Aýa raıy
Astana 15 °S
Almaty 19 °S
valıýta baǵamy
USD 412.55
EUR 468.66
RUB 5.79
CNY 58.80

Dımash Qudaıbergen: Qazirgi mindet - aýyryp jatqandardy aman alyp qalý

2020 jyldyń 13 shilde 2020 01:10

NUR-SULTAN. QazAqparat – Ánshi Dımash Qudaıbergen Jalpyulttyq aza tutý kúnine oraı Instagram-paraqshasynda pikir bildirip, halyqty uly murat jolynda jumylýǵa shaqyrdy, dep habarlaıdy QazAqparat tilshisi.

«Ókinishke qaraı, kúlli álemdi sharpyǵan pandemııa Qazaqstandy da aınalyp ótpedi. Qanshama otbasy qara jamyldy. Kún saıyn men tanıtyn, tanymaıtyn qanshama adam ómirden ótip jatyr. Bul netken qasiret edi... Qazir júregi bar adamnyń tynysh uıyqtaýy múmkin emes...» - dep jazdy ánshi.

Dımash óz sózinde qazirgi mindet - aýyryp jatqandardy aman alyp qalý ekendigin aıtady.

«Búgin - Aza tutý kúni! Osy indettiń kesirinen qaıtys bolǵan barlyq adamdy jaratýshy ıemiz panasyna alǵaı! Marqumdardyń týǵan-týystaryna sabyr tileımin. Biz olardy, myna qaraly kúnderdi eshqashan umytpaımyz. Qazirgi mindet – aýyryp jatqandardy aman alyp qalý. Árbir adam úshin kúresýimiz kerek. Bárimiz osy uly murat jolynda jumylýymyz qajet. Tezirek indet aıaqtalyp, mamyrajaı kúnderimiz qaıta keledi dep senemin. Endigi jerde Kók Baıraǵymyz eńkeımegeı!» - deıdi ánshi.

Eske sala ketsek, Qazaqstanda koronavırýs pandemııasynyń qurbany bolǵan azamattardy eske alýǵa baılanysty búgin - Jalpyulttyq aza tutý kúni. Nur-Sultan ýaqytymen saǵat 12:00-de búkil el boıynsha bir mınýttyq únsizdik jarııalanady.




Joǵary qaraı