Aýa raıy
Nýr-Sýltan +7 °S
Almaty +14 °S
valıýta baǵamy
USD 449.85
EUR 485.43
RUB 5.71
CNY 70.69

Eýroparlament qarary Qazaqstanǵa qalaı áser etedi – sarapshy pikiri

2022 jyldyń 21 qańtar 2022 13:32

NUR-SULTAN. QazAqparat – Eýropa Parlamenti Qazaqstandaǵy jaǵdaı boıynsha qarar qabyldaýda asyǵystyq tanytty, al qujattyń ózi usynymdyq sıpatqa ıe. Bul pikirdi QR Parlamenti Májilisiniń halyqaralyq ister, qorǵanys jáne qaýipsizdik komıtetiniń tóraǵasy Aıgúl Quspan aıtty, dep habarlaıdy QazAqparat.

«Eýroparlament bul qarardy qabyldaýda asyǵystyq tanytty dep sanaımyn, olar resmı tergeý nátıjelerin kútýi kerek edi», - dedi A. Quspan QazAqparat tilshisine bergen suhbatynda.

Depýtat jeke ózi Eýropalyq Parlamentke hattar jibergenin, onda qazirgi ahýaldyń kúrdeliligin túsiný úshin oqıǵalardyń hronologııasyn jan-jaqty baıandap, tergeý nátıjelerin kútýge shaqyrǵanyn aıtty.

Onyń aıtýynsha, qujatty qabyldaýdan buryn qyzý pikirtalastar bolǵan jáne ártúrli qarama-qaıshy kózqarastar aıtylǵan.

Bir top depýtat bul jaǵdaıda nátıjelerdi kútý kerek dep sanaıdy jáne 30 jyl boıy turaqtylyqtyń, beıbitshilik pen tynyshtyqtyń úlgisi bolǵan Qazaqstandy aıyptamaýǵa shaqyrady.

Jáne basqalary Prezıdent Qasym-Jomart Toqaevtyń sońǵy eki-úsh jylda qarqyndy qabyldanǵan reformalaryn atap ótti.

Keıbiri janashyrlyq tanytyp, qurmetpen qaraýdy, qıyn sátterde dostar túsinistik pen tilektestik bildirý keregin aıtty.

Qazaqstandy jaqsy biletin depýtattar baǵalaý kezinde baıypty bolýdy aıtyp, eýroparlamentshiler leksıkonynda eleýli problemalar bar dep atap ótti, óıtkeni olar bandıtterdi belsendiler dep, tutqyndalǵandardy saıası tutqyndar dep ataǵan.

«Biraq basqa da sózder sóılendi. Menińshe, kóptegen depýtattar UQShU áskeriniń shaqyrylǵanyna mán berip otyr, depýtat Kýbılıs bul oqıǵalardyń barlyǵyn bıliktiń ózi uıymdastyrǵanyn, Reseı áskerin Qazaqstanǵa shaqyrýǵa syltaý bolǵanyn aıtty», - deıdi A. Quspan.

Sonymen birge, Aıgúl Quspan birneshe depýtattyń tótenshe jaǵdaı kezinde eldegi ınternetti óshirýdi aıyptaǵanyn jetkizdi.

Keıbiri «Qazaqstan halqyna» qorynyń qurylymyn túsindirýdi talap etse, endi biri – Qytaımen jaqsy qarym-qatynasqa alańdaýshylyq bildirgen, al Eýropalyq Odaq pen Qytaı arasyndaǵy qatynastar kúrdeli bolyp otyr.

«Meni Qazaqstannyń kórshilerine eldiń ishki isterine aralaspaýǵa shaqyrý tań qaldyrdy, bul rette qarar qabyldaý – bizdiń elimizdiń ishki isterine aralasý bolyp sanalady (...) Meniń oıymsha, búkil qarar men tutas mátin «sheteldegi qaıratkerlerdiń» usynymymen jasalǵan. Muny stılden baıqaýǵa bolady jáne mátinde: «Qazaqstan rejım qarsylastaryn qýdalaıdy, olar shetelde jasyrynýǵa májbúr» degen sózder bar», - deıdi depýtat.

«Qarar Qazaqstanǵa esh áser ete almaıdy, Eýroparlament qararlary beısenbi kúni Strasbýrgte ótetin plenarlyq sessııalarda aı saıyn qabyldanady. Bul jedel qararlar dep atalady. Aı saıyn eki qarar qabyldaý kerek. Keıde olardyń qabyldaıtyn da eshteńesi bolmaıdy, sonda qaı elge qatysty qarar qabyldaý kerek dep oılanady. Keshe Gonkong, Sýdan jáne Qazaqstan týraly úsh qarar qabyldandy. Bul jedel qararlar Eýropa Parlamentiniń búkil álemdegi adam quqyqtarynyń jaǵdaıyna úlken nazar aýdaratynyn kórsetý úshin qabyldanady», - dep túsindirdi ol.

Aıgúl Quspannyń aıtýynsha, qararlar deklaratıvti, usynymdyq sıpatqa ıe jáne zańdy áser ete almaıdy.

Aıta keteıik, Qazaqstannyń Syrtqy ister mınıstrligi Eýroparlamenttiń elimizdegi jaǵdaıǵa qatysty qabyldaǵan qarary birjaqty sıpatqa ıe ekenin jáne obektıvti emes tujyrymdarǵa negizdelgenin málimdegen edi.


Joǵary qaraı