Aýa raıy
Astana +7 °S
Almaty +14 °S
valıýta baǵamy
USD 421.58
EUR 496.83
RUB 5.53
CNY 62.20

Elektrondy úkimet: Tsıfrlyq qujattardy uıaly baılanys operatorynyń keńsesinde qoldanýǵa bolady

2021 jyldyń 22 qazan 2021 20:27

NUR-SULTAN. QazAqparat – Tsıfrlyq qujattardy uıaly baılanys operatorlarynyń keńselerinde qoldanýǵa bolady, dep habarlaıdy QazAqparat Tsıfrlyq damý, ınnovatsııalar jáne aeroǵarysh ónerkásibi mınıstrligine silteme jasap.

Vedomstvonyń málimdeýinshe, EGov mobile mobıldi qosymshasyndaǵy «Tsıfrlyq qujattar» qyzmetiniń arqasynda baılanys operatorlarynyń klıentteri qyzmetterdi alý úshin jeke basyn kýálandyratyn qujattyń túpnusqasyn usynbaýyna bolady.

«Búgingi tańda qujattyń túpnusqasyn usyna almaıtyndarǵa arnalǵan qyzmet Beeline uıaly baılanys operatorynyń qyzmet kórsetý ortalyqtarynda qoljetimdi. Bul úshin klıenttiń smartfonynda elektrondy úkimettiń qosymshasy eGov mobile bolýy kerek», delingen habarlamada.

Mınıstrliktiń túsindirýinshe, tsıfrlyq qujattardy qoldaný úshin eGov mobıldi qosymshasyn júktep alyp, ashý qajet. Sodan keıin, qyzmetter qoıyndysynda «Tsıfrlyq qujattar» bólimin tańdap, avtorızatsııadan ótý kerek. Qosymshaǵa bıometrııa nemese bir rettik SMS qupııa sózi arqyly qosylýǵa bolady. Avtorızatsııadan keıin ashylǵan terezede jeke kýálikti tańdap, «ruqsatty ashý» batyrmasyn basý kerek

Protsedýrany oryndaý úshin Beeline uıaly baılanys operatorynyń menedjeri QR kodyn skanerleıdi jáne bıometrııalyq derekter arqyly klıenttiń jeke basyn kýálandyrady.

«Memlekettik qyzmetterdi kórsetýdegi yńǵaılylyq, qaýipsizdik jáne tıimdilik búginde bizdiń basymdylyq bolyp tabylady. Buǵan deıin keıbir qalalardyń bankteri men áýejaılary tsıfrlyq qujattardy qabyldaı bastady, búginde bul fýnktsııa bir uıaly baılanys operatorynda qoljetimdi, alaıda mınıstrlik barlyq qaýipsizdik parametrlerine sáıkes keletin iri kompanııalar men uıaly baılanys operatorlary úshin ashyq», - dedi QR tsıfrlyq damý, ınnovatsııalar jáne aeroǵarysh ónerkásibi mınıstri Baǵdat Mýsın.

Qazirgi ýaqytta tsıfrlyq qujattar qyzmetinde 18 qujat tirkelgen, olardyń ishinde eń tanymaldary: jeke kýálik, júrgizýshi kýáligi, ekpe tólqujaty, PTR synaǵy jáne týý týraly kýálik.

Buǵan deıin qazaqstandyqtar tsıfrlyq qujattardy áýejaı, temirjol vokzalyndaǵy vagondarda, bank pen notarıýs qyzmetterine júgingen kezinde paıdalanýǵa múmkindik aldy.


Joǵary qaraı