Aýa raıy
Nýr-Sýltan +7 °S
Almaty +14 °S
valıýta baǵamy
USD 449.85
EUR 485.43
RUB 5.71
CNY 70.69

Fýtboldan el chempıony «Tobyldyń» bas bapkeri qyzmetinen ketti

2022 jyldyń 16 mamyr 2022 11:09

NUR-SULTAN. QazAqparat – Fýtboldan el chempıony «Tobyl» (Qostanaı) klýbynyń bas bapkeri, qazaqstandyq maman Aleksandr Moskalenko qyzmetinen ketti, dep habarlaıdy QazAqparat tilshisi.

«Tobyl» fýtbol klýbynyń baspasóz qyzmeti málim etkenindeı, taraptar ekijaqty kelisim boıynsha kelisim-shartty úzdi.

Atalmysh fýtbol klýby A.Moskalenkoǵa alǵysyn aıtyp, aldaǵy mansabynda sáttilik tiledi.

«Osy ýaqytqa deıin «Tobyl» sapynda birneshe belesti baǵyndyrdyq. Qıyn da qýanyshty kezeńder bastan ótti. Aıtýly jeńister de, aýyr jeńilister de boldy. Osynyń bárin bir komanda bolyp bastan keshirdik. «Tobyl» – aldyna bıik maqsat qoıǵan ujym. Biraq osy jyly biz oılaǵandaı bolmady. Onyń ózindik sebepteri de bar. Alaıda munymyz tek aqtalý sııaqty estilýi múmkin. Sol sebepti artyq sóılemeıin. Komandaǵa aldaǵy ýaqytta sáttilik, maqsattarynyń oryndalýyn tileımin. Ár fýtbolshyǵa, ákimshilik jáne medıtsınalyq shtabqa alǵysymdy bildiremin», - dedi Aleksandr Moskalenko.

A.Moskalenko «Tobyldy» ótken jyldyń maýsym aıynan beri jattyqtyryp keldi. Ótken jyly qostanaılyqtar 45 jastaǵy mamannyń basshylyǵymen el chempıony atandy. Sondaı-aq bıyl sýperkýbokty da jeńip aldy. Alaıda Qazaqstan birinshiliginde sońǵy jeti matchtyń bireýinde ǵana komanda jeńiske jetti. Ótken týrda «Aqtóbeden» 1:2 esebimen utylyp qaldy. Qazirgi kezde qostanaılyqtar týrnır kestesinde 15 upaımen jetinshi orynda ǵana keledi.

Eske sala keteıik, budan buryn fýtboldan el chempıonatynda «Tarazdyń» qaıta birinshi orynǵa kóterilgenin jazǵan bolatynbyz.


Avtor Eljan Eraly
Basty sózder: Sport, Fýtbol,
Joǵary qaraı