Aýa raıy
Nýr-Sýltan +7 °S
Almaty +14 °S
valıýta baǵamy
USD 449.85
EUR 485.43
RUB 5.71
CNY 70.69

Erlan Qarın: Prezıdent adam quqyqtaryn qorǵaý salasyndaǵy eki mańyzdy qujatqa qol qoıdy

2021 jyldyń 29 jeltoqsan 2021 21:08

NUR-SULTAN. QazAqparat – QR Prezıdentiniń kómekshisi Erlan Qarın búgin Memleket basshysy qol qoıǵan Adam quqyqtary jónindegi ýákilge qatysqa zańdarǵa qatysty pikir bildirdi, dep habarlaıdy QazAqparat tilshisi.

«Búgin Memleket basshysy adam quqyqtaryn qorǵaý salasyndaǵy eki mańyzdy qujatqa qol qoıdy. Olardyń birinshisi –«Qazaqstan Respýblıkasynyń keıbir zańnamalyq aktilerine ólim jazasynyń kúshin joıý máselesi boıynsha ózgerister men tolyqtyrýlar engizý týraly» Zań. Al ekinshisi – «Qazaqstan Respýblıkasyndaǵy Adam quqyqtary jónindegi ýákil týraly» Zań», - dep jazdy ol Telegram kanalynda.

Onyń aıtýyna qaraǵanda, atalǵan zańdar Prezıdenttiń saıası reformalarynyń paketindegi negizgi qujattardyń qataryna jatady.

«Atap aıtqanda, Qylmystyq kodekstiń normalaryn azamattyq jáne saıası quqyqtar týraly halyqaralyq paktige ekinshi Fakýltatıvtik hattamanyń erejelerimen úılestirý qajettiligi týraly osy jyldyń qyrkúıegindegi Prezıdent Joldaýynda aıtyldy.

Alaıda, osy ózgeristerdi kózdeıtin zań jobasyn talqylaý barysynda memlekettik organdardyń ókilderi men quqyq qorǵaýshylar arasynda pikirtalas týyndady. Nátıjesinde, Ulttyq qoǵamdyq senim keńesiniń altynshy otyrysynda eki taraptyń ustanymyn qarastyra otyryp, Prezıdent ólim jazasynyń kúshin joıý normasy qandaı da bir eskertpesiz qabyldanýǵa tıis ekenin atap ótip, osy másele boıynsha quqyq qorǵaýshylardyń ustanymyn qoldady», - deıdi Erlan Qarın.

Al Adam quqyqtary jónindegi ýákil týraly derbes zań ázirleý týraly bastamany Qasym-Jomart Toqaev bıyl qańtar aıynda, QR Parlamentiniń VII shaqyrylymynyń birinshi sessııasynyń ashylýynda jarııalaǵan bolatyn.

«Bul zań Adam quqyqtary jónindegi ombýdsmenniń quqyqtyq mártebesin alǵash ret aıqyn anyqtap, quzyretin aıtarlyqtaı keńeıtedi. Osylaısha, atalǵan zańdardyń qabyldanýy adam quqyqtaryn qorǵaý jáne saıası jańǵyrý salasyndaǵy Prezıdent baǵytynyń birizdiligin kórsetedi.

Budan bólek atalǵan qujattarǵa qol qoıý qoǵam ókilderi men bılik ınstıtýttary arasyndaǵy dıalogtyń tıimdiligin kezekti ret kórsetip otyr. «Qazaqstan Respýblıkasyndaǵy Adam quqyqtary jónindegi ýákil týraly» Zańnyń jekelegen normalaryn qoǵam ókilderi men quqyq qorǵaýshylar Ulttyq qoǵamdyq senim keńesiniń alańynda birneshe ret talqylaǵanyn atap ótken jón», - dep jazdy Prezıdenttiń kómekshisi.


Joǵary qaraı