Aýa raıy
Astana 16 °S
Almaty 28 °S
valıýta baǵamy
USD 412.55
EUR 468.66
RUB 5.79
CNY 58.80

Elimizde kóleńkeli ekonomıkany azaıtý úshin qandaı sharalar jasaldy

2020 jyldyń 30 maýsym 2020 10:23

NUR-SULTAN. QazAqparat – QR Qarjy mınıstriniń mindetin atqarýshy Berik Sholpanqulov kóleńkeli ekonomıkany azaıtý úshin engizilgen quraldar týraly aıtyp berdi, dep habarlaıdy QazAqparat tilshisi.

«2019 jyly 1 qańtardan bastap barlyq qosylǵan qun salyǵyn tóleýshiler «Elektrondyq shot-faktýralar» mindetti kóshirmesine aýystyryldy jáne búginde 440 myńnan astam paıdalanýshy tirkelip, 433 mln elektrondyq shot-faktýra jazǵan. «Elektrondyq shot-faktýralar» aqparattyq júıesin paıdalanýshylardan qosymsha 290,2 mlrd teńge tústi. Bizdiń boljaýymyzsha 2020 jyly shamamen qosymsha 140 mlrd teńge túsim kútilýde», - dedi spıker Úkimettiń búgingi otyrysynda.

Sonymen birge, spıker ótken jyly Taýarlardy tańbalaý júıesiniń de synaqtan ótkenin eske saldy. Teri buıymdaryn tańbalaý nátıjesinde 2019 jylǵy kirister 2 esege artqan jáne 2020 jyly 1 mlrd teńgege deıin túsim kútilýde. Budan basqa, tańbalaý boıynsha temeki ónimderi, alkogol ónimderi, aıaq kıim taýarlary, dárilik zattar jáne sút ónimderi sııaqty taýarlar tizbesin keńeıtý boljanyp otyr.

«Bıyldan bastap onlaın baqylaý-kassa mashınalary mindetti túrde qoldanylýy tıis. Búgingi tańda baqylaý-kassa mashınalaryn paıdalanýshylardyń jalpy sany 728 myńǵa jetti, onyń 710 myńy nemese 97,5% onlaın baqylaý-kassa mashınalaryna kóshti. Sonymen birge, qoldanystaǵy aqparattyq júıeler bazasynda Taýarlardy qadaǵalaýdyń ulttyq júıesi qurylýda. Bıylǵy qazan aıynan bastap aqparattyq júıede taýarlarǵa elektrondyq ilespe júk qujattary engiziledi. Jalpy alǵanda, júıe taýardyń bólshek saýdasyna deıingi jyljýynyń barlyq tizbegin qadaǵalaýǵa múmkindik beredi. Júıeden keıin jalǵan shot-faktýralardyń kóshirmesin toqtatamyz», - dep atap ótti B. Sholpanqulov.

Odan bólek, Salyqtyq ákimshilendirý maqsatynda úshinshi tulǵalardyń derekter bazasy qurylǵan. 2019 jyly bıýdjetke qosymsha 18,6 mlrd teńge somasynda salyq túsken.

Taǵy bir tıimdi quraldardyń biri – Qurylys salasyndaǵy memlekettik satyp alýdy qazynashylyq súıemeldeý. Osylaısha, salyq júktemesiniń koeffıtsıenti memlekettik satyp alýǵa qatysýshylarda 2,3 esege ósip, qosymsha 54,4 mlrd teńge túsken.

«Tsıfrlandyrý jáne kameralyq baqylaýǵa kóshý arqyly da salyqtyq tekserýler ózgertildi. Nátıjesinde olardyń sany 29%-ke azaıdy. Bul rette zańbuzýshylyqtardyń anyqtalýy 2 esege artty nemese 344 mlrd teńge esepke tústi. Mınıstrliktiń negizgi baǵyttarynyń biri - aınaly kedendik statıstıka boıynsha alshaqtyqty tómendetý. Búgingi tańda Qazaqstan men Qytaı arasynda onlaın rejıminde kedendik deklaratsııalarmen elektrondyq almasý júrýde. Bul Qazaqstannyń Qytaıdan ımporty boıynsha alshaqtyqty 2017 jyly 60%-ten 2019 jyly 48%-ke deıin qysqartýǵa múmkindik berdi. 5 aıdyń qorytyndysy boıynsha aıyrmashylyq 39%-ke deıin tómendedi. Osylaısha, ótken jyly bıýdjetke qosymsha 236 mlrd teńge tústi», - dedi spıker.

2018 jyldyń aıaǵynda «Táýekeldi basqarý» aqparattyq júıesi iske qosylǵan. Onyń qorytyndysy boıynsha 2019 jyly bıýdjetke 85 mlrd teńge, 2020 jyldyń basynan beri – 34,9 mlrd teńge tústi. Eýrazııalyq ekonomıkalyq odaq elderinen ımportqa salyqtyq ákimshilik kúsheıtildi jáne «Eksporttyq baqylaý» modýli tájirıbelik paıdalanýǵa berildi. Nátıjesinde qosymsha qosylǵan qun salyǵy boıynsha 122 mlrd teńge tústi.

«Jalpy 2018 jylmen salystyrǵanda taýarlardy qate deklaratsııalaý faktilerin anyqtaý 5,5 esege artqan. Kedendik tólemder men salyqtar 2,3 mlrd teńgege ósken», - dedi Berik Sholpanqulov.

Aıta keteıik, 2019 jyly jalpy ishki ónimge shaqqandaǵy kóleńkeli ekonomıka 23,62%-ke tómendedi.



Joǵary qaraı