Aýa raıy
Astana +7 °S
Almaty +14 °S
valıýta baǵamy
USD 421.58
EUR 496.83
RUB 5.53
CNY 62.20

Fermerler 2021 jylǵy qurǵaqshylyqtan saqtandyrý sharttaryn jasaı bastady

2021 jyldyń 6 sáýir 2021 17:46

NUR-SULTAN. QazAqparat - Fermerler egis alqaptaryn ylǵaldyń jetispeýshiliginen bıyl 15 sáýirge deıin onlaın rejımde saqtandyra alady. Bul týraly Aýyl sharýashylyǵy mınıstrliginen málim boldy, dep habarlaıdy QazAqparat.

«Sarapshylar bıyl elimizdiń kóptegen óńirlerinde qurǵaqshylyq bolýy múmkin ekenin aıtyp otyr. Kóktemniń sońy men jaz aıynyń basyndaǵy topyraq ylǵalynyń jetispeýshiligi ekken eginniń tez kóterilýine kedergi bolady. Sondyqtan, qurǵaqshylyqtan saqtandyrý – ósimdik sharýashylyǵymen aınalysatyndardy qoldaýdyń mańyzdy sharalarynyń biri. 2020 jyldyń basynan beri ósimdik sharýashylyǵyndaǵy saqtandyrý erikti túrde júrgizilip keledi. Endi fermerler óz táýekelderin qanshalyqty tómendetý kerektigin ózderi sheshedi. Óz bıznesin saqtandyrǵan egin sharýashylyǵymen aınalysatyndarǵa memleket qoldaý kórsetedi. Atap aıtqanda, saqtandyrý polısi qunynyń 50 paıyzy sýbsıdııa retinde tólenedi», - delingen habarlamada.

Eń bastysy – «Agroinsurance» servıstik júıesi ornalasqan www.qoldau.kz platformasyna elektrondy tsıfrlyq qoltańbanyń (ETsQ) kómegimen tirkelý kerek. Osylaısha, fermerler ekken eginin saqtandyrý úshin alqaptardy, kompanııany, saqtandyrý somasyn tańdaýǵa, sondaı-aq kún saıyn platformadaǵy jeke kabıneti arqyly topyraqtaǵy ylǵal deńgeıin qadaǵalaýǵa múmkindik alady.

Saqtandyrý jaǵdaıyn anyqtaýda adamı faktor alynyp tastalǵany da úlken mańyzǵa ıe. Saqtandyrý jaǵdaıy týyndaǵan faktini spýtnıktik derekterge súıene otyryp, aqparattyq júıe aıqyndaıdy. Bul – saqtandyrý tólemderi mehanızminiń obektıvtiligi men ashyqtyǵyn qamtamasyz etedi.

Ylǵal tapshylyǵynan saqtandyrý birneshe kezeńge bólinedi. Birinshi kezeń - 15 mamyrdan 14 maýsymǵa deıin, ekinshi kezeń - 15 maýsymnan 14 shildege deıin jáne úshinshi kezeń - 15 shildeden 14 tamyzǵa deıingi aralyqty qamtıdy.

Osyǵan baılanysty, fermerler alqaptardy qandaı kezeńder boıynsha saqtandyratynyn ózderi tańdaıdy. Monıtorıng júıesinde ár kezeń boıynsha saqtandyrý jaǵdaıy iske qosylatyn óz trıggerleri qoıylǵan. Qurǵaqshylyqtan saqtandyrý tarıfi saqtandyrý somasynyń 3,2 - 4,8%-yn quraıdy. Al ylǵaldyń artyq bolýynan saqtandyrǵanda 3,2%-y sheginde belgilengen.

Saqtandyrý somasyn eseptegende fermer egis alqabynyń bir gektaryna saqtandyrý somasyn ózi anyqtaıdy. Ol – 40 myńnan 80 myń teńgege deıin. Sodan keıin saqtandyrý kompanııasyn tańdaıdy jáne saqtandyrý qunynyń 50%-yn tóleıdi. Qalǵan somany Aýyl sharýashylyǵyn qarjylaı qoldaý qory tóleıdi.

Saqtandyrý shartyna sáıkes, saqtandyrý jaǵdaıy týyndaǵan sátten bastap 15 jumys kúni ishinde tólem jasalady.


Joǵary qaraı