Aýa raıy
Astana +7 °S
Almaty +14 °S
valıýta baǵamy
USD 421.58
EUR 496.83
RUB 5.53
CNY 62.20

Elorda dárigerleri koronavırýs juqtyrǵan naýqastardyń jaǵdaıy týraly aıtty

2021 jyldyń 21 sáýir 2021 21:06

NUR-SULTAN. QazAqparat - Shákızada Júsipova jaqynda kovıdtik statsıonar retinde qaıta beıindelgen №3 kópbeıindi qalalyq balalar aýrýhanasynda aǵa medbıke bolyp jumys isteıdi. Bul aýrýhana qazir balalardy qabyldamaıdy, biraq «jedel járdem» qyzmeti KVI juqtyrǵan aýyr jáne óte aýyr naýqastardy jıi jetkizedi, dep habarlaıdy elorda ákimdigi.

«Jurt indetten qutyldyq dep oılaıdy. Biraq tolyq qutylǵan joqpyz. Kún saıyn patsıentterdiń jaǵdaıy qanshalyqty aýyr ekenin, olardyń qınalyp jatqanyn kóremiz. IVL apparatymen áreń dem alyp jatqanyn kórýdiń ózi aýyr. Halyqqa endi qalaı túsindirý kerek ekenin bilmeımiz. Kúndelikti kórgenimizdi jurtqa jetkizý ońaı emes», - deıdi medbıke muńdana.

Bul aýrýhanada KVI-men aýyratyn 270 adam em qabyldap jatyr. Jansaqtaý bólimderine jaǵdaıy óte múshkil naýqastar jatqyzylady.

«Patsıentterdiń aýyrǵanyn jan-tánimizben sezinemiz. Sebebi eń aldymen, ózgelerdiń saýyǵyp ketýin tileıtin adambyz. Dárigerlerdiń basty maqsaty – patsıentti aıaqqa turǵyzyp, otbasyna saý kúıde oralýyna járdem etý. Aýrýhanadan emdelip shyqqanda olardyń júzderindegi qýanyshqa qanshalyqty qýana qaraıtynymyzdy bilesiz be?!» - deıdi Shákızada Júsipova.

Biraq, medbıkeniń aıtýynsha, bul qýanysh uzaqqa sozylmaıdy. Sebebi emdelip shyqqan adamnyń ornyna ózge naýqas jatqyzylady.

«Eger árbir adam medıtsına qyzmetkerleriniń jumysyn kórse, jaǵdaıdan habardar bolar edi. Másele mynada, jurt dárigerlerdiń aıtqanyn qulaǵyna ilmeıdi, qarapaıym ǵana aldyn alý talaptaryn oryndamaıdy. Sanıtarlyq normalardy saqtasa patsıent ózin de, ózgelerdi de qorǵar edi», - deıdi ol.

Búgingi tańda Nur-Sultan qalasynda 1 255 patsıent KVI aýrýhanalarynda jatyr. Onyń ishinde 104 naýqas jansaqtaý bóliminde jatyr. Bul reanımatsııalyq tósek júktemesiniń 53%-yn quraıdy. IVL apparattarynda 24 adam óz ómirimen kúresýde. Elordada koronavırýsty naýqastardy emdeýge 15 statsıonar jumyldyryldy.

Naýqastar arasynda 60 jastan asqan jas sanaty basym (77%) – 80 patsıent.

Aıta ketý kerek, aýyr jaǵdaıdaǵy naýqastardyń arasynda 104 adamnyń birneshe aýrýy bar. Patsıentterdiń 70%-y emdeýge jatqyzylǵannan keıin úsh táýlik ishinde reanımatsııa jáne qarqyndy terapııa bólimshesine aýystyryldy.


Jaǵdaıdy turaqtandyrý jáne COVID-19-dy jeńý úshin qala turǵyndaryn jappaı vaktsınatsııalaý júrgizilýde. Elorda ákimi Altaı Kólginovtiń tapsyrmasy boıynsha vaktsınatsııa pýnktteriniń sany úsh esege artyp, 100-ge deıin jetti. AMSK uıymdarynda egý pýnktteriniń jumys ýaqyty saǵat 8:00-den 00:00-ge deıin ulǵaıtyldy. Budan basqa, vaktsınatsııa pýnktteri «Mega Silk Way», «Khan Shatyr» SOO-da ashylǵan. Jaqyn arada olar «Keruen», «Abu-Dabi Plaza» SOO-da ashylady. Al jumys kestesi saǵat 10:00-den 22:00-ge deıin.


Basty sózder: Nur-Sultan, Koronavırýs,
Joǵary qaraı