Aýa raıy
Astana +7 °S
Almaty +14 °S
valıýta baǵamy
USD 421.58
EUR 496.83
RUB 5.53
CNY 62.20

Elorda depýtattary 7 mektepke qazaq zııalylarynyń esimin berý usynysyn qoldady

2021 jyldyń 24 qarasha 2021 11:31

NUR-SULTAN. QazAqparat – Elorda málıhatynyń depýtattary 7 mektepke qazaq zııalylarynyń esimin berý týraly sheshim qabyldap, respýblıkalyq onomastıkalyq komıssııaǵa usynys joldady, dep habarlaıdy QazAqparat tilshisi.

Qalalyq máslıhattyń kezekten tys sessııasynda «Nur-Sultan qalasynyń keıbir bilim berý uıymdaryna ataý berý týraly máselesi daýysqa salyndy.

Atalǵan másele boıynsha sheshim jobasyn máslıhat depýtattaryna qalalyq tilderdi damytý jáne arhıv isi basqarmasynyń basshysy Sáken Esirkepov tanystyrdy.

Jobada elordadaǵy 7 bilim berý uıymyna qazaqtyń tanymal tulǵalarynyń esimin berý usynylǵan. Olar:

№11 mektep-lıtseıge kórnekti memleket qaıratkeri, ǵalym, etnograf Ózbekáli Jánibekovtiń esimin berý;

№60 mektep-gımnazııaǵa arheolog, tarıh ǵylymdarynyń doktory, belgili akademık Kemel Aqyshevtiń esimin berý;

№2 balalar mýzyka mektebine kúmis kómeı ánshi, Qazaqstannyń halyq ártisi, Halyq qaharmany, keler jyly týǵanyna 100 jyl tolatyn Roza Baǵlanovanyń esimin berý;

№3 balalar mýzyka mektebine áıgili opera ánshisi, pedagog, professor Ermek Serkebaevtyń esimin berý;

№66 mektep-lıtseıge kórnekti memleket qaıratkeri, Qazaqstandy shırek ǵasyrǵa jýyq ýaqyt basqarǵan Dinmuhamed Qonaevtyń esimin berý;

№83 mektep-gımnazııaǵa qazaqtyń asa kórnekti aǵartýshy pedagogy, jazýshy, etnograf, folklorshy Ybyraı Altynsarınniń esimin berý;

№77 mektep-gımnazııaǵa aqyn, halyq jazýshysy, jýrnalıst, Qazaqstannyń eńbek sińirgen qaıratkeri Farıza Ońǵarsynovanyń esimin berý.

«10 qarashada ótken Nur-Sultan qalasy onomastıka komıssıasynyń kezekti otyrysynda elordamyzdaǵy birqatar bilim berý uıymdaryna ataý berý jónindegi usynystar talqylanyp, qoldaý tapqan bolatyn. Osyǵan oraı sizderdiń qaraýlaryńyzǵa «Nur-Sultan qalasynyń keıbir bilim berý uıymdaryna ataý berý týraly» qala ákimdiginiń qaýlysy jáne qalalyq máslıhattyń sheshim jobasy engizilip otyr. Kórsetilgen joba QR qoldanystaǵy zańnamasyna qaıshy kelmeıdi jáne normatıvtik-quqyqtyq aktilerge qoıylatyn talaptardy buzbaıdy. Usynys qoldaý tapqan jaǵdaıda ákimdik pen máslıhattyń birlesken qaýlysy men sheshimi QR zańnamasynda belgilengen tártip boıynsha QR Úkimeti janyndaǵy respýblıkalyq onomastıka komıssııasynyń qaraýyna engiziledi», - dedi Sáken Esirkepov.

Máslıhat depýtattary sheshim jobasyn biraýyzdan maquldap daýys berdi. Bul usynysty respýblıkalyq onomastıka komıssııasy maquldasa, tıisti Úkimet qaýlysy shyǵyp, elordadaǵy 7 mektep jańa ataýǵa ıe bolady.


Joǵary qaraı