Aýa raıy
Astana +7 °S
Almaty +14 °S
valıýta baǵamy
USD 421.58
EUR 496.83
RUB 5.53
CNY 62.20

Dınara Zákıeva: Áleýmettik jelige qarsy emespiz, balalardyń qorǵalýyn jaqtaımyz

2021 jyldyń 17 qyrkúıek 2021 10:38

NUR-SULTAN. QazAqparat – Májilis depýtaty Dınara Zákıeva elimizdiń keıbir zańnamalyq aktilerine balanyń quqyqtaryn qorǵaý máseleleri boıynsha engiziletin normalardy túsindirdi, dep habarlaıdy QazAqparat tilshisi.

«Keshe bala quqyǵyn qorǵaý máseleri jónindegi zań jobasy birinishi oqylymda maquldandy. Árıne, normalary ekinshi oqylymǵa deıin áli talqylanady. Atalǵan zań jobasynda tipti aýyldyq jerlerge deıin qajettiligi bar balalardy ońaltýmen qamtýǵa, sýıtsıdtiń aldyn alýǵa, mektepterde býllıngtiń aldyn alýǵa, balama kitaptarmen qamtýǵa baǵyttalǵan óte mańyzdy bastamalar kózdelgen», - dep jazdy Májilis depýtaty Facebook -te.

Onyń atap ótýinshe, zań jobasynda jetim jáne ata-anasynyń qamqorlyǵynsyz qalǵan balalardy sábıler úıinen balalar úıine aýystyrý jasyn 3-ten 6 jasqa deıin uzartý kózdeledi.

«Degenmen, búginde eń kóp talqylaýǵa túskeni kıberbýlıngtiń aldyn alý týraly norma bolyp tur. Jekelegen qoǵam ókilderi tipti qujatty «Sarym-Zákıeva túzetýi» dep ataýdy usynyp, aty-jónderimizde este saqtaýǵa ýáde berip júr. Eger bul bir balanyń ómirin qorǵap qalatyn bolsa, onda men kelisemin. 10 jyl boldy balalarǵa kómektesýmen aınalysyp kelemin. Qýdalaý, kıberbýllıng sýıtsıd sebebi bolýy jıilep ketti. Osy jyldyń 6 aıynda ǵana 193 bala óz-ózine qol jumsamaq bolyp, 105 qaıǵyly aıaqtaldy», dedi ol.

Onyń atap ótýinshe, kıberbýllıng óte qorqynyshty. Sebebi onyń shekarasy joq. Qaskóıden qashyp qutyla almaısyń. Internettegi muqtaýdy óshirip tastaý nemese umytý da ońaı emes.

«Osyǵan oraı búginde barlyǵy da áleýmettik jelige nazar aýaryp otyrǵany qatty jabyrqatady. Qyzyq, búginde áleýmettik jeli jaıynda oılap, narazylyq tanytyp júrgender mundaı jaıt balalaryna qatysty bolǵan kezde qalaı áreket jasar eken?», - dedi Dınara Zákıeva.

Máselen, onyń dereginshe, osy jyldyń ishinde Aqparat mınıstrligi kıberbýllıngtiń 140 myń faktisin anyqtap, kompanııalarǵa 1 700 ótinim jibergen. Alaıda olardyń tek 20-30 paıyzynda ǵana atalǵan kompanııalar áreket jasaǵan.

«Usynylyp otyrǵan túzetýge sáıkes, Qazaqstandaǵy platforma ókildigi elimizdiń kez kelgen azamaty shaǵyn jasaǵan jaǵdaıda kıberbýllıng faktileri tekserilgennen keıin 24 saǵattyń ishinde balaǵa zııanyn tıgizýi múmkin aqparat bar kontentti joıýǵa mindetti bolady. Birinshiden, iri kompanııalar úshin ókildik ashý problema bolmaıdy. Ekinshiden, eger demokratııa jaıynda aıtar bolsaq, bul máselen, Frantsııa, Germanııa syndy kóptegen elderde qoldanylatyn álemdik tájirıbe. Bul túzetýler barlyq memlekettik organmen qarastyrylǵandyǵyn, kıberbýllıngten balany qorǵaý máseleleri jónindegi jumys toby aıasynda Úkimet tarapynan usynylǵandyǵyn atap ótkim keledi. Jáne de biz qoldap, olardy engizdik. Óıtkeni, áleýmettik jelilerde balany qorǵaý quraly búginde joq ekendigin túsinemiz. Biz áleýmettik jelige qarsy emespiz. Biz balalardy qorǵaýdy jaqtaımyz. Balalar – eldiń basty baılyǵy. Bizde este saqtaımyz degenderge aıtarym, jalǵan demokratııalyq ustanymdardy jamylyp, balalardy qorǵaýǵa qarsy bolǵandardy umytpaıdy», - dedi Májilis depýtaty.


Joǵary qaraı