Aýa raıy
Astana 20 °S
Almaty 26 °S
valıýta baǵamy
USD 412.55
EUR 468.66
RUB 5.79
CNY 58.80

Eýropa elderinde maska taqpaǵandarǵa qomaqty aıyppul salynady

2020 jyldyń 2 shilde 2020 09:41

BRıÝSSELЬ. QazAqparat – Eýropa elderi koronavırýs pandemııasyna baılanysty engizilgen shekteý sharalaryn jeńildetýdi jalǵastyrýda. Eýropada ınfektsııanyń taralý deńgeıiniń azaıýyna qaramastan, kóptegen memlekettiń bılik organdary azamattardan burynǵydaı maska kııýdi jáne qoǵamdyq oryndarda áleýmettik qashyqtyqty saqtaýdy talap etedi. Erejeni saqtamaǵandarǵa aıyppul salynady, dep habarlaıdy QazAqparattyń menshikti tilshisi.

Germanııanyń barlyq federaldy shtattary qoǵamdyq oryndarda jáne kólikte maska taǵýdy uıǵardy. Eldiń keıbir aımaqtarynda tártip buzýshylarǵa birneshe myń eýroǵa deıin kóp mólsherde aıyppul salynady. Munda «maskalyq rejımdi» engizýdiń sebepteriniń biri Germanııadaǵy birinshi bolyp turǵyndaryna maska taǵý mindettelgen Iena qalasynyń oń tájirıbesi boldy. Qala bıligi jańa erejeler engizilgennen keıin koronavırýspen kúreste aıtarlyqtaı jetistikke jetti dep málimdeıdi.

Ispanııa úkimeti qoǵamdyq oryndarda shekteýsiz merzimge qorǵanysh maskalaryn taǵý boıynsha talaptar engizgen. Eger 1,5 metr áleýmettik qashyqtyqty qamtamasyz etý múmkindigi bolmasa, maska jabyq ǵımarattarda jáne ashyq aýada kııý kerek. Bul erejeni buzǵany úshin 100 eýro kóleminde aıyppul qarastyrylǵan.

Frantsııada qoǵamdyq kóliktiń barlyq túrlerinde, sonyń ishinde taksıde maska taǵý kerek. Tártip buzýshylarǵa 135 eýro kóleminde aıyppul salynady.

1,5 metr qashyqtyqty saqtaý jáne qoǵamdyq kólikterde maska taǵý talaby Nıderlandyda da belgilengen. Erejeni saqtamaǵandarǵa tıisinshe 400 jáne 90 eýro kóleminde aıyppul salynady.

Maskasy bolmaǵany úshin Belgııada qoǵamdyq kólikte júrgen jolaýshyǵa 250 eýro aıyppul salynady.

Avstrııada qoǵamdyq kólikte, dárihanalarda, aýrýhanalarda jáne qyzmet kórsetý salasynda maska taǵý mindetti. Zań buzýshylar 3,6 myń eýroǵa deıin aıyppul tóleıdi. Jańa erejelerdi saqtamaǵan kompanııalarǵa 30 myń eýroǵa deıin aıyppul salynýy múmkin.

Polshada qoǵamdyq kólikte, dúkende, shashtarazda jáne dinı mekemelerde júrgende maska taǵý áli de mindetti. Polıak polıtsııasy maskasyz klıentterge 500 zlota (shamamen 110 evro) mólsherinde aıyppul sala alady.

Maskany taǵý talaby Latvııa, Slovenııa, Italııa, Vengrııa, Gretsııa, Portýgalııa jáne Rýmynııa sııaqty Eýropa elderinde saqtalǵan. Osy memleketterdiń barlyǵynda «maskalyq rejımdi» buzǵany úshin aıyppul salý qarastyrylǵan.

Eýropalyq bılik koronavırýstyń ekinshi tolqynyn kútedi jáne azamattardy jaýapty bolýǵa shaqyrady: qashyqtyqty saqtap, maska kııý mindetti bolmasa da ony taǵýǵa keńes beredi. EO elderiniń memleket jáne úkimet basshylary óz azamattaryna koronavırýs juqtyrǵan adamdar sanynyń kúrt ósýi jaǵdaıynda shekteý sharalary kúsheıtiletinin eskertti.


Basty sózder: Eýropa,
Joǵary qaraı