Aýa raıy
Astana +7 °S
Almaty +14 °S
valıýta baǵamy
USD 421.58
EUR 496.83
RUB 5.53
CNY 62.20

Elordada Shoqan Ýálıhanovtyń ómiri men murasyna arnalǵan kitap tanystyryldy

2021 jyldyń 20 qazan 2021 12:46

NUR-SULTAN. QazAqparat – Nur-Sultan qalasynda «Shoqan Ýálıhanovtyń taǵdyry men murasy» atty kitaptyń tusaýkeseri ótti, dep habarlaıdy QazAqparat tilshisi.

Jańa kitap qazaqtyń ǵalymy, saıahatshy, etnograf, aǵartýshy Shoqan Ýálıhanovtyń 185 jyldyǵyna oraı jaryqqa shyqty.

Avtordyń aıtýynsha, týyndyda buǵan deıin kópshilikke belgisiz bolǵan derekter berilgen. Jáne ol kitapty jazý barysynda Ulttyq ǵylym kademııasynyń kitaphanasynda, Reseıdiń syrtqy saıasat jáne memlekettik tarıh muraǵatynda kóptegen zertteý júrgizgen.




«Bul týyndy da Shoqannyń ómiri men shyǵarmashylyǵyna qatysty buryn-sońdy jarııa etilmegen dúnıeler bar. Onyń arhıv jáne basqa da derek kózderin zertteı kele anyqtadym. Osy oraıda Shoqannyń ómirbaıany men onyń qaldyrǵan murasy tolyǵa tústi desem de bolady. Árıne, Shoqan Ýálıhanovqa qatysty áli de ashylmaǵan syr men derek jetip jatyr. Oǵan qatysty zertteletin dúnıe kóp. Mysaly, ǵalymnyń qaıtys bolǵan kúnine qatysty áli kúnge deıin naqtylyq joq. Birde Álkeı Marǵulan Shoqandy ómir boıy zertteý kerek degen edi. Sondyqtan da Shoqan taqyryby qaı ýaqytta da mańyzdy. Men óz shyǵarmamda Shoqandy ǵalym, aǵartýshy emes qarapaıym adam retinde zerttep, onyń adamgershilik qasıetine tereńirek toqtalyp óttim. Tolyǵyraq kitaptan oqyp jatarsyzdar degen úmittemin», - dedi tarıhshy, Shoqan týraly jaryq kórgen jańa kitaptyń avtory Jaras Ermekbaı.




Avtor qazaq aǵartýshysy jaıly málimet jınaýǵa 25 jylǵa jýyq ýaqytyn jumsaǵan jáne bul baǵyttaǵy jumystyń jalǵasatynyn aıtty.

«Shoqan Ýálıhanovtyń taǵdyry men murasy» atty kitaptyń tusaýkeseri elordadaǵy L.Gýmılev atyndaǵy Eýrazııa ulttyq ýnıversıtetinde óttin jáne oǵan qoǵam qaıratkerlerimen qatar aǵartýshy qaýym ókilderi qatysty.




Aıta keteıik, atalǵan týyndyny QR Aqparat jáne qoǵamdyq damý mınıstrligi men «Rýhanı jańǵyrý» ınstıtýtynyń qoldaýymen «QazaqGeography» respýblıkalyq qoǵamdyq birlestigi basyp shyǵardy.

























Avtor Álı Ibraev
Basty sózder: Bilim, Ǵylym, Nurly jer baǵdarlamasy,
Joǵary qaraı