Aýa raıy
Astana 11 °S
Almaty 22 °S
valıýta baǵamy
USD 412.55
EUR 468.66
RUB 5.79
CNY 58.80

Gúlshara Ábdiqalyqova Qyzylorda oblysyndaǵy koronavırýspen kúres sharalaryn málim etti

2020 jyldyń 7 shilde 2020 12:59

QYZYLORDA. QazAqparat - Qyzylorda oblysynda COVID-19 indetimen kúreske baǵyttalǵan birqatar shara qabyldanýda. Bul jóninde oblys ákimi Gúlshara Ábdiqalyqova brıfıngide málim etti, dep habarlaıdy QazAqparat.

«Ózderińiz bilesizder, jaqynda ǵana Memleket basshysy osy indetpen kúresý maqsatynda aldymyzǵa naqty tapsyrmalar júktedi.

Osy tapsyrmalardy oryndaý jáne aımaq halqynyń qaýipsizdigin qamtamasyz etý úshin 5 shildeden bastap Bas sanıtarlyq dárigerdiń qaýlysymen oblysta qatań karantın rejımi engizildi.

Osyǵan oraı, memlekettik mekemeler men quqyq qorǵaý organdary, kvazısektorlyq uıymdar, barlyq aýrýhanalar men emhanalar kúsheıtilgen tásilmen jumys jasaýǵa kóshti», - dedi oblys ákimi.

Keshe óńir basshysy jaǵdaıdy qaıta baǵamdap, qaladaǵy birqatar aýrýhanalar men dárihanalardy aralap shyqty. Týyndaǵan keıbir máselelerdi jedel sheshý joly qarastyryldy.

«Máselen, ınfektsııalyq jáne provızorlyq tósek-oryndaryn arttyrý baǵytynda óńirimizde ınfektsııalyq statsıonarda 515, provızorlyq statsıonarda 1730 tósek-oryn bolsa, qazirgi tańda Oblystyq ftızıopýlmonologııa ortalyǵy bazasynda qosymsha 120 orynǵa ınfektsııalyq jáne Shalqııa eldi mekeninde 30 oryndyq provızorlyq statsıonar ashý jumystary 2 kúnde júzege asyrylady.

Oryn tapshylyǵy joq. Eger qajettilik týyndaǵan jaǵdaıda jeke klınıkalardy da ońtaılandyryp paıdalanýǵa kelisimimiz bar», - dedi ol.

G.Ábdiqalyqovanyń aıtýynsha, sondaı-aq ókpeni jasandy jeldetý apparattary men ottegi ballondarynyń jetispeýshiligin sheshý baǵytynda tıisti jumystar júrgizilýde.

«Keshe medıtsına mekemelerin aralaý barysynda birqatar aýrýhana basshylary negizgi problemalardyń biri retinde, ottegi ballondarynyń jetispeýshiligin atap ótti.

Osyǵan oraı, aýrýhanalardy úzdiksiz, jetkilikti kólemde ottegi ballondarymen qamtamasyz etý úshin óndirýshi mekemelermen birlesip jumys jasaý týraly sala basshylary men qala, aýdan ákimderi barlyq múmkindikterin paıdalanýda.

Sonymen qatar, oblystyq kópbeıindi aýrýhana janynan ottegi óndiretin tseh salý jumystary qolǵa alynyp, oblystyq bıýdjetten 80 mln teńge qarjy bólindi», - dedi oblys ákimi.

Maýsym aıynda oblysta qoldanysta bolǵan ókpeni jasandy jeldetýge arnalǵan 76 apparatqa 20 portatıvti apparat qosymsha satyp alyndy. Taǵy 63-ine ótinim berildi. Odan bólek, osy apparattardy alýǵa jergilikti kásipkerler qoldaý bildirýde.

Búginge deıin Qyzylorda oblysynda koronavırýs ınfektsııasyna shaldyqqan 1456 adam tirkelgen. Onyń ishinde 950 adam syrqatynan jazylyp, úsh adam qaıtys boldy.


Joǵary qaraı