Aýa raıy
Astana +7 °S
Almaty +14 °S
valıýta baǵamy
USD 421.58
EUR 496.83
RUB 5.53
CNY 62.20

Elimizde gazet-jýrnalǵa jazylýshylardyń qatary azaıyp keledi

2021 jyldyń 3 jeltoqsan 2021 13:39

NUR-SULTAN. QazAqparat – Elimizde bıýdjet qyzmetkerlerin gazet-jýrnalǵa eriksiz jazyp, basylym oqyrmandary qataryn qoldan jasaý protsesi toqtady ma? Bul suraqqa «Qazposhta» AQ Nur-Sultan qalasy fılılaly satý bóliminiń bas mamany Lázzat Qonaqbaeva jaýap berdi, dep habarlaıdy QazAqparat tilshisi.

«Elorda halqy búginnen bastap 25 jeltoqsanǵa deıin respýblıkalyq jáne qalalyq gazet-jýrnaldarǵa aldaǵy jylǵa jazyla alady. Búgin gazet-jýrnaldarǵa jazylý boıynsha astanalyqtar úshin arnaıy shara uıymdastyryp, halyq nazaryn aýdaryp jatyrmyz. Bul jyl saıyn uıymdastyrylatyn shara. Ótken jyly pandemııaǵa baılanysty ótpeı qaldy», - dedi Lázzat Qonaqbaeva.




Atalǵan sharaǵa respýblıkalyq jáne qalalyq 8 basylym ókilderi qatysyp jatyr. Jáne alǵash bolyp gazet-jýrnalǵa jazylǵan oqyrmandarǵa syılyqta qarastyrylǵan.

«Ár gazet-jýrnaldyń baǵasy ártúrli. Mysaly, Nur-Sultan qalasynda «Egemen Qazaqstan» gazetine 6 aıǵa jazylý 5800 teńge, al «Kazahstanskaıa pravda» gazetiniń 6 aılyq baǵasy 5900 teńgeni quraıdy. Jalpy basylymǵa jazylý boıynsha elimizde problemanyń baryn aıta ketý kerek. Jyl sanap gazet-jýrnalǵa jazylýshylardyń qatary azaıyp keledi. Oǵan ınternette sebep. Basylymdarǵa jazylatyn da, oqıtyn da negizinen eresek adamdar, ıaǵnı deni zeınetkerler. Bizdiń mindet gazet-jýrnaldy oqyrmanǵa ýaqytyly jetkizý», - deıdi ol.













Onyń aıtýynsha, elordada buryndary 1 basylymǵa 1 myńnyń ústine oqyrman jazylsa, sońǵy jyldary gazet-jýrnalǵa jazylýshylar sany 1 myńǵa da jetpeıdi eken.

«Taǵy bir mańyzdy jaıt. Elimizde bıýdjet qyzmetkerlerin gazet-jýrnalǵa eriksiz jazdyrady degen túsinik bar. Ol problemanyń buǵan deıin bolǵany ras. Degenmen osydan 3-4 jyl buryn ishki saıasatty qaıta qarap onyń joly kesildi. Qazir eshkimdi qınap basylymǵa jazý degen joq», - dedi L. Qonaqbaeva.

Aıta keteıik, búgin elordada 2022 jylǵa gazet-jýrnaldarǵa jazylý júrip jatyr. Keler jylǵa basylymdarǵa jazylý sharasy 25 jeltoqsanǵa deıin jalǵasady.



































Avtor Álı Ibraev
Basty sózder: BAQ, Qoǵam,
Joǵary qaraı