Aýa raıy
Astana -10 °S
Almaty -5 °S
valıýta baǵamy
USD 421.58
EUR 496.83
RUB 5.53
CNY 62.20

Elordadaǵy Jekpe-jek saraı̆yna Jaqsylyq Úshkempirovtiń esimi berildi

2020 jyldyń 2 jeltoqsan 2020 12:29

NUR-SULTAN. QazAqparat - Elordadaǵy Jekpe-jek saraı̆yna dańqty balýan Jaqsylyq Úshkempirov esimi berildi. Bul týraly QR Prezıdentiniń baspasóz hatshysy Berik Ýálı Instagram paraqshasynda jazdy, dep habarlaıdy QazAqparat tilshisi.

«Memleket basshysy Qasym-Jomart Kemelulynyń tikeleı bastamasymen ári qoldaýymen Elordamyzdaǵy Jekpe-jek saraıy resmı túrde dańqty balýan, Olımpıada chempıony Jaqsylyq Úshkempirov aǵamyzdyń esimimen atalatyn boldy. Bul sheshim bylaı qabyldanǵan edi... Osydan birneshe jyl buryn osy Jekpe-jek ortalyǵynyń irgetasy qalanyp jatqanda Jaqsylyq aǵamyz úlken uly Jandospen birge qurylys bastalǵaly jatqan jerdiń janynan ótip bara jatady. Endi ǵana qazyǵy qaǵylyp jatqan jerge qarap: «Osy qazaqqa, qazaqtyń sportyna, qazaqtyń kúresine bir kisideı-aq eńbek sińirdim dep oılaımyn. Ásirese, Odaqtyń dańqy dáýirlep, bizdiń ulttyń ókilderiniń báıge almaq túgil, ózgemen teń turýynyń ózi muń bolyp turǵan shaqta Olımpıadanyń júldesin julyp aldym. Onymdy búgingi qazaqqa mindet qylmaımyn, árıne. Ol kezde jastyqtyń býymen bilinbegen de eken. Qazir oılaımyn, áli kúnge ózimniń izimdi basatyn jigitterdiń shyqpaǵanyna qaraǵanda, sol 80-degi Olımpıada maǵan da ońaıǵa soqpaǵan eken-aý dep. Endi bir armanym bar, shirkin osy Jekpe-jek ortalyǵynyń qurylysy bitip, meniń atymdy berse ǵoı, arman joq edi-aý» degen eken. Jandos: «Oı áke-aı, bul qaı ýaqytta salynyp bitedi deısiz? Oǵan deıin kim bar, kim joq? Qandaı sheshim qabyldanady? Bilmeımiz ǵoı...» dep qoıa salady», - dep jazdy Berik Ýálı.

Onyń atap ótýinshe, Jaqsylyq aǵamyz baqılyq bolyp ketkennen keıin joǵarydaǵy áńgime Memleket basshysyna jetedi. Qasym-Jomart Toqaev birden qoldaıdy. Tıisti oryndarǵa tapsyrma beredi.




«Sóıtip, kúni keshe ǵana Úkimettiń resmı qaýlysy shyqty. Jekpe-jek saraıy resmı túrde Jaqsylyq Úshkempirov aǵamyzdyń atymen atalatyn boldy. Balýan aǵamyzdyń arýaǵy razy bolsyn! «Er esimi, el esinde» degen osy!», - dedi Prezıdenttiń baspasóz hatshysy.

Esterińizge sala ketsek, Nur-Sultan qalasyndaǵy «Jekpe-jek» saraıyna Olımpıada chempıony Jaqsylyq Úshkempirovtiń esimin berdi kózdegen Úkimet qaýlysynyń jobasy osy jyldyń qyrkúıek aıynda «Ashyq úkimet» portalynda qoǵam talqylaýyna usynylǵan bolatyn.

Sonymen qatar dańqty palýan dúnıege kelgen Jambyl oblysynda da «Taraz-Arena» sport keshenine onyń esimin berý usynylǵan. Jambyl oblysy ákimdigi men máslıhatynyń birlesken usynysy óńir máslıhatynyń kezekten tys otyrysynda maquldanǵan. Usynys Respýblıkalyq onomastıka komıssııanyń qaraýyna joldanǵan.

Grek-rım kúresinen tuńǵysh Olımpıada chempıony, Álem chempıony, Qazaqstannyń eńbek eri, «Barys», «Qurmet» «Parasat» ordenderiniń ıegeri Úshkempirov Jaqsylyq Ámiráliuly 1951 jyly 6 mamyrda Qazaq KSR, Jambyl oblysy, Sverdlovsk aýdany, Chapaev keńsharynda dúnıege kelgen. Bıylǵy 2 tamyzda mezgilsiz ómirden ótti.


Avtor Marlan Jıembaı
Basty sózder: Sport, Nur-Sultan,
Joǵary qaraı