Aýa raıy
Astana -18 °S
Almaty 1 °S
valıýta baǵamy
USD 421.58
EUR 496.83
RUB 5.53
CNY 62.20

Elbasy Qazaqstanyń EQYU-ǵa tóraǵalyǵy jaıynda pikir bildirdi

2021 jyldyń 19 aqpan 2021 16:37

NUR-SULTAN. QazAqparat – QR Tuńǵysh Prezıdenti – Elbasy Nursultan Nazarbaev «EQYU-nyń Astana sammıti 2010: Tarıhı máni men ózektiligi» atty halyqaralyq onlaın konferentsııaǵa qatysýshylarǵa quttyqtaý joldady. Quttyqtaýdy Elbasynyń keńesshisi – QR Tuńǵysh Prezıdenti keńsesi Aqparattyq-saraptamalyq qamtamasyz etý bóliminiń meńgerýshisi Ádil Tursynov oqyp berdi, dep habarlaıdy QazAqparat tilshisi.

«Astana qalasynda 2010 jylǵy jeltoqsanda ótken Eýropadaǵy qaýipsizdik jáne yntymaqtastyq uıymy sammıtiniń 10 jyldyǵyna arnalǵan halyqaralyq konferentsııanyń qatysýshylaryna ystyq yqylasymdy bildiremin. Atalǵan joǵary deńgeıdegi kezdesý Eýropa, Ortalyq Azııa jáne Soltústik Amerıkadaǵy 57 memleketti biriktiretin iri ári mańyzdy transqurlyqtyq uıym EQYU-daǵy Qazaqstan Respýblıkasy tóraǵalyǵynyń asa aıtýly oqıǵalarynyń biri boldy. Ózderińiz biletindeı, Uly dala eli postkeńestik keńistikte EQYU-ny basqarý mártebesine ıe bolǵan alǵashqy memleket», - dedi QR Tuńǵysh Prezıdenti.

Elbasy Qazaqstannyń EQYU-ǵa tóraǵalyǵyna ótinim berý isin ilgeriletýmen tikeleı ózi aınalysqanyn basa atap ótedi.

«Eń aldymen, uıym róline baıypty taldaý júrgizip, onyń bolashaǵyn somdaý úshin bizdiń eldiń halyqaralyq arenadaǵy jaýapty ári beıbitsúıgish saıasaty arqyly ortaq jaǵdaı jasaı alatyn qabiletin eskerdim. Ekinshiden, EQYU-daǵy tóraǵalyq sol ýaqyttyń ózinde eleýli jetistikterge qol jetkizip úlgergen Qazaqstandy demokratııalyq jáne ekonomıkalyq turǵydan odan ári jańǵyrtýǵa jańa serpin beretindigin oıladym. Úshinshiden, uıymǵa basshylyq etken jyly bizdiń qyzmetimiz zor sımvoldyq mańyzǵa ıe boldy. 35 jyl buryn EQYU-nyń negizin qalaǵan qujat Helsınkı qorytyndy aktisine jáne 20 jyl buryn jańa Eýropaǵa arnalǵan Parıj hartııasyna qol qoıyldy», - dedi Nursultan Nazarbaev.

QR Tuńǵysh Prezıdenti osy jaıttar eskerilip, tórt «T» - Senim (Trust), Dástúr (Tradition), Ashyqtyq (Transparency), Tózimdilik (Tolerance) Qazaqstannyń EQYU-ǵa tóraǵalyǵynyń uranyna aınalǵanyn atap ótti.

«Menińshe, 2010 jyly bizdiń el uıymnyń barlyq negizgi úsh ólshemi – áskerı-saıası, ekonomıkalyq-ekologııalyq jáne gýmanıtarlyq ólshemderi boıynsha belsendi ári úılestirilgen jumys júrgizýge baǵyttalǵan óz qyzmetiniń baǵdarlamasyn tabysty iske asyrdy», - dedi Elbasy.


Joǵary qaraı