Aýa raıy
Astana -10 °S
Almaty 0 °S
valıýta baǵamy
USD 421.58
EUR 496.83
RUB 5.53
CNY 62.20

Germanııada 2 qarashadan bastap lokdaýn engiziledi

2020 jyldyń 29 qazan 2020 02:09

BERLIN. QazAqparat – Germanııada koronavırýstyń jyldam órshýine baılanysty jańa shekteý sharalary engizildi. Tıisti sheshimdi sársenbi, 28 qazan kúni Kantsler Angela Merkel jáne 16 federaldy jerdiń premer-mınıstrleri qabyldady. «QazAqparat» HAA bul týraly dw.com saıtyna silteme jasap habarlaıdy.

Qarasha aıynda el turǵyndary áleýmettik qarym-qatynasty barynsha azaıtýǵa mindetteldi. Barlyq kóńil kóterý oryndary, meımanhanalar, dámhanalar men kóptegen qyzmet kórsetý nysany bir aıǵa jabylady.

Jańa shekteýler 2 qarashadan bastap aıdyń sońyna deıin engizilip otyr.

A.Merkel baspasóz máslıhatynda málim etkendeı, sońǵy 10 kúnde nemis klınıkalarynyń ıntensıvti terapııa bólimshelerindegi naýqastar sany eki esege artqan, 9 kúnde ókpeni jasandy jeldetý apparattaryna qosylǵan naýqastar sany eki esege kóbeıgen. «Aldaǵy ýaqytta densaýlyq saqtaý júıesine júktemeniń artýyn boldyrmaý úshin ýaqyt sozbaı áreket etý qajet», - dedi Merkel.

Onyń aıtýynsha, pandemııamen kúrestegi eń mańyzdy máseleniń biri – koronavırýs juqtyrǵandarmen baılanysta bolǵan tulǵalardy baqylaý. Degenmen, qazirgi ýaqytta densaýlyq saqtaý salasy mundaı kontaktilerdiń 75 paıyzǵa jýyǵyna baqylaý júrgizýge qaýqarsyz.

Áleýmettik baılanys barynsha shekteledi

2 qarashadan el azamattary óz úılerinen tys aýmaqta áleýmettik qarym-qatynasty barynsha azaıtýy tıis. Qoǵamdyq orynda eki úıdiń adamdaryna (10 adamnan artyq emes) ǵana kezdesýge ruqsat. Kóshelerdegi, turǵyn úılerdegi jáne jekemenshik ýchaskelerdegi ózge kezdesýler men merekelerge tyıym salynady. Talapty saqtamaǵandar jaýapkershilikke tartylady.

Sondaı-aq aldaǵy aıda jeke saparlardan, týǵan-týystarǵa barýdan bas tartý usynylyp otyr.

GFR qonaqúıleri kelýshilerdi dáleldi sebeppen ǵana qabyldaı alady. Týrısterdi qabyldaýǵa tyıym bar.

Qandaı nysandardyń jumysyna ruqsat?

Germanııada barlyq kóńil kóterý, demalys mekemeleri – teatrlar, kınoteatrlar, kontsert zaldary, kórme ortalyqtary, oıyn salondary, kazıno, demalys saıabaqtary, fıtnes-klýbtar, kásibı emes sportklýbtar, júzý basseınderi jabylady. Bul rette, dalada jeke adamdardyń sportpen shuǵyldanýyna ruqsat berilip otyr.

Budan bólek, qyzmet kórsetý oryndary – massaj, sulýlyq salondary jabylady.

Meıramhanalar men kafeler de qyzmetin toqtatady. Degenmen, «ózimen alyp ketý» shartymen tamaq satatyn nysandardyń jumysy jalǵasady.

Shashtarazdar men fızıoterapııalyq kabınetterdiń jumysy toqtamaıdy.

Mektepter men balabaqshalar qalypty rejımde jumys isteı beredi.

Jańa shekteýler kásipqoı sportqa da qatysty bolyp otyr. Kez kelgen matchtar, sonyń ishinde Býndeslıgadaǵy jarystar – kórermendersiz ótedi.

Málim etilgendeı, karantındik talaptar eki aptadan keıin qaıta qaralýy múmkin.

Merkel men federaldy jerlerdiń premer-mınıstrleri eki aptadan soń kezdesip, qabyldanǵan sharalardyń qoıylǵan mindetke sáıkes kelýin teksermek. Qajet bolǵan jaǵdaıda shekteýlerge ózgeris engizý josparlanǵan.

Aıta keteıik, Germanııada sońǵy táýlikte koronavırýs 15 myńǵa jýyq adamnan anyqtaldy. Bul, ótken sársenbimen salystyrǵanda eki esege jýyq kóp. Jáne bul, pandemııa bastalǵaly eń úlken kórsetkish.


Avtor Mıra Tólendiqyzy
Basty sózder: Álem, Karantın, Koronavırýs,
Joǵary qaraı