Aýa raıy
Astana +7 °S
Almaty +14 °S
valıýta baǵamy
USD 421.58
EUR 496.83
RUB 5.53
CNY 62.20

Elordanyń eki turǵyny kóshede áıelderdiń alqalaryn julyp áketip otyrǵan

2021 jyldyń 13 maýsym 2021 06:30

NUR-SULTAN. QazAqparat – Nur-Sultan qalasynyń tártip saqshylary birneshe márte urlyq jasaǵan eki er adamdy ustady. Olar keshki ýaqytta áıelderdi ańdyp, altyn alqalaryn julyp áketip otyrǵan, dep habarlaıdy QazAqparat.

Polıtsııa departamentiniń málimetine sáıkes, qaraqshylardyń úsh qylmysqa qatysy bary dáleldengen. Qaskóıler kezekpe-kezek áreket etip otyrǵan. Olar kóshede altyn alqasy bar áıeldiń artynan ańdyp, urymtal sátte áshekeıdi moıynynan julyp áketip otyrǵan.

Máselen, keshki ýaqytta Moldaǵulova kóshesinde 52 jastaǵy áıeldiń altyn alqasy osyndaı áreketpen urlanǵan. Áıel eki er adam artynan ańdyp kele jatqanyn baıqamaǵan. Qylmyskerlerdiń biri onyń janynan ótip bara jatyp, 240 myń teńge turatyn altyn alqasyn julyp alǵan. Ekeýi de dereý boı tasalaǵan.

Zardap shegýshilerdiń taǵy biri – elordanyń 28 jastaǵy turǵyny. Ol keshki ýaqytta jumystan úıine qaıtyp bara jatqan. Jubanov kóshesiniń boıynda oǵan kenet er adam shabýyl jasap, moınyndaǵy alqasyn alyp ketken.

Abaı-Beısekbaev kósheleriniń qıylysynda da osyǵan uqsas qylmys jasalǵan. Aryz berýshi 38 jastaǵy áıeldiń aıtýynsha, saǵat 21.00 shamasynda belgisiz eki er adam altyn alqasyn úzip áketken. Oqıǵany jaqyn mańda velosıpedpen ketip bara jatqan jas jigit kórip, dereý kómekke umtylǵan. Ol velosıpedin tastaı salyp, urylardyń artynan júgirgen. Biraq qaraqshylar qashyp úlgeredi. Jas jigittiń batyl áreketi vıdeobaqylaý kameralaryna jazylyp qalǵan.

Qylmyskerler aqyry polıtseılerdiń qolyna tústi.

«Olar astananyń 24 jáne 32 jastaǵy turǵyndary. Onymen qosa, qaskóıler altyndardy ózge adamnyń atynan ótkizip jatqany jazylǵan vıdeo bar. «Urlyq» baby boıynsha qylmystyq is qozǵaldy. Kúdiktiler ýaqytsha ustaý abaqtysyna qamaldy», - dedi Nur-Sultan qalalyq Polıtsııa departamenti Krımınaldyq polıtsııa basqarmasynyń bastyǵy Dmıtrıı Demıdov.


Perevod Mıra Tólendiqyzy
Basty sózder: Nur-Sultan, Qylmyspen kúres,
Joǵary qaraı