Aýa raıy
Astana +7 °S
Almaty +14 °S
valıýta baǵamy
USD 421.58
EUR 496.83
RUB 5.53
CNY 62.20

Dıhan Qamzabekuly: «Eldiktiń jeti tuǵyryn» tııanaqtaý men tulǵalandyrý – jańa býynǵa amanat

2021 jyldyń 24 qarasha 2021 11:58

NUR-SULTAN. QazAqparat – «Eldiktiń jeti tuǵyryn» tııanaqtaý men tulǵalandyrý – jańa býynǵa amanat. Bul týraly L.N.Gýmılev atyndaǵy Eýrazııa ulttyq ýnıversıtetiniń prorektory, QR UǴA akademıgi Dıhan Qamzabekuly aıtty, dep habarlaıdy QazAqparat tilshisi.

«El damýy da, qoǵamdyq-saıası damý da bir orynda turmaıdy. Ómirdiń ózindeı ózgeredi. Saralanyp salalanady, jańaryp jańǵyrady. Sondaı bir tarıhı jańarý bastamasyn 23 qazanda «Nur Otan» partııasy Saıası keńesiniń keńeıtilgen otyrysyna onlaın júıesinde qatysa otyryp kórdik. Sol kúni elordaǵy partııa fılıaly shańyraǵyna edáýir zııaly jınalǵan edi. Kóshbasshy N.Á.Nazarbaev: «Adamnyń ózgerýimen birge onyń sanasy, qunylyqtar týraly kózqarasy, álem men bolashaq jónindegi túsinigi ózgeredi. Álem transformatsııalanyp, onyń jyldamdyǵyna kóz ilespeıdi», - deı otyryp, sońǵy 30 jyldaǵy Qazaqstannyń bel-belesin baıyptap, eldik murat pen maqsattyń aldynda turǵan syn-qaterlerden aman ótýdiń jón-jobasyn ortaǵa saldy», - dedi QR UǴA akademıgi

Onyń atap ótýinshe, Elbasy jańǵyrýǵa múddeli «Nur Otan» partııasynyń 5 qaǵıdatyn naqtylady. Olar: ýaqytpen qatar qadam basý, halyq múddesin oılaý, nátıje jolyndaǵy naqty maqsat pen aıqyn jol, tastaı bereke-birlik, qoǵamdy el kókeıinen shyǵatyn qundylyqtarǵa uıystyrý.

«Osy bes «asyl istiń» máni – eldiń «kóılegin kók, tamaǵyn toq» etý. Týrasyn aıtsaq, ál-aýqatty, tegeýrindi Qazaqstannyń boıyn tikteý, bedelin kóterý. Elbasynyń myna oıy kókeıkesti estildi: «Táýelsizdikti saqtaý jáne memlekettilikti nyǵaıtý – bizdiń bolashaq urpaq aldyndaǵy paryzymyz». Álbette, muny áli talaı býyn aıtatyn bolady. Óıtkeni qazir de, bolashaqta da bul – eldik jáne otanshyldyq ólshemi retinde aıshyqtala beredi», - dedi Dıhan Qamzabekuly.

EUÝ prorektory osy oraıda Tuńǵysh Prezıdent buǵan deıin áleýmettanýshy, qoǵamtanýshy qaýym bajaılaı qoımaǵan bir tosyn paıymdy jarııa etti.

«Otyz jylda 9,5 mıllıonnan astam sábı dúnıege keldi. Olardyń aldyńǵy shebi orda buzar otyzǵa tolyp otyr. Bul – kózi ashyq, kókiregi oıaý, sanasy azat, oıy ozyq jańa býyn». Oılana qarasaq, shynynda osy san - halyqtyń teń jarymy eken-aý. Mine, atqarýshy bılikten de, zań shyǵarýshy bılikten de, sot júıesinen de, qaınaǵan qoǵamnan da jańarýdy, ádilettikti, shynaıylyqty, órkenıet álemimen qatar júrýdi tilep otyrǵan – osy jańa býyn. Olar aǵa býynnyń aınasynan ózin taba almaıdy. Tipti sol aınadan aǵa býynnyń ózi de jaqsylyqqa, jańalyqqa umtylyp, erteńge senip kúlimsirep tursa deıdi. Sózbuıda da, álem-jálem maqtaý men masattaný da, jalǵan esep pen jadaǵaı múláıimsý de – keshegi kún. Halyqtyń bir eski sózi bar: «Bir ótiriktiń artynda qyryq ótirik bolady» degen. Qoǵamnyń bul synyn «Nur Otan» partııasy tereńinen sezinedi dep oılaımyz», - dedi ol.

Dıhan Qamzabekuly Elbasy sol jıyndy joǵary bılik tansformatsııasynyń jańa kezeńi - «Nur Otan» partııasy tizgini el Prezıdenti qolynda bolýy kerektigin de qadap aıtqanyna nazar aýdartady.

«Bul rásimniń Jarǵy tártibine saı ózindik qatań reglamenti bolsa da, partııa damýynyń jańa belesi retinde jarııalanǵany qoǵamdy eleń etkizdi dep sanaımyz. Osy oraıda Nursultan Ábishuly «Máńgilik el» muratyn turlaýly etýdiń jeti tuǵyryn esimizge saldy. Olar: táýelsizdik, birilik pen kelisim, qasıetti jer, otbasy men salt-dástúr, ult mádenıeti, bilim men eńbek, pragmatızm. Elbasy muny «Eldiktiń jeti tuǵyry» dep atady. Álbette, bul tuǵyrdy tııanaqtaý men tulǵalandyrý – jańa býynǵa amanat. Túptep kelgende, bul – toǵyz mıllıonnyń elshildigi men kásibıligin anyqtaıtyn kórsetkish bolyp bekıtini sózsiz. Osy jolda bilim jáne ǵylym salasynyń aldynda zor memlekettik jáne qoǵamdyq mindetter tur. Muny kezeń-kezeńmen, júıesimen oryndaýda namysty, jaýapty azamattar aıanyp qalmaıdy dep oılaımyz», - dep túıindedi oıyn EUÝ prorektory


Joǵary qaraı