Aýa raıy
Astana -7 °S
Almaty 4 °S
valıýta baǵamy
USD 421.58
EUR 496.83
RUB 5.53
CNY 62.20

Eki balany qutqaryp, ózi ómirden ótken qyzylordalyq marapattaldy

2020 jyldyń 28 qazan 2020 03:49

QYZYLORDA. QazAqparat - Qyzylorda oblysynyń Qarmaqshy aýdanynda óz densaýlyǵynyń dimkástigine qaramastan, eki balany sýdan qutqaryp, keıinnen ómirden ótken Egeýbaı Elpanovtyń ata-anasyna vedomstvolyq medal tabystaldy, dep habarlaıdy QazAqparat tilshisi.

Oqıǵa bıylǵy jyldyń maýsym aıynda boldy. Densaýlyǵyna baılanysty taza aýada serýendep júrgen E.Elpanov darııa aýmaǵynan balalardyń janushyra aıǵaılaǵan daýysyn estıdi. Ol eshbir oılanbastan sý betine birde shyǵyp, birde batqan eki balany qutqarýǵa asyqty. Alǵashqy súńgigende olardyń bireýin taba almaǵan. Taǵy bir márte áreket etkende sýdyń tereń tusynan bir bala qolyna ilikti. Ekinshisi Egeýbaıdyń beline jarmasty. Osylaısha ol eki balany aman-esen jaǵalaýǵa alyp shyqty. Sý jutqan olardyń bireýine alǵashqy kómek kórsetken.

«Sol sátte Egeýbaıdyń densaýlyǵy qaıtadan syr bere bastaǵan. Arada úsh kún ótkende eki búıregi kúrt nasharlap, ómirden ótti. Ózine ajal tónip tursa da jaýqazyn qos ǵumyrdy aman saqtap qalǵan onyń erligin kózsiz batyrlyq deýge ábden bolady», - dedi jerlesi Qýanysh Tóreev.

Elimizdiń Tótenshe jaǵdaılar mınıstrliginiń buıryǵymen oǵan «Sýǵa batqandy qutqarǵany úshin» medali berildi. Atalǵan nagrada onyń ata-anasyna tabys etildi.


Avtor Ádiljan Úmbet
Basty sózder: Aımaq, Qyzylorda oblysy, Qoǵam,
Joǵary qaraı