Aýa raıy
Astana +7 °S
Almaty +14 °S
valıýta baǵamy
USD 421.58
EUR 496.83
RUB 5.53
CNY 62.20

Erqanat Turymtaı qazaqtyń kóne jádigerlerin búginge deıin saqtap keledi

2021 jyldyń 23 qazan 2021 17:31

ÓSKEMEN. QazAqparat – Erqanat Turymtaı kóneniń kózindeı bolǵan ulttyq jádigerlerimizdi saqtap keledi. Ákesinen mıras bolyp qalǵan jádigerlerge erekshe yqylaspen qaraıtyn azamat Óskemen qalasynda turady, dep habarlaıdy QazAqparat tilshisi.

Ótken tarıh ben búgingi kúndi baılanystyryp otyrǵan keıipkerimiz aǵash dińderinen oıylyp jasalǵan ydystar men kóne kitaptardyń sapasy joǵalmaı saqtalýy úshin baryn salyp kele jatyr. Ydystardyń qatarynda astaý, keli, bıe saýatyn shelek saqtalsa, at-ábzelderiniń ishinen kúmis júgen, úzeńgi osy kúnge jetip otyr.

«Erterekte ákemniń qolynda qanjar, pyshaq pen kúmis qylysh bolǵan. Alaıda olar sýyq qarý bolyp sanalǵandyqtan mýzeıge tapsyryldy. Abylaı zamanyndaǵy has batyr Er Jánibektiń qymyz ishetin tostaǵany da osy bizdiń qara shańyraǵymyzda saqtalyp, keıinnen elordadaǵy mýzeılerdiń birine ótkizilgen», – deıdi Erqanat Turymtaı.

Halqymyzdyń salt-dástúrin erekshe baǵalaıtyn ol úıiniń bir qabyrǵasyn ulttyq naqyshtaǵy zattarmen bezendirgen. Ejelgi buıymdardyń árqaısysy da erekshe nazar aýdartady.

«Qazaqtyń ár úıinde qoldanylǵan turmystyq zattar men at ábzelderin ákem maǵan mıras etip qaldyrǵan. Men úshin ata-babalarymyz qolymen ustap tutynǵan zattar óte baǵaly, erekshe ystyq. Aldaǵy muratym – osy qolónerlerdiń bastapqy qalpyn joǵaltpaı, búlinbeı saqtalýyn qamtamasyz etý. Sondaı-aq bes júz jyldan astam tarıhy bar ultymyzdyń tamyry tereńde ekenin jas býynǵa taǵy bir dáleldeý», - deıdi óskemendik azamat.




Ádebı muralardyń ishinen oıyp turyp oryn alatyn kitaptar kóne Osman tilinde jáne tóte jazýmen jazylǵan. Sol túpnusqadaǵy kitaptardy oqý úshin keıipkerimiz arnaıy tóte jazýdy da úırengen. Ol atalǵan ádebıetterdi oqý barysynda ondaǵy málimetter búgingi tańdaǵy kitaptar qorynda kezdespeıtinine kóz jetkizdi. Bir ókinishtisi, sóredegi kitaptardyń paraqtary sarǵaıyp, kómeskilenip barady.


Joǵary qaraı