Aýa raıy
Astana +7 °S
Almaty +14 °S
valıýta baǵamy
USD 421.58
EUR 496.83
RUB 5.53
CNY 62.20

Elbasy TúrkPA-nyń X plenarlyq otyrysynyń qatysýshylaryna quttyqtaý joldady

2021 jyldyń 28 qyrkúıek 2021 12:10

NUR-SULTAN. QazAqparat - Qazaqstannyń Tuńǵysh Prezıdenti, Elbasy Nursultan Ábishuly Nazarbaev Túrkistan qalasynda ótip jatqan Túrkitildes memleketterdiń Parlamenttik Assambleıasynyń (TúrkPA) mereıtoılyq X plenarlyq otyrysynyń qatysýshylaryna quttyqtaý hat joldady, dep habarlaıdy Májilistiń baspasóz qyzmeti.

Quttyqtaý hatty jınalǵandar aldynda Májilis Tóraǵasy Nurlan Nyǵmatýlın oqyp berdi.

Óz quttyqtaýynda Elbasy búgingi mereıtoılyq basqosý qazaq halqynyń kıeli besigi men boıtumary, túrki áleminiń rýhanı astanasy, babalarymyzdan qalǵan kóne shahar - qasıetti Túrkistanda ótip otyrǵanyna qýanyshty ekenin aıtty.

- Biz jańa táýelsiz memleketter óz tarıhynyń bastapqy kúnderinen-aq túbiri ortaq til, mádenıet pen salt-dástúrge negizdeletin, sondaı-aq barlyq baýyrlas elderge dáneker bolatyn erekshe baılanystyń bar ekenin anyq túsindik. Degenmen, aldymyzda jańa mańyzdy maqsat-murattar tur. Olardyń barlyǵyna da qol jetkizetinimizge senimdimin. Bul rette, túrkilerdiń keń baıtaq dalasynda ózara yqpaldastyqty damytý úshin árdaıym erik-jiger men batyldyq tanytyp otyrýymyz qajet. Túrkitildes memleketterdiń parlamentshileri osy bir kúrdeli iske óziniń eleýli úlesin qosatynyna kámil senemin. Jalpy túrkitildes elder Parlamenttik Assambleıasynyń mereıtoılyq plenarlyq otyrysy halyqtarymyzdyń ózara dostyǵy men árekettestigin odan ári nyǵaıtýǵa qosymsha serpin beredi dep oılaımyn, - delingen quttyqtaý hatta.

Sondaı-aq, Qazaqstannyń Tuńǵysh Prezıdenti N.Á.Nazarbaev túrkitildes memleketterdiń yntymaqtastyǵy keńesiniń qurmetti tóraǵasy retinde qoldaý kórsetip, qolǵabys jasaýǵa árqashan ázir ekenin atap ótti.

Sońynda Elbasy jıynǵa qatysýshylardyń bárine sáttilik pen bar jaqsylyqty tiledi.


Joǵary qaraı