Aýa raıy
Astana +7 °S
Almaty +14 °S
valıýta baǵamy
USD 421.58
EUR 496.83
RUB 5.53
CNY 62.20

Elordada turatyn tórt jasar «Messıdiń» kóz súısinter fıntteri men jattyǵýlary

2021 jyldyń 30 mamyr 2021 15:21

NUR-SULTAN. QazAqparat – Elordada kásibı fýtbolshylar isteıtin jattyǵýlardy aına-qatesiz qaıtalaıtyn daryndy balaqaı turady, dep habarlaıdy QazAqparat tilshisi.

4 jasar Imran bul kúnde ózi turatyn úıdiń aýlasynda «juldyz» atanyp úlgergen. Onyń dopty sheber alyp júretinine, álden túrli fıntter jasap, ózimen jasty balalardy ońaı aldap ótetinine kórshileri súısine qaraıtyn bolǵan.

Imrandy ákesi ózi jattyqtyryp júr. Balasy aıaǵyn táı-táı basqannan dopqa qumarlyǵyn tanytqan. Al onyń fýtbolǵa beıimdiligi úsh jarym jasynda aıqyn kórine bastapty. Sodan beri Islam Orymbaev balasyn kúnine úsh ýaqyt ózi jattyqtyryp keledi.

«Balam 2017 jyly 22 mamyrda týǵan. Jaqynda ǵana tórtke toldy. Budan kishkene kezinde jumysqa ketkende bólmesine dop qaldyryp ketetinmin. Sol kezde ol basqa oıynshyqpen oınap otyrsa da, arasynda bir dopty teýip ketpese kóńili kónshimeıtin. Al úsh jarym jastan bastap fýtbolǵa erekshe yqylas tanyta bastady. Tańerteń tura sala, betin de jýmastan maǵan fýtbol oınaıyq deıtin. Osylaı men ony ózim jattyqtyra bastadym», - deıdi Islam Orymbaev.

Imrannyń anasy Gýzal Parmankýlova joldasy Islamnyń da fýtbolǵa qumar bolǵanyn, óziniń de sportty súıetin jan ekenin aıtady. Alaıda otbasylyq jup ekeýi de shashtaraz bolyp jumys isteıdi. Ózderiniń boıyndaǵy sportqa degen beıimdilik pen mahabbat balalarynyń boıynan kórinis tapqan kórinedi.

«Imran kishkene kúninen «Pele. Ańyzdyń týýy» atty fılmdi jaqsy kórdi. Ásirese, Peleniń bala kezi beınelengen tusyn qaıtalap qoıyp berýdi suraıtyn. Qoıyp bergenimizde bala Peleniń dopqa qumarlyǵy, fýtbolǵa degen mahabbatyna erekshe súısinip qaraıtyn», - deıdi jas talanttyń anasy.

Gýzaldyń aıtýynsha, olar Instagram áleýmettik jelisinen paraqsha ashyp, Imrannyń jattyǵýlarynyń vıdeosyn sala bastaǵan. Osy paraqshany júrgize bastaǵaly shet elderden balaǵa qyzyǵýshylyq tanytqandar bolypty.




«Kóbi bizdi shetelde turady dep oılapty. Bir joly Kanadadan jazdy. Balanyń jattyǵýyn kórgisi keldi. Biraq bizdiń Qazaqstanda turatynymyzdy estigen soń, aınyp qaldy. Olarǵa sol elde turǵanymyz kerek bolǵan syńaıly. Al basqa áleýmettik jeli qoldanýshylary Imrannyń kishkene Messı ekenin aıtyp, tilektestik bildirip jatady», - deıdi Gýzal Parmankýlova.





Bıyl aqpan aıynan bastap Islam Orymbaev uly kásibı túrde jattyǵýy úshin balasyn Dream team fýtbol mektebine beripti. Búginde Imran kásibı bapkerlerden sabaq alyp júr. Al bapker Kravchenko Sergeı balanyń 4 jasta meńgerip alǵan jattyǵýlaryn keıbir on jasar balalar qaıtalaı almaıtynyn aıtyp, jas darynǵa «kishkentaı Messı» dep baǵa bergen.





Avtor Erbol Janat
Basty sózder: Qoǵam, Nur-Sultan, Sport,
Joǵary qaraı