp, ýaqytyly sheshim qabyldanýda. Máselen, «Kókaral» sý qoımasy boıynsha bıyl jobalyq-smetalyq qujattary tolyq aıaqtaldy. Saraptamadan ótkizý úshin memleket tarapynan qarjy da bólinetin boldy. Nátıjesinde keler jyly Kókaralǵa rekonstrýktsııa jasaý bastalady degen senimdemiz. Qýańshylyq jaǵdaıynda Aral óńirinde tótenshe jaǵdaı rejımin ýaqytyly jarııalap, qajetti qadamdardy iske asyrdyq. Kórshi oblystardyń kómegi de máseleni retteýdi jedeldetti. Úkimet deńgeıindegi qoldaý sharalarynyń nátıjesi sharýalardyń jaǵdaıyna oń áser etti deı alamyz», - dedi oblys ákimi.

Jıyn sońynda Gúlshara Ábdiqalyqova óńirdiń damýyna súbeli úlesin qosqan sala ardagerleri men depýtattardy Alǵys hatpen marapattady.

Aıta keteıik, oblysta 823 myńnan astam turǵyn bolsa, onyń 410 myńǵa jýyǵy áıelder. Sondaı-aq, medıtsına qyzmetkerleriniń 87 paıyzy, pedagogtardyń 73 paıyzy, jalpy bıýdjettik sala qyzmetkerleriniń 60, memlekettik qyzmetshilerdiń 37 paıyzy názik jandylardyń úlesinde.

Eske salsaq, Qyzylorda áýejaıy halyqaralyq standartqa saı jańartylady.


Avtor Ádiljan Úmbet
Basty sózder: Qyzylorda oblysy, Qoǵam, Ákim,
Joǵary qaraı