Aýa raıy
Astana +7 °S
Almaty +14 °S
valıýta baǵamy
USD 421.58
EUR 496.83
RUB 5.53
CNY 62.20

Elordada koronavırýspen kúreske qansha qarajat jumsaldy

2021 jyldyń 28 qazan 2021 18:08

NUR-SULTAN. QazAqparat – Elordada koronavırýstyq ınfektsııamen kúres aıasyndaǵy is-sharalardy qarjylandyrýǵa 35,38 mlrd teńge jumsaldy. Bul týraly «Áleýmettik medıtsınalyq saqtandyrý qory» KEAQ Nur-Sultan qalalyq fılıalynyń dırektory Nurlybek Qabdyqaparov aıtty, dep habarlaıdy QazAqparat tilshisi.

«Osy jyly qor ambýlatorııalyq-emhanalyq deńgeıdegi medıtsınalyq qyzmetterdiń qoljetimdiligin keńeıtip, kúndizgi statsıonar qyzmetin qarjylandyrý kólemin kóbeıtti. Birshama qarjy pandemııa jaǵdaıyn jáne tsıfrlandyrý múmkindikterin eskere otyryp, qashyqtyqtan kórsetiletin medıtsınalyq qyzmetterdi odan ári engizýge jumsalýda»,- dedi ol onlaın brıfıng barysynda.

Nurlybek Qabdyqaparovtyń aıtýynsha, Nur-Sultan qalasy boıynsha 2021 jyldyń 9 aıynda koronavırýstyq ınfektsııamen kúres aıasyndaǵy is-sharalardy qarjylandyrý 35,38 mlrd teńgeni qurady. Onyń ishinde: medıtsına qyzmetkerlerine ústemeaqylar – 17,38 mlrd teńge; medıtsınalyq kómekke jáne KVI taralýyn boldyrmaý jónindegi qyzmetterge – 13,75 mlrd teńge jumsaldy. Karantındik jáne ınfektsııalyq statsıonarlarǵa 42,7 myńnan astam adam emdeýge jatqyzyldy jáne emdeldi. KVI taralýyn boldyrmaý úshin statsıonar aıasynda úıge kep kórsetiletin medıtsınalyq kómekke 1,88 mln teńge jumsalyp, 60 adam emdeldi. PTR dıagnostıka qyzmetine 3,41 mlrd teńge bólinip, 482,1 myń PTR-test jasaldy. Mobıldi brıgadalardyń shyǵýyna 838,73 mln teńge ketti. Olar 145,5 myń shaqyrtýǵa shyqty.

«Elorda turǵyndary koronavırýstyq ınfektsııa jáne pnevmonııa kezinde medıtsınalyq kómekti medıtsınalyq saqtandyrý júıesindegi mártebesine qaramastan tegin alady. Koronavırýstyq ınfektsııamen nemese ortasha, aýyr jáne asa aýyr deńgeıdegi pnevmonııamen aýyrǵan patsıentter Medıtsınalyq saqtandyrý qorynyń qarajaty esebinen ońaltýdan óte alady. Azamattar úıinde emdeldi me, álde aýrýhanada emdeldi me, oǵan qaramaıdy. Medıtsınalyq ońaltýǵa joldama reabılıtolog mamannyń qatysýymen aýrýhananyń nemese emhananyń mýltıdıstsıplınarlyq komandasynyń qorytyndysy boıynsha beriledi», - dedi fılıal dırektory.


Joǵary qaraı