Aýa raıy
Nýr-Sýltan +7 °S
Almaty +14 °S
valıýta baǵamy
USD 449.85
EUR 485.43
RUB 5.71
CNY 70.69

Erlik jasaýǵa eshkim daıyndalmaıdy – sábıdi qutqarǵan Sábıt Shontaqbaevtyń áıeli

2022 jyldyń 12 mamyr 2022 13:45

QYZYLORDA. QazAqparat - Nur-Sultan qalasynda kópqabatty úıdiń terezesinen úsh jastaǵy qyzdy qutqaryp alǵan Sábıt Shontaqbaevtyń batyrlyǵyna sheteldikter de tamsana bastady. Bir kúnniń ishinde ataǵy álemge tarap, «beıbit kúnniń batyry» atanǵan Sábıt kim? Onyń ósken ortasy, otbasy qandaı? Batyr jigittiń jubaıy Áıgerimmen az-kem áńgimelesip, biraz jaıtqa qanyqqan edik.

- Aldymen Sábıttiń ósken ortasy, otbasy, minezi jaıynda aıtyp berseńiz?

- Sábıt Qyzylorda oblysy Jalaǵash aýdanyna qarasty Aqqum aýylynda dúnıege kelgen. Ákesi - Serik, anasy - Gúlbarshyn. Bul otbasynda 4 ul, 1 qyz bar. Sábıt otbasynyń úshinshi perzenti. Qazir ata-anasynyń jasy 70-ke kelip qaldy. Otbasy – qarapaıym. Onyń ata-anasy balalaryna árdaıym jaqsy ónege berip keledi. Sábıt ekeýmiz 3 ul, 1 qyz tárbıelep otyrmyz. Uldarymyz Mádı - 13, Saǵı -12, Nur-Dáýlet - 2,5 jasqa kelse, qyzymyz Saǵynysh 9 jasta.




Sábıt jumysqa ornalasamyn dep elordaǵa ketip, qurylys salasynda eńbek etip júr. Oqıǵa bolatyn kúni jumysqa bara jatqan eken. Ózderi sol mańda páter jaldap turǵan. Tańerteńgi ýaqytta segizinshi qabattan kishkentaı búldirshinniń terezeden salbyrap ilinip turǵanyn baıqaıdy. Eshbir oılanbastan ony qutqarýǵa kirisedi. Dosy Saǵı ekeýi osylaısha bir perishteniń ómirin saqtap qalypty. Shynyn aıtqanda, bul oqıǵany estigende biz de tańǵaldyq. Árıne, erlik jasaýǵa eshkim daıyndalmaıdy ǵoı. Óziniń ómirine de qater tóndi. Soǵan qaramastan syn sátte syr bergen joq. Onyń mundaı erligine eldiń alǵysyn estigende mereıimiz ósti. Buryn mundaı qasıetterdi baıqaǵan joqpyn desem de bolady.




- Elordada belgili qurylys kompanııasy Sábıtke úsh bólmeli páterdiń kiltin tabys etti. Otbasysyn astanaǵa kóshirý oıynda bar ma?

- Qazir Sábıt sol páterdiń qujattaryn daıyndaý qamymen júrmin dep aıtty. Taǵy bir qýanyshtysy, syn sátte qasynda bolǵan dosy Saǵı da páterli bolyp jatyr eken. Árıne, olar sol ýaqytta halyq tarapynan mundaı qurmetke ıe bolamyz dep oılaǵan da joq shyǵar. Basty maqsaty - búldirshindi qutqarý ekeni belgili. Ýaqyty kelgende elordaǵa baramyz dep otyrmyz.

Sábıtti arnaıy qabyldaǵan Nur-Sultan qalasynyń ákimi Altaı Kólginov júzdesýde oǵan jumysqa ornalastyrýǵa kómektesetinin aıtty. Al meniń mamandyǵym – bank qyzmetkeri. Alaıda otbasyly bolǵannan keıin qyzmet atqarǵan emespin. Nur-Sultanǵa barǵannan keıin kóre jatarmyz. Al balalardy mektepke ornalastyrýǵa qala ákimi ýáde beripti.




- Sábıtpen birge búldirshindi qutqarǵan Saǵımen týysqandyq baılanys bar ma?

- Ol jaıynda Sábıt telearnaǵa bergen suhbatynda da aıtyp bergen edi. Ras, týysqandyq baılanysymyz da bar. ekeýi astanada bir páterdi jaldap turyp jatyr. Ol da Jalaǵash aýdanynyń Aqaryq aýylynda týǵan, otbasyly.

Eske salsaq, keshe tańerteń elordada ýaqytsha turyp jatqan Qyzylorda turǵyny 8-qabatta terezeden salbyrap turǵan búldirshindi qutqaryp qaldy. Bul oqıǵanyń vıdeosy jelide keń taralyp, Sábıt Shontaqbaevtyń batyl áreketine kópshilik tánti boldy. QR Tótenshe jaǵdaılar birinshi vıtse-mınıstri Ibragım Kúlshimbaev azamatty «Tótenshe jaǵdaıdaǵy erligi úshin» tósbelgisimen marapattasa, Nur-Sultan ákimi Altaı Kólginov jeke qabyldap, onyń Lokomotıv zaýytyna jumysqa ornalastyrylatynyn aıtty.

Al «G-park» qurylys kompanııasy oǵan úsh bólmeli páter syıǵa tartty.

Keıinnen Sábıtke kishkentaı qyzdy qutqarýǵa Saǵı esimdi jigittiń kómek kórsetkeni belgili bolyp, áleýmettik jeli qoldanýshylary oǵan da páter berý kerektigin jazǵan edi. Kóptiń qalaýy oryndalyp, endi búgin Saǵı da baspana kiltin aldy.









Joǵary qaraı