Aýa raıy
Astana +7 °S
Almaty +14 °S
valıýta baǵamy
USD 421.58
EUR 496.83
RUB 5.53
CNY 62.20

Erjan Qazyhan Berlınge jumys saparymen bardy

2021 jyldyń 8 jeltoqsan 2021 17:22

NUR-SULTAN. QazAqparat - Prezıdenttiń halyqaralyq yntymaqtastyq jónindegi arnaýly ókili Erjan Qazyhan Berlınge jumys saparymen bardy, dep habarlaıdy Aqorda.

Sapar aıasynda arnaýly ókil Federaldy Prezıdent Ákimshiliginiń, Syrtqy ister mınıstrliginiń resmı ókilderimen jáne Býndestag depýtattarymen kelissózder júrgizdi.

Kelissózder barysynda taraptar ekijaqty jáne kópjaqty yntymaqtastyqtyń ózekti máselelerin talqylady. Nur-Sultan men Berlın arasyndaǵy ekonomıkalyq qatynastardyń aýqymyn keńeıtý, onyń ishinde tómen kómirtekti damý jáne klımattyń ózgerýi máseleleri boıynsha ózara is-qımyldy odan ári jandandyrý jóninde ýaǵdalastyqqa qol jetkizildi.

Memleket basshysynyń arnaýly ókili Býndestag depýtattarymen ótken dóńgelek ústelge qatysty. Erjan Qazyhan óz sózinde nemis parlamentarılerine Táýelsizdiktiń 30 jyly ishinde elimizdiń qol jetkizgen jetistikteri týraly málimet berip, Prezıdent Qasym-Jomart Toqaevtyń bastamasymen Qazaqstanda júrgizilip jatqan saıası reformalar jóninde egjeı-tegjeıli aıtyp berdi. Sondaı-aq Erjan Qazyhan «Qazaqstan demokratııany kúsheıtýge, zań ústemdigin qamtamasyz etýge jáne memlekettik basqarý júıesin jetildirýge baǵyttalǵan keshendi ınstıtýtsıonaldyq reformalardy iske asyrýda» – dep atap ótti.

Óz kezeginde, «Germanııa – Ortalyq Azııa» parlamenttik dostyq tobynyń tóraǵasy Manfred Grýnd Qazaqstan men Germanııa arasyndaǵy yntymaqtastyqtyń qarqyndy damyp kele jatqanyna kóńili tolatynyn aıtyp, jańadan saılanǵan nemis depýtattarynyń ekijaqty baılanystardy keńeıtý úshin ári qaraı kúsh salýǵa daıyn ekenin jetkizdi.

Sapar aıasynda Erjan Qazyhan Berlın Eýrazııalyq Klýbynyń «Qazaqstan Táýelsizdiginiń 30 jyldyǵy – jetistikter, maqsattar men syn-qaterler» atty taqyrypta ótkizgen 33-otyrysynda sóz sóıledi. Jıynǵa Qazaqstan men Germanııanyń úkimettik jáne iskerlik ortalarynyń, salalyq jáne óńirlik bıznes-qaýymdastyqtardyń ókilderi, jetekshi german kompanııalarynyń basshylary qatysty.

Berlın Eýrazııalyq Klýbynyń otyrysy koronavırýs pandemııasynyń ekonomıkanyń damýyna keri áserin azaıtý jáne bıznesti qoldaý, sondaı-aq saýda-ekonomıkalyq yqpaldastyqtyń jańa baǵyttaryn ázirleý jónindegi eki eldiń kúsh-jigerin jumyldyrýǵa arnaldy.

Іs-sharaǵa qatysýshylar qolaıly ınvestıtsııalyq ahýal qalyptastyrýǵa, ınfraqurylymdy damytýǵa, memleket pen ınvestorlar arasyndaǵy ashyq dıalog pen ózara is-qımyldy qamtamasyz etýge baǵyttalǵan sheteldik ınvestıtsııalardy tartý jáne qazaqstandyq eksportty qoldaý úshin Qazaqstanda júrgizilip jatqan memlekettik saıasat týraly egjeı-tegjeıli habardar boldy. Óz kezeginde, nemis úkimetiniń ókilderi Qazaqstannyń Germanııa úshin Ortalyq Azııadaǵy basty seriktes retindegi erekshe róline nazar aýdardy.

Іs-shara aıasynda Erjan Qazyhan nemis kompanııalarynyń basshylarymen birqatar ekijaqty kezdesýler ótkizdi. Bul kezdesýler sheńberinde áriptestikti damytý jáne energetıka, JEK-ti paıdalaný, ónerkásipti tsıfrlandyrý jáne avtomattandyrý salasyndaǵy jańa ınvestıtsııalyq jobalardy iske asyrýdyń perspektıvalary talqylandy.

Sapar qorytyndysy boıynsha el Táýelsizdiginiń 30 jyldyǵyna oraı Qazaqstannyń Germanııadaǵy elshiligi uıymdastyrǵan saltanatty qabyldaý ótti.



Joǵary qaraı