Aýa raıy
Astana +7 °S
Almaty +14 °S
valıýta baǵamy
USD 421.58
EUR 496.83
RUB 5.53
CNY 62.20

Fýtboldan Eýropa chempıonaty: Ispanııa men Shvetsııa quramalary teń tústi

2021 jyldyń 15 maýsym 2021 09:00

NUR-SULTAN. QazAqparat - Fýtboldan Eýropa chempıonatynyń fınaldyq satysyndaǵy toptyq kezeńde Ispanııa men Shvetsııa quramalary kezdesti, dep habarlaıdy QazAqparat tilshisi.

Atalǵan eki komanda E tobynda synǵa túsedi. Qarsylastary – Slovakııa jáne Polsha quramalary.

Eki qurama buǵan deıin 18 márte kezdesken. Onyń jeteýinde ıspanııalyqtar jeńiske jetse, tórteýinde teń nátıje tirkelip, qalǵanynda shvetsııalyqtar basym tústi.

Jankúıerler atalǵan oıynda qos qarsylastyń qaısysy jeńetinine qyzyǵýshylyq bildirdi. Ekeýi de káriqurlyqtaǵy bedeldi quramalar qatarynda sanalady.

Dese de eki qurama terezesi teń deńgeıde oıyn kórsetti. Bir-biriniń qaqpasynan sańylaý taba alǵan joq. Kezdesý 0:0 esebimen teń aıaqtaldy.

Eske salsaq, atalǵan topta Slovakııa Polshadan 2:1 esebimen basym tústi.

Endi atalǵan toptaǵy kelesi týr oıyndary 18 jáne 19 maýsym kúnderi ótkiziledi. Aldymen 18 maýsymda Ispanııa men Polsha, 19 maýsymda Shvetsııa men Slovakııa sheberlik baıqasady.

Bıylǵy birinshilikte barlyǵy 24 qurama synǵa túsedi. Árbir toptan úzdik eki komanda men kórsetkishi joǵary tórt qurama jarysty jalǵastyrýǵa múmkindik alady. Fýtboldan Eýropa chempıonaty 11 maýsymda bastaldy, ol 11 shildede máresine jetedi.

Avtor Ádiljan Úmbet
Basty sózder: Sport,
Joǵary qaraı