Aýa raıy
Astana +7 °S
Almaty +14 °S
valıýta baǵamy
USD 421.58
EUR 496.83
RUB 5.53
CNY 62.20

DSM temeki jarnamasyn baqylaýǵa almaqshy

2021 jyldyń 2 jeltoqsan 2021 13:03

NUR-SULTAN. QazAqparat – QR Densaýlyq saqtaý mınıstrligi 2021-2025 jyldarǵa arnalǵan «Deni saý ult» ulttyq jobasynyń aıasynda temeki jarnamasyn baqylaýǵa alýdy josparlap otyr, dep habarlaıdy QazAqparat tilshisi.

Bul týraly vedomstvonyń baspasóz qyzmeti QazAqparat joldaǵan saýalǵa joldaǵan jaýabynda málim etti.

«Ulttyq jobanyń 4-baǵytyndaǵy «Salaýatty ómir saltyn ustanatyn halyqtyń úlesin arttyrý jáne buqaralyq sportty damytý» is-sharalaryn júzege asyrý úshin 1 mlrd 561 mln teńge kóleminde qarajat qarastyrylǵan», - dep jazylǵan jaýapta.

Aıtýlarynsha, bul qarajat mynadaı 11 baǵyt boıynsha ıgerilmek:

1) Dúnıejúzilik densaýlyq saqtaý uıymynyń «STEPS» ádistemesi boıynsha ınfektsııalyq emes aýrýlardyń táýekel faktorlarynyń taralýyn aıqyndaıtyn zertteý júrgizý, táýekel faktorlarynyń taralýyn taldaý jáne sharalar qabyldaý;

2) Halyqtyń urpaqty bolý densaýlyǵy týraly aqparatqa qol jetkizýin keńeıtý;

3) «Salaýatty qalalar, óńirler» jobasyn engizý;

4) «Densaýlyqty nyǵaıtýǵa yqpal etetin mektepter» jobasyn engizý;

5) «Salaýatty ýnıversıtetter» jobasyn engizý;

6) Mektepke deıingi jáne mektep jasyndaǵy balalarǵa arnalǵan «Salamatty músin», «Salamatty kórý» baǵdarlamalaryn ázirleý jáne engizý;

7) Alkogol jáne esirtki boıynsha eýropalyq mekteptik zertteý jobasynyń ádisnamasy boıynsha jastar arasynda psıhobelsendi zattardy (PBZ) qoldaný boıynsha zertteý júrgizý, keıinnen PBZ-ǵa táýeldi jastardy tartý táýekelderiniń aldyn alý jáne dıagnostıkalaý baǵdarlamalaryn ázirleý jáne engizý;

8) Salaýatty ómir saltynyń jańa qaǵıdattaryn ilgeriletý úshin «E-SÓS» elektrondyq platformasyn qurý;

9) Halyqtyń densaýlyq máseleleri boıynsha saýattylyǵyn arttyrý, onyń ishinde: BAQ pen áleýmettik jelilerde salaýatty ómir saltyn nasıhattaý jáne densaýlyqty qorǵaý jónindegi telejobalardy iske asyrý;

10) Іske asyrylyp jatqan is-sharalardy baǵalaý úshin 13-15 jastaǵy balalar men eresekterge temeki ónimderin tutyný týraly Global Youth Tobacco Study jáne Global Adult Tobacco Study stardarty boıynsha jahandyq saýalnama júrgizý;

11) Temeki ónimderin tutynýdy qysqartý jónindegi sharalar keshenin iske asyrý. Bul baǵyt boıynsha qoǵamda 100% tútinsiz ortany engizý, jarnamany baqylaý, qoǵamdyq oryndarda temeki shegýge tyıym salý kózdelgen.

«Sonymen qatar, atalǵan is-sharalardy iske asyrý úshin Salaýatty ómir saltynyń profılaktıkasyn damytýdyń Jol kartasy ázirlenýde.

Bul óz kezeginde qazaqstandyqtardyń ómir súrý uzaqtyǵynyń artýyna, ınfektsııalyq emes aýrýlardan syrqattanýshylyqtyń tómendeýine, azamattardyń eńbekke qabilettiliginiń artýyna jáne múgedektiktiń tómendeýine yqpal etedi», - dep jazylǵan vedomstvonyń jaýabynda.


Joǵary qaraı