Aýa raıy
Astana +7 °S
Almaty +14 °S
valıýta baǵamy
USD 421.58
EUR 496.83
RUB 5.53
CNY 62.20

Elimizde 2,2 mln adamnyń onlaın jumysqa kóshýine múmkindik bar

2021 jyldyń 17 qyrkúıek 2021 13:00

NUR-SULTAN. QazAqparat – Qazaqstanda arnaıy jumys ornyna kelip eńbektenýdi talap etpeıtin salada júrgen 2,2 mln adam bar. «Eńbek resýrstaryn damytý ortalyǵy» AQ strategııa jáne jobalyq basqarý departamentiniń dırektory Aleksandra Molchanovskaıa osyndaı málimet usyndy, dep habarlaıdy QazAqparat tilshisi.

«Qazaqstannyń eńbek naryǵy úshin pandemııa óte kúrdeli boldy. Biraq lokdaýn kezinde jumyssyzdyq keń aýqymda etek alǵan joq. Óıtkeni merzimsiz demalysqa ketip, jumys berýshilerimen baılanysyn úzbegenderdiń sany kóp boldy. Osynyń arqasynda shekteýler alynǵan kezde jumysyna qaıtyp jatty. Sarapshylardyń aıtýynsha, shaǵyn kásipkerlik nysandary jabylýǵa májbúr bolǵan. Biraq olar bilim salasyna kóbirek mamandanyp, sondaǵy tenderlerge qatysa bastaǵan. Áli de bolsa adamdar pandemııanyń saldaryna beıimdelý ústinde. Trendterge kelsek, kóptegen kásiporyndar jumys isteý formatyn ózgertip jatyr. Tsıfrlandyrý men jumysshylaryn qaıta oqytý beleń alyp tur», - dedi ol «Qazaqstannyń eńbek naryǵy: jańa jaǵdaıdaǵy damý» atty tuńǵysh ulttyq baıandamanyń tanystyrylymynda.

Mamannyń aıtýynsha, júzdegen, myńdaǵan adamdy jumyspe qamtyp otyrǵan iri kompanııalardyń qyzmetkerlerdi qashyqtan jumysqa jiberýi týraly naqty bir boljam aıtý qıyn.

«Árkim jeke sheshim qabyldap jatyr. Resmı statıstıka boıynsha, qashyqtan jumyspen qamtylǵandardyń sany ázirge az ǵana. Erekshe ınfraqurylymdy qajet etpeıtin, kompıýter men telefon arqyly isteletin jumystardyń kóbi onlaın rejımge yǵysýy múmkin. Al shashtaraz sııaqty adamnyń qolymen isteletin kásipterdi onlaın rejımge jiberý múmkin emes. Ekonomıster men zańgerler, memlekettik basqarý salasynyń mamandary men sarapshylar qashyqtan jumysqa aýysa alady. Búginde olardyń sany – 2,2 mln adam», - deıdi Aleksandra Molchanovskaıa.


Joǵary qaraı