Aýa raıy
Astana +7 °S
Almaty +14 °S
valıýta baǵamy
USD 421.58
EUR 496.83
RUB 5.53
CNY 62.20

Elektrondy UBT: Nátıjeni testileý aıaqtalǵannan keıin birden bilýge bolady

2021 jyldyń 6 mamyr 2021 18:32

NUR-SULTAN. QazAqparat - Búgin elimizde Ulttyq biryńǵaı testileý bastaldy. UBT nátıjelerimen memlekettik bilim berý grantyn taǵaıyndaý konkýrsyna qatysýǵa bolady. Testileý tolyǵymen elektrondy formatta júrgizilip jatyr, dep habarlaıdy QazAqparat BǴM baspasóz qyzmetine silteme jasap.

Mınıstrliktiń habarlaýynsha, UBT-ǵa qatysý úshin 120 myńnan astam adam tirkelgen, onyń ishinde birinshi kúni testileýdi 8 myńnan astam túlek tapsyryp jatyr.

Talapkerler UBT-ny 2 ret tapsyra alady, olar testileýdiń kúni men ýaqytyn ózi tańdaıdy. Memlekettik bilim berý grantyn taǵaıyndaý konkýrsyna qatysý úshin oqýǵa túsýshi eń joǵary upaıy bar sertıfıkatyn usyna alady. Bul úmitkerlerdiń grantty jeńip alý múmkindigin aıtarlyqtaı arttyra túspek.

«2019 jyly Memleket basshysy Qasym-Jomart Kemeluly ózi qatysqan Tamyz keńesinde tapsyrma bergen bolatyn. Ulttyq biryńǵaı testileýdi ózgertý, ony balalarǵa yńǵaıly ári barynsha ashyq ótkizý boıynsha maqsat qoıylǵan bolatyn. Biz búgin osy maqsatqa jetip, UBT-ny jańa formatta ótkizip jatyrmyz. Eń bastysy, qoǵamda aıtylyp júrgen syn-pikirlerdi eskerip, jańa tehnologııalardy qoldana otyryp, úlken ózgerister jasap jatyrmyz», – dedi Bilim jáne ǵylym mınıstri Ashat Aımaǵambetov.

Elektrondy format ashyqtyqty barynsha qamtamasyz etýge, qatysýshylarǵa qolaıly jaǵdaı jasaýǵa kómektesedi. Bul formattyń taǵy bir artyqshylyǵy – UBT nátıjelerin testileý aıaqtalǵannan keıin birden bilýge bolady. Jınalǵan upaı sany ekranǵa shyǵarylady. Sondaı-aq UBT qatysýshysy qate jaýap bergen suraqtardy kóredi. UBT qorytyndylarymen kelispegen jaǵdaıda talapker kelesi kúndi kútpeı-aq birden apellıatsııaǵa ótinish bere alady.

«Endi UBT elektrondyq formatta ótip jatyr. Buǵan deıin balalar qaǵaz júzinde test kitapshalaryn alyp, odan keıin tıisti paraqtarda jaýaptardy boıaý arqyly tapsyratyn. Test kitapshalaryn basyp shyǵartynbyz, ol kitapshalar jetkenge deıin ártúrli táýekelder de bolatyn. Ekinshiden, 2 myńǵa jýyq kezekshi muǵalim jazda bir óńirden ekinshi óńirge jiberiletin, oǵan úlken qarajat bólinetin jáne bul rette de ártúrli táýekelder bolatyn. Úshinshiden – bul ashyqtyq. Qazir kórip otyrsyzdar, ár ata-ana balasynyń qalaı tapsyryp jatqanyn onlaın baqylaı alady. Ár balada bir kompıýter, bir beınekamera bar, proktorıng júıesi arqyly baqylaý júrgizilip jatyr. Sondyqtan kóshirip alý degen sııaqty akademııalyq adaldyq qaǵıdalaryn buzýǵa eshqandaı múmkindik joq. Taǵy da bir óte mańyzdy másele, buryn balalar testti bir-aq ret tapsyryp, sonyń nátıjesi boıynsha grantqa konkýrsqa qatysa alatyn. Qazir balalarda eki múmkindik bar. Bir ret tapsyryp kóredi, eger alǵan nátıjesi unamasa, ekinshi márte qaıta tapsyryp, sol sertıfıkatpen konkýrsqa qatysa alady. Bul da – úlken jańalyq», – dedi mınıstr Ashat Aımaǵambetov.

Jalpy UBT pánderiniń sany ózgerissiz qaldy – úsh mindetti pán jáne ekeýi tańdaý boıynsha. Test tapsyrmalarynyń sany – 120, onyń ishinde Qazaqstan tarıhy boıynsha – 15, matematıkalyq saýattylyq – 15, oqý saýattylyǵy – 20 jáne eki beıindik pán boıynsha 35 tapsyrmadan. Testileýge jalpy 4 saǵat (240 mınýt) beriledi. UBT-ǵa qatysýshylardyń maksımaldy 140 ball jınaý múmkindigi bar.


Joǵary qaraı