Aýa raıy
Nýr-Sýltan +7 °S
Almaty +14 °S
valıýta baǵamy
USD 449.85
EUR 485.43
RUB 5.71
CNY 70.69

Depýtat: Eýroparlament qabyldaǵan Qazaqstan jaıly qarar – asyǵys sheshim

2022 jyldyń 21 qańtar 2022 12:11

NUR-SULTAN. QazAqparat –Eýropa Parlamentiniń Qazaqstandaǵy ahýal týraly qarary mezgilinen buryn, asyǵys qabyldanǵan. Májilis depýtaty Zúlfııa Súleımenova osyndaı pikir bildirdi, dep habarlaıdy QazAqparat tilshisi.

«Biz qazir tergeý qorytyndysyn kútip otyrmyz. Sol tergeý nátıjesi jaǵdaıdy tereńirek ashyp, shyn máninde ne bolǵany týraly qosymsha aqparat pen túsinik qalyptastyrýy kerek. Sondyqtan Eýroparlamenttiń bul qararyn asyǵys sheshim dep esepteımin. Ókinishke qaraı, Eýropalyq Parlamenttegi áriptesterimizdiń bizben baılanyspaǵany shynymen de alańdatady. Mende Eýroparlament ókilderiniń adam quqyqtary jónindegi ýákildermen, qazir azamattardyń quqyqtaryn qorǵap júrgen azamattyq qoǵam ókilderne de habarlaspaǵany týraly málimet bar. Syrtqy ister mınıstrliginiń ustanymyn bildiretin aqparatta da solaı jazylǵan. Alaıda Syrtqy ister mınıstrligi bergen resmı aqparat eleýsiz qaldy. Osynyń bári túsiniksizdik týyndatyp otyr. Soǵan qaramastan, biz áli de kúsh salyp, qajetti dıalog ornata alamyz», - dedi Zúlfııa Súleımenova QazAqparat tilshisine.

Depýtat qańtar tragedııasy týraly qandaı da bir málimdeme jasamaı turyp eń aldymen jappaı tártipsizdikti tergeý qorytyndysyn kútý qajet dep oılaıdy.

«Biz Májilis depýtattary retinde osy máseleler boıynsha sheteldik áriptesterimizben dıalog júrgizýge daıynbyz», - dedi Zúlfııa Súleımenova.

Depýtattyń paıymdaýynsha, qararda kórinis tapqan birqatar máseleler boıynsha tergeýlerdiń qorytyndysyn kútý kerek.

«Bul sheshim merziminen buryn qabyldanǵanyn aıtýǵa májbúrmin. Óıtkeni ony qabyldaý kezinde paıdalanylǵan aqparat pen tujyrymdar áli naqytlanbaǵan. Tergeý qorytyndysyn negizge almaı jaǵdaıdy baǵalaý óte qıyn. Sonymen qatar, Eýroparlamentte de eldegi qaıǵyly oqıǵalardy tolyq baǵalaý úshin tergeý qorytyndysyn kútý qajet ekenin aıtqan jekelegen depýtattar boldy. Degenmen, keıbir depýtattar dálel jetkilikti dep sheshti», - deıdi Májilis ókili.

Sondaı-aq, Zúlfııa Súleımenova Qazaqstannyń adam quqyqtaryn saqtaýǵa barynsha múddeli ekenin eske saldy.

«Memleket basshysy da Qazaqstan adam quqyqtaryn qorǵaý jónindegi mindettemelerin berik ustanatynyn atap ótti. Sonymen qatar, Prezıdent usynǵan barlyq saıası reformalar jalǵasady. Adam quqyqtaryn birtindep demokratııalandyrý, jańǵyrtý jáne saqtaý baǵytyn elimiz myǵym ustanyp keledi. Bul - mańyzdy másele. Sóz joq, biz úshin adam quqyqtary, adam quqyqtaryn saqtaý, qoǵamdy demokratııalandyrý máseleleri kún tártibindegi eń mańyzdy taqyryp bolyp qala beredi», - dedi Májilis depýtaty.

Sýret: inbusiness.kz
Joǵary qaraı