Aýa raıy
Astana +7 °S
Almaty +14 °S
valıýta baǵamy
USD 421.58
EUR 496.83
RUB 5.53
CNY 62.20

«Ejelgi dáýirden búginge deıingi Qazaqstan tarıhy» atty akademııalyq basylym jaryq kóredi

2021 jyldyń 28 qazan 2021 14:18

ATYRAÝ. QazAqparat — QR Bilim jáne ǵylym mınıstrligi «Ejelgi dáýirden búgingi kúnge deıingi Qazaqstan tarıhy» atty akademııalyq basylym ázirlep jatyr, dep habarlaıdy QazAqparat tilshisi.

Bul týraly vedomstvo basshysy Ashat Aımaǵambetov «Ulyq ulys — Altyn Orda» atty halyqaralyq konferentsııada málim etti.

«Memleket basshysy «Táýelsizdik bárinen qymbat» atty akademııalyq maqalasynda Qazaqstannyń tarıhyn jańa júıeli túrde zertteý qajettigin basa aıtqan bolatyn. Qazirgi ýaqytta Sh.Ýálıhanov atyndaǵy tarıh jáne etnologııa ınstıtýtynyń negizinde bedeldi tarıhshy ǵalymdardan quralǵan top «Ejelgi dáýirden búginge deıingi Qazaqstan tarıhy» kóptomdyq akademııalyq basylymyn ázirlep jatyr. Basylymnyń 3-tomy «Joshy Ulysyna» arnalǵan. Instıtýt atalǵan tomǵa jaýapty bolyp, osy baǵytta júıeli zertteý júrgizedi», — dedi mınıstr.

Vedomstvo basshysy ǵalymdar Altyn Orda tarıhyn zertteý boıynsha granttyq jáne nysanaly-baǵdarlamalyq qarjylandyrý sheńberinde 15-ke tarta ǵylymı joba júzege asyryp jatqanyn málim etti.

«Ǵalymdar «Jańa derekkózderdi aýdarý jáne Altyn Ordanyń etnosaıası tarıhyn zertteý» ǵylymı baǵdarlamasyn júzege asyra bastady. Baǵdarlamanyń maqsaty — Joshy Ulysynyń etnosaıası tarıhyn Qazaq handyǵynyń tarıhı bastamasy retinde zertteý.

Halyq arasynda Altyn Orda tarıhy týraly kásibı ǵylymı bilimdi nasıhattaý. Atyraý jerinde Ulyq Ulystyń astanalarynyń biri – Saraıshyq bar. Bul qalada Altyn Orda handarynyń birazy taqqa otyrdy.

Saraıshyqta Ulys Joshynyń birqatar handary, Noǵaı ordasynyń bekteri, sondaı-aq Qazaq handyǵynyń jekelegen handary jerlengen.

Saraıshyq – tarıhymyzdyń sımvoldyq astanasynyń óte mańyzdy quramdas bóligi. Saraıshyqtyń mádenı murasyn, tarıhyn jan-jaqty saqtap, zerdeleýimiz qajet.

Bul baǵytta keshendi arheologııalyq izdenister júrgiziledi. Eskertkishtiń materıaldyq jáne rýhanı mádenıetiniń negizgi elementterin qaıta qalpyna keltirý arqyly qýatty memleketimizdiń tiregi retinde ejelgi qala tarıhyn dáripteıtin bolamyz», — dedi Ashat Aımaǵambetov.


Joǵary qaraı