Aýa raıy
Astana +7 °S
Almaty +14 °S
valıýta baǵamy
USD 421.58
EUR 496.83
RUB 5.53
CNY 62.20

Elbasy Nursultan Nazarbaevtyń tóraǵalyǵymen Qaýipsizdik Keńesiniń otyrysy ótti

2021 jyldyń 3 aqpan 2021 19:34

NUR-SULTAN. QazAqparat - Qazaqstan Respýblıkasynyń Tuńǵysh Prezıdenti – Elbasy Nursultan Nazarbaevtyń tóraǵalyǵymen Qaýipsizdik Keńesiniń otyrysy ótti, dep habarlaıdy QazAqparat Elbasynyń resmı saıtyna silteme jasap.

Jıynda Qazaqstan Respýblıkasynyń 2021-2025 jyldarǵa arnalǵan Ulttyq qaýipsizdik strategııasynyń negizgi baǵyttary, sondaı-aq Qarýly kúshterdi qaıta jaraqtandyrý men qorǵanys ónerkásibin damytý josparlary qaraldy.

Jıyndy ashqan Qaýipsizdik Keńesiniń Tóraǵasy búgingi tańda basqa eldermen qatar Qazaqstan da qaýipsiz ortanyń sapalyq ózgerý kezeńine qadam basqanyn atap ótti.

– Biz birtutas memleket jáne ult retinde betburys kezeńine kelip jettik. Bul ózgeriske koronavırýs pandemııasy túrtki boldy. Onyń áseri aldaǵy onjyldyqqa sozylýy múmkin. Qazirdiń ózinde ulttyq qaýipsizdikke qatysty qalyptasqan syn-qaterler transformatsııaǵa ushyrap, assımetrııalyq ári gıbrıdtik qaterler týyndap jatyr, – dedi Elbasy.




Nursultan Nazarbaev Qazaqstan Respýblıkasy men qazaqstandyq qoǵamnyń qazirgi jaǵdaılarǵa jaýap bere alatyn jańa ulttyq qaýipsizdik arhıtektýrasyn jasaý qajettigin atap ótti.

– Ekonomıkalyq, tehnologııalyq, áleýmettik ahýal men syrtqy jaǵdaılar qalaı ózgerse de, bizdiń eshqashan myzǵymaıtyn ulttyq múddelerimiz bar. Bul – Qazaqstannyń egemendigi, aýmaqtyq tutastyǵy, birlik, saıası turaqtylyq, azamattardyń ál-aýqaty jáne áleýmettik ádildik. Ulttyq qaýipsizdik strategııasy osy qundylyqtardy qorǵaýǵa, bıyl 30 jyldyǵyn atap ótip jatqan Táýelsizdigimizdi nyǵaıtýǵa negizdelgen, – dedi Qazaqstannyń Tuńǵysh Prezıdenti.

Kún tártibindegi birinshi máseleni talqylaý barysynda Prezıdenttiń Kómekshisi – Qaýipsizdik Keńesiniń Hatshysy Á.Isekeshev jańa Strategııanyń negizgi baǵyttaryn tanystyrdy. Onda qamtylǵan sharalarǵa táýekelderdi basqarýdyń zamanaýı ádisteri basshylyqqa alynyp, ulttyq qaýipsizdik teńgerimdi áleýmettik-ekonomıkalyq jáne qoǵamdyq-saıası damýmen berik baılanysqan.




Nursultan Nazarbaev bıologııalyq qaýipsizdik máselesi kún tártibinen uzaq ýaqytqa deıin túspeıtinine nazar aýdardy, sebebi ınfektsııalyq jáne basqa da aýrýlar jahandyq syn-qaterlerge aınaldy. Osyǵan oraı Elbasy bıologııalyq qaýipsizdik pen qoǵamdyq densaýlyq saqtaý salasyndaǵy basty qaýip-qaterlerge toıtarys berý úshin tıimdi sharalardyń mańyzdylyǵyn atap kórsetti.

– Endi densaýlyq saqtaýǵa ulttyq qaýipsizdik pen áleýmettik turaqtylyqtyń negizgi komponenti retinde qaraý kerek. Pandemııa kezinde áleýmettik-ekonomıkalyq tejelister bolady. Ol – birinshi kezekte, halyqtyń tabysynyń azaıýy, óńirlerdiń, salalardyń, qalalar men aýyldardyń arasyndaǵy teńsizdikterdiń ósýi. Bul baǵytta maqsatty túrde jumys isteý kerek. Áleýmettik turǵydan az qamtylǵan turǵyndarǵa keshendi qoldaý kórsetý qajet, – dedi Qaýipsizdik Keńesiniń Tóraǵasy.

Nursultan Nazarbaev ekonomıkalyq qaýipsizdikti, kıberqaýipsizdikti, aqparattyq qaýipsizdik pen adamı kapıtaldyń qaýipsizdigin qamtamasyz etý máselelerine erekshe nazar aýdardy.

– Naǵyz qaýip – mıneraldy-shıkizat resýrstary baǵasynyń quldyraýy emes, ulttyń ıntellektýaldyq áleýetiniń tómendeý qaýpi. Bul, birinshi kezekte, bilim berýge qatysty. Biz osy sala boıynsha damyǵan elderden áli artta kelemiz. Bilim men ilim taıaý onjyldyqta bizdiń ulttyq ıdeıamyz bolýy kerek, – dep atap ótti Elbasy.

Sonymen qatar Elbasy ulttyq qaýipsizdiktiń dástúrli túrleri – syrtqy jáne áskerı qaýipsizdikke toqtaldy. Mundaǵy negizgi syn-qaterler syrtqy kúshterdiń ózara teketiresine, Ortalyq Azııa men onyń tóńireginde turaqsyz aımaqtardyń qurylý múmkindigine, terrorıstik, radıkaldy, qylmystyq jáne basqa da iritki salýshy kúshterdiń óńirde shoǵyrlanýyna baılanysty.




Talqylaý qorytyndysy boıynsha otyrysqa qatysýshylar Qazaqstan Respýblıkasynyń jańa Ulttyq qaýipsizdik strategııasynyń tujyrymdyq ustanymdaryn maquldady.

Sondaı-aq, talqylaý barysynda Qazaqstan Respýblıkasynyń áskerı qaýipsizdigin laıyqty qamtamasyz etýge tıis Qarýly kúshterdi damytý máseleleri qaraldy.

Elbasy jańa tehnologııalar engizýdi jáne qarý-jaraq pen áskerı tehnıka óndirisindegi tehnologııalyq progresti esepke ala otyryp, qarýly kúshterdi jetildirý qajettigine de toqtaldy.

– Qarýly kúshterdi 2030 jylǵa deıin qaıta jaraqtandyrý jáne qorǵanys ónerkásibin damytý tujyrymdamasy armııany jabdyqtaýdyń uzaq merzimge arnalǵan tásilderin aıqyndaıdy jáne jańa tehnologııalyq syn-qaterlerge saı keledi. Otandyq qorǵanys ónerkásibi – qorǵanys qabiletiniń mańyzdy bóligi, ol Qarýly kúshterdiń suranysyna baǵyttalǵan, – dedi Qazaqstannyń Tuńǵysh Prezıdenti.

Otyrys qorytyndysy boıynsha Nursultan Nazarbaev Qarýly kúshterdiń, basqa áskerler men kúshtik qurylymdardyń áskerı daıyndyq deńgeıin kóterýge, aýmaqtyq qorǵanys kúshterin nyǵaıtýǵa baǵyttalǵan birqatar naqty tapsyrma berdi.


Joǵary qaraı