Aýa raıy
Astana +7 °S
Almaty +14 °S
valıýta baǵamy
USD 421.58
EUR 496.83
RUB 5.53
CNY 62.20

Elimizdiń aýmaǵynda 1 aptada 2,9 myńnan astam qylmys jasaldy

2021 jyldyń 29 qarasha 2021 11:31

NUR-SULTAN. QazAqparat – Elimizdiń aýmaǵynda 1 apta ishinde 2,9 myńnan astam qylmys jasaldy. Bul jaıynda QR ІІM resmı ókili Nurdildá Oraz málim etti, dep habarlaıdy QazAqparat tilshisi.

«Bir apta ishinde 2 936 qylmys jasaldy. Onyń 2 012-si táýlik ishinde ashyldy. Polıtsııa qyzmetkerleri «izin sýytpaı» 8 kisi óltirýdi, 6 ólimge ákep soqqan densaýlyqqa qasaqana aýyr zııan keltirýdi, 4 qaraqshylyq, 32 tonaý jáne 427 bóten múlikti urlaý qylmystaryn ashty», - dedi resmı ókil ІІM baspasóz alańynda ótken brıfıngide.

Sonymen qatar ol Ystanbulda Halyqaralyq qylmystyq polıtsııa uıymynyń Bas assambleıasy – Interpoldyń 89-shy sessııasy ótkenin, oǵan Іshki ister mınıstri Erlan Turǵymbaev bastaǵan qazaqstandyq delegatsııa da qatysqanyn atap ótti.

«Assambleıaǵa 160 eldiń ókilderi, sondaı-aq Interpoldyń ulttyq ortalyq bıýrosy, onyń ishinde Qazaqstan men BUU, DSU sııaqty birneshe halyqaralyq uıymdardyń basshylary, Ortalyq Amerıka, Meksıka jáne Karıb óńiri polıtsııa basshylarynyń komıssııasy jáne taǵy basqalary bas qosty. Interpol jahandyq qaýipsizdikti qamtamasyz etýde mańyzdy ról atqarady. Bul uıym jalpy qylmysqa qarsy kúres salasynda qatysýshy elderdiń ulttyq quqyq qorǵaý organdarynyń kúsh-jigerin biriktirý salasynda keń múmkindikter ashady», - dedi Nurdildá Oraz.


Avtor Marlan Jıembaı
Basty sózder: Qoǵam, Qylmyspen kúres, QR ІІM,
Joǵary qaraı