Aýa raıy
Astana +7 °S
Almaty +14 °S
valıýta baǵamy
USD 421.58
EUR 496.83
RUB 5.53
CNY 62.20

Endi mobıldi aýdarymdar zańmen rettelmek

2021 jyldyń 25 qarasha 2021 11:46

NUR-SULTAN. QazAqparat – Senattyń jalpy otyrysynda «Salyq jáne bıýdjetke tólenetin basqa da mindetti tólemder týraly» QR Kodeksine (Salyq kodeksi) jáne «Salyq jáne bıýdjetke tólenetin basqa da mindetti tólemder týraly» QR Kodeksin (Salyq kodeksi) qoldanysqa engizý týraly» QR Zańyna ózgerister men tolyqtyrýlar engizý týraly» Zańy eki oqylymda qaralyp, qabyldandy, dep habarlaıdy QazAqparat tilshisi.

«Búgin qabyldanǵan zań Memleket basshysynyń Joldaýda jarııalanǵan jekelegen bastamalaryn iske asyrýǵa arnalǵan. Soǵan sáıkes, endi eń tómengi jalaqyny salyqtyq eseptik kórsetkish retinde qoldaný júrgizilmeıdi. Sonymen qatar, qujatta eksporttaýshylardy valıýtalyq tabysty ishki valıýta naryǵyna satý úshin yntalandyrýǵa baǵyttalǵan erejeler kózdelgen. Jalpy, qabyldanǵan Zań qolaıly bıznes-orta men ınvestıtsııalyq ahýaldy qalyptastyrýǵa yqpal etedi jáne otandyq taýar óndirýshilerdi qoldaıdy. Sondaı-aq jeke tulǵalar men kásipkerler úshin salyqtar men tólemder tóleýdi jeńildetedi», – dedi Senat Tóraǵasy Máýlen Áshimbaev.

Zań jobasyn birinshi oqylymda talqylaý kezinde senator Ǵumar Dúısembaev qujatta kózdelgen negizgi sharalarǵa nazar aýdardy.

«Birinshiden, eń tómengi jalaqyny aılyq eseptik kórsetkishke aýystyrý jolymen ony eseptik kórsetkish retinde paıdalanýdy alyp tastaý usynylady. Bul jeke tabys salyǵy boıynsha standartty shegerimdi jáne áleýmettik salyq boıynsha eń tómengi salyq salynatyn bazany aıqyndaýǵa qatysty bolady. Ekinshiden, shıkizat eksportynan túsken valıýtalyq túsimniń keminde 50% - yn shetel valıýtasyn teńgege aıyrbastaýdy júzege asyrǵan bıznes sýbektileri taýarlardy eksporttaǵan kezde 80 paıyzǵa deıingi mólsherde qosylǵan qun salyqty jeńildetilgen tártippen qaıtarý usynylady. Kásipkerlik sýbektileriniń tizbesin Qazaqstan Respýblıkasynyń Úkimeti bekitedi», - dedi Ǵ. Dúısembaev.

Onyń aıtýynsha, Salyq kodeksinde 2022 jylǵy 1 qańtardan bastap Qazaqstan Respýblıkasynda taýarlar men qyzmetter kórsetetin sheteldik ınternet-kompanııalardyń qosylǵan qun salyqty tirkeý men tóleýdiń jeńildetilgen tártibi kózdelgen. Jalpy, tsıfrlyq salyqty engizý qazaqstandyq jáne sheteldik kompanııalar úshin básekelestik jaǵdaılardy teńestirýge kómektesedi.

«2023 jylǵy 1 qańtardan bastap arnaıy salyq rejımin jáne biryńǵaı jıyntyq tólemdi qoldanýǵa ruqsat etilgen qyzmet túrlerin qaıta qaraý usynylady. Budan bólek, avtomobılder boıynsha kólik quraldaryna salyqty esepteýge qatysty toqtalsaq, osyǵan baılanysty shaǵyn jáne orta bıznestiń shyǵyndaryn azaıtý úshin salyq salý maqsatynda shaǵyn kólemdi fýrgondardy 3,5 tonnadan aspaıtyn júk kóterimdiligine qaraı salyq salý tártibimen júk avtomobılderine jatqyzý usynylady», - dedi depýtat.

Sonymen qatar, Qazaqstan Respýblıkasynyń aýmaǵy boıynsha halyqaralyq qatynasta jolaýshylar men júkterdi tasymaldaýdy júzege asyratyn sheteldik avtokólik quraldarynyń júrip ótýi úshin alym stavkasyn 20-dan 30 aılyq eseptik kórsetkishke deıin arttyrý eskerilgen.

Mobıldi tólemderdi fıskaldaý baǵytyna toqtalǵan senator: «Pandemııa kezinde saýda jáne qyzmet kórsetý salasyndaǵy shaǵyn jáne orta bıznes sýbektileri kásipkerlik qyzmette jeke tulǵalar arasyndaǵy tranzaktsııalarǵa arnalǵan jedel mobıldi aýdarymdardy barlyq jerde paıdalana bastady. Bul máseleni zańnamalyq retteý maqsatynda: «mobıldi tólemder» túsinigin anyqtaý, mobıldik tólemder arqyly taýarlar men kórsetiletin qyzmetterge aqy tóleý úshin esep aıyrysýlar kezinde onlaın-baqylaý-kassa mashınalaryn qoldanýdy zańdastyrý, kásipkerlerdi bıznesti júrgizýge arnalǵan jeke shottardy paıdalanýǵa mindetteý, bankterdi memlekettik kirister organdaryna tıisti málimetterdi berý usynylady», - dedi Ǵumar Dúısembaev.


Avtor Rýslan Ǵabbasov
Basty sózder: Parlament, Senat, Zań, Salyq,
Joǵary qaraı