Aýa raıy
Astana -18 °S
Almaty 1 °S
valıýta baǵamy
USD 421.58
EUR 496.83
RUB 5.53
CNY 62.20

Eraly Toǵjanov Qordaı aýdanynda vaktsına shyǵaratyn zaýyttyń qurylysymen tanysty

2021 jyldyń 22 qańtar 2021 09:21

NUR-SULTAN. QazAqparat - QR Premer-Mınıstrdiń orynbasary Eraly Toǵjanov bastaǵan úkimettik delegatsııa Jambyl oblysynyń Qordaı aýdanyna bardy, dep habarlaıdy primeminister.kz.

Jumys sapary barysynda vıtse-premer Gvardeıskıı aýylyndaǵy bıologııalyq qaýipsizdik problemalary ǵylymı-zertteý ınstıtýty janyndaǵy bıofarmatsevtıkalyq zaýyttyń qurylys barysymen tanysty.

Zaýyt áleýmettik mańyzy bar juqpaly aýrýlarǵa qarsy elge qajetti bıopreparattar shyǵatyn bolady. Olardyń qatarynda COVID-19, pandemııalyq tumaý, maýsymdyq tumaýǵa qarsy splıt-vaktsınalar, týberkýlez, brýtsellez, nodýlıarlyq dermatıt, kúıis qaıyratyn usaq janýarlardyń obasy, qoı men eshkiniń kontagıozdy ektımasy, qoı sheshegi, qutyrýǵa qarsy vaktsınalar jáne basqa da preparattar bar.

Eraly Toǵjanov qurylystyń tehnologııalyq úderisi men óndiris jaǵdaılarynyń odan ári GMP standarttaryna sáıkestigin eskere otyryp, júrgizilýine nazar aýdarýdy tapsyrdy. Sondaı-aq, vıtse-premer merdiger kompanııalardyń ǵylymı-zertteý ınstıtýty, densaýlyq saqtaý, bilim jáne ǵylym mınıstrlikteriniń basshylyǵymen tyǵyz qarym-qatynasta jumys jasaý qajettigin atap ótti.




Qurylys alańynyń aýmaǵynda vıtse-premer jobamen, zaýyt týraly negizgi óndiristik jáne tehnologııalyq málimettermen tanysty, óndiristik protsestiń maketi men shemasyn qarap shyqty. Montajdaý jumystaryn aıaqtaý jáne iske qosý naýryz aıyna josparlanyp otyr. Qosalqy ǵımarattar men qurylystardyń, naqtyraq aıtsaq qazandyq, transformator jáne sorǵy stantsııalarynyń, hlorlaý, energetıkalyq nysandardyń qurylysy aıaqtalǵan. Kún jylyǵanda irgesi abattandyrylyp jáne kógaldandyrylatyn bolady.

Budan soń Eraly Toǵjanov 1958 jyldan beri jumys istep kele jatqan bıologııalyq qaýipsizdik máseleleri ınstıtýtyna arnaıy at basyn burdy. Onda 214 adam eńbek etedi. Ǵylymı mekemeniń basshysy, bıologııa ǵylymdarynyń doktory Kúnsulý Zakarııa ınstıtýttyń qyzmeti men jetistikteri, sondaı-aq COVID-19 vaktsınasyn ázirleý boıynsha ǵylymı zertteýlerdiń nátıjeleri týraly baıandady.




Sondaı-aq, Vıtse-premer ǴZI qyzmetkerleri úshin 60 páterli kóp qabatty úıdiń qurylysymen tanysty. Búginde árleý jumystary, qasbeti pen shatyrdy jóndeý jumystary júrgizilýde. Úshinshi jaılylyq klasyndaǵy páterlerdiń jalpy aýdany 3,6 myń sharshy metrdi quraıdy. Syrtqy árleý, ishki bólimderdi ornatý jáne elektrmen jabdyqtaý jumystary qalyp otyr.

Jaqyn mańda taǵy eki turǵyn úı men dene shynyqtyrý-saýyqtyrý ǵımaratynyń qurylysy josparlanýda desek, sporttyq nysannyń ekinshi qabatynda 150 oryndyq akt zaly ornalaspaq.

Sonymen qatar, úkimettik delegatsııa Qordaı aýdany Otar aýylyndaǵy sporttyq-saýyqtyrý kesheni men jańa avtomattandyrylǵan gaz taratý stantsııasynda boldy.


Basty sózder: QR Úkimeti, Medıtsına, Jambyl oblysy,
Joǵary qaraı