Aýa raıy
Astana +7 °S
Almaty +14 °S
valıýta baǵamy
USD 421.58
EUR 496.83
RUB 5.53
CNY 62.20

Esirtkini oıynshyqqa jasyrǵan: Kókshetaýda 18 jastaǵy stýdent qyzdar ustaldy

2021 jyldyń 28 qazan 2021 17:49

KÓKShETAÝ. QazAqparat – Aqmola oblysynda 18 jastaǵy stýdent qyzdar sıntetıkalyq esirtki taratty degen kúdikpen ustaldy, dep habarlaıdy QazAqparat Polisia.kz saıtyna silteme jasap.

«Refleks» jedel aldyn alý is-sharasy kezinde sıntetıkalyq esirtkilerdi jasyrýmen aınalysatyn kolledj stýdentteri ustaldy. Olar bul isti qosymsha jumys izdep júrip, ınternettegi habarlandyrý arqyly tapqan. Habarlandyrýda ashanada isteıtin jumys kórsetilgen. Onda tabys kúnine 30 myń teńgege deıin jetetindigi aıtylǵan. Alaıda hat almasý barysynda qyzdar bul istiń esirtkimen baınalysty ekenin túsinedi. Soǵan qaramastan, usynystan bas tartpaǵan.

««Refleks» respýblıkalyq jedel-aldyn alý is-sharasy aıasynda Kókshetaý qalasynyń aýmaǵynda «Oqjetpes» stadıonynyń janynda sıntetıkalyq esirtki zattaryn jasyrýmen aınalysatyn 2 stýdent qyz ustaldy. Olardan esirtkiniń 95 túıinshegi tárkilendi», – dedi Aqmola oblystyq Polıtsııa departamenti Esirtki qylmysyna qarsy kúres basqarmasynyń bastyǵy Meıram Japbasov.

Aqmola oblysy Polıtsııa departamenti bastyǵynyń orynbasary Erlan Qasym málim etkendeı, joǵary synyp oqýshylary men stýdentter mundaı habarlandyrýlarǵa jıi jaýap beredi jáne olardyń arasynda bul isti tastamaı, artynan temir torǵa túsetinder de bar.

Jedel qyzmetkerlerdiń aıtýynsha, qyzdar birlesip jumys istegen. Biri esirtkini jasyrsa, ekinshisi onyń qaıda jasyrylǵanyn túsirip, tapsyrys berýshimen hat almasyp otyrǵan.

Tintý kezinde 18 jastaǵy stýdent qyzdan untaqty, belgili bir ıisi bar, aq jáne kók tústi zat salynǵan 34 túıinshek tárkilendi. Al oıynshyq qonjyqtan osyndaı zat salynǵan 60 túıinshek tabyldy.

«Qazirgi ýaqytta atalǵan fakti boıynsha QR QK-niń 296-baby 2-bóligimen saraptama taǵaıyndaldy, onyń nátıjeleri boıynsha is QR QK-niń 297-baby 3-bóligimen qaıta saralanatyn bolady. Osy bap boıynsha 15 jylǵa deıin bas bostandyǵynan aıyrý jazasy qarastyrylǵan», – dep atap ótti Meıram Japbasov.

Jyl basynan beri Aqmola oblysynda esirtki jasyrýmen aınalysyp kelgen 12 adam ustaldy, olardyń úsheýi – kámeletke tolmaǵandar. Zańsyz aınalymnan jarty keliden astam sıntetıkalyq esirtki tárkilendi.


Joǵary qaraı