Aýa raıy
Astana -18 °S
Almaty 1 °S
valıýta baǵamy
USD 421.58
EUR 496.83
RUB 5.53
CNY 62.20

Erlan Qarın Ulttyq keńes otyrysynda kóterilgen eń negizgi bastamalardy atady

2021 jyldyń 25 aqpan 2021 22:50

NUR-SULTAN. QazAqparat - Qoǵam qaıratkerleri men bıliktiń ózara is-qımyly «Halyq únine qulaq asatyn memlekettiń» jumys istep turǵanyn aıǵaqtaıdy. Ulttyq qoǵamdyq keńesiniń besinshi otyrysy jóninde Prezıdenttiń kómekshisi Erlan Qarın osylaı dedi, dep habarlaıdy QazAqparat tilshisi.

«Búgin Ulttyq keńestiń besinshi otyrysy ótti. Kezdesýdiń birinshi bóliginde Ulttyq keńestiń jumys tobynyń ókilderi atqarylǵan jumystar týraly qysqasha esep berdi. Marat Shıbutov, Qaıyrbek Arystanbekov, Emın Áskerov jáne Maksım Rojın óz baıandamalarynda Ulttyq keńestiń bastamalary qalaı júzege asyrylyp jatqany týraly aıtyp, keıbir usynystaryn ortaǵa saldy», - dep jazdy Erlan Qarın Facebook paraqshasynda.

Onyń aıtýynsha, otyrystyń ekinshi bóliginde Memleket basshysy birneshe baǵyt boıynsha aýqymdy bastamalar paketin usynǵan. Erlan Qarın bul rette Elbasynyń aýyl sharýashylyǵy jerlerin sheteldik azamattar men kompanııalarǵa satýǵa jáne jalǵa berýge tyıym salýdy zańdastyrýǵa qatysty tapsyrmasyn erekshe atap ótti.

Sonymen qatar Qasym-Jomart Toqaev 2024 jyly aýdan ákimderin tikeleı saılaý arqyly anyqtaý týraly da sóz qozǵady. Bul – saıası jańǵyrý jolyndaǵy aıtarlyqtaı salmaqty qadam.

Sonymen birge Memleket basshysynyń basqa da mańyzdy jáne ózekti bastamalary nazar aýdarýǵa turarlyq.

Ol bastamalar shartty túrde bes blokqa bólinedi: turǵyn úı-ekonomıkalyq saıasatty jetildirý, bilim berý máseleleri, ınklıýzıvti qoǵamdyq ortany qurý, adam quqyqtaryn qorǵaý jáne saıası reformalardy dáıekti túrde júzege asyrý.

Erlan Qarın kóterilgen bastamalardy bylaısha erekshelep atap ótti:

- «Nurly jer» baǵdarlamasynyń baǵalary boıynsha turǵyn úıdi keıinnen satyp alý úshin qurylys salýshylarmen offteık-kelisimsharttar jasasý arqyly jańa bıýdjettik sanattaǵy turǵyn aýdanyn qurý;

- jumys berýshilerdiń óz jumyskerlerine turǵyn úı salýǵa ketken shyǵyndarynyń 50% -na deıin memleket bıýdjetinen óteý arqyly aýyldy jerlerde turǵyn úı qurylysy máselesin sheshý;

- medıtsınalyq JOO-lardaǵy stıpendııa mólsherin ulǵaıtý;

- tek medıtsınalyq mekemege habarlasý arqyly múgedektikti anyqtaý protsedýrasyn jeńildetý;

- 2025 jylǵa deıin Qazaqstan Respýblıkasynda qaýipsiz eńbekti qamtamasyz etý jónindegi is-sharalar josparyn ázirleý;

- 14 jahandyq ındıkatorǵa negizdelgen adam quqyqtarynyń saqtalýyn baǵalaýdyń ulttyq ındıkatorlaryn engizý;

- zańdy tulǵalardyń kámeletke tolmaǵandardyń qumar oıyndarǵa qatysqany nemese olardy soǵan jibergeni úshin oıyn bıznesteriniń lıtsenzııasyn toqtatýǵa deıin ákimshilik jaýapkershilikti engizý;

- Іshki ister mınıstrligi janyndaǵy áıelderdi zorlyq-zombylyqtan qorǵaý bólimsheleriniń shtattaryn qalpyna keltirý;

- barlyq «kórinbeıtin» aımaqtardy jáne basqalaryn qamtýdy kózdeıtin qylmystyq-atqarý júıesi mekemelerinde jáne polıtsııa bólimshelerinde beınebaqylaý júıesin engizý boıynsha naqty is-sharalar josparyn ázirleý.

«Aıta keterligi, búgingi bastamalardyń kóbi Ulttyq keńes músheleriniń usynystary negizinde tujyrymdaldy. Prezıdenttiń óz sózinde Lázzat Qojahmetti, Aıman Omarova, Arman Qashqynbekov, Gúlmıra Ileýova, Aıgúl Orynbek jáne Rahım Oshaqbaevty atap ótýi tegin emes. Qoǵam qaıratkerleri, sarapshylar men bılik organdarynyń ózara is-qımylynyń bul formaty is júzinde «halyq únine qulaq asatyn memlekettiń» jumys istep turǵanyn aıǵaqtaıdy», - deıdi ol.


Joǵary qaraı