Aýa raıy
Astana +7 °S
Almaty +14 °S
valıýta baǵamy
USD 421.58
EUR 496.83
RUB 5.53
CNY 62.20

Dárigerdiń boıynda shydamdylyq pen meıirim bolýy kerek - ortoped

2021 jyldyń 18 maýsym 2021 16:25

ALMATY. QazAqparat - Adam ómirine arasha túsetin dárigerlik mamandyqty tańdaý úlken jaýapkershilik júkteıdi. Sebebi dáriger adam anatomııasyn óte tereń bilýmen qatar, kez kelgen jaǵdaıdaǵa daıyn bolýy kerek. Qannan qoryqpaıtyn, adam taǵdyryna nemquraıly qaramaıtyn, kúızeliske tózimdi, júıkesi myqty jan bolýy qajet. Mundaı pikirdi almatylyq ortoped dáriger Bıbinur Pernebaeva bildirdi, dep habarlaıdy QazAqparat tilshisi.

QR Eńbek jáne halyqty áleýmettik qorǵaý mınıstrliginiń «Áleýmettik ońaltýdy damytýdyń ǵylymı-tájirıbelik ortalyǵy» sharýashylyq júrgizý quqyǵyndaǵy respýblıkalyq memlekettik kásipornynyń ortoped dárigeri Bıbinur Pernebaevanyń aıtýynsha, medıtsına salasy birneshe baǵytqa bólinedi.

«Jedel járdem mamandary táýliktiń kez kelgen ýaqytynda naýqasqa bastapqy dıagnozdy qoıyp, alǵashqy medıtsınalyq kómekti kórsetip, aýrýhanaǵa jetkizedi. Dáriger-terapevt naýqastyń taldamalaryn alyp, oǵan durys dıagnoz qoıyp, ony tolyq emdeýmen aınalysady. Naýqastyń jaǵdaıyn kúndelikti baqylap, qajetti emdik sharalardy qoldanady. Dáriger-hırýrg naýqastarǵa túrli dárejedegi ota jasap, ári qaraı da baqylap, qajetti em qoldanyp, olardyń tolyq saýyǵyp ketýin qamtamasyz etedi. Osy sııaqty kete beredi»,- deıdi ol.




Keıipkerimizdiń medıtsına salasyn tańdaýyna eń aldymen ata-anasy túrtki bolǵan.

«Bizdiń kezimizde mamandyq tańdaýda ata-ananyń róli erekshe bolatyn. Sol kisiler meniń medıtsına salasyn tańdaǵanymdy qalady. Meniń de armanym - dáriger bolý edi. ıAǵnı, ata-anammen oıym bir jerden shyqty. Bala kúngi armanyma qol jetkizý úshin alyp Almatyǵa keldim. S. J. Asfendııarov atyndaǵy Qazaq ulttyq medıtsına ýnıversıtetiniń emdeý fakýltetine oqýǵa túsip, ony oıdaǵydaı aıaqtadym. Alaıda, bul salaǵa birden aıaq bastym dep aıta almaımyn. Sebebi, densaýlyǵyma baılanysty birneshe jyl jumys istemedim. Keıin ózim bilim alǵan qarashańyraqtyń kóz emdeý kafedrasynda aǵa laborant bolyp jumys istedim»,- deıdi dáriger.

Keıin joǵaryda atalǵan mekemege ózine korset jasatý úshin kelip, osynda jumys isteýge bel býǵan.

«Men densaýlyǵyma baılanysty osy mekemege keldim. Naqtyraq aıtqanda, korset jasatý úshin. Sol kezde munda bilikti dárigerler kerek ekenin baıqadym. Sóıtip qaıta daıarlaý kýrsynan ótip, ortoped boldym. Osynda jumys istep jatqanyma segiz jyldan asty»,-deıdi ol.

Onyń aıtýynsha, ortoped dárigerine úlken jaýapkershilik júkteledi. Ómirden túńilip, kúızeliske ushyraǵan naýqastardy ońaltý, ómirge degen qushtarlyǵyn qaıta oıatý - ońaı sharýa emes.

«Máselen bizge aıaǵynan aıyrylǵan naýqastar keledi. ıAǵnı, protez saldyrýǵa. Sol protezdi saldyrmas buryn biz naýqasty qarap, olarǵa qandaı protez qajet ekenin kóremiz. Mysaly tizeden joǵary kesilse, ol - óte qıyn protsess. Desek te, barynsha yńǵaıly etip jasap berýge tyrysamyz. Sol sebepti dárigerler patsıentti aldymen bizge keńeske jiberedi. Biz onyń aýyrlyǵyna qaraı oz oıymyzdy aıtamyz. Árıne, shuǵyl operatsııa bolmaǵan jaǵdaıda. Munda naýqastar ómirden túńilip keledi. Ár naýqaspen jeke-jeke áńgimelesemiz, olardyń ómirge degen qushtarlyǵyn qaıta oıatýǵa tyrysamyz. Olarǵa protez salyp bergende balasha qýanady. Sony kórý - bizge úlken baqyt. Shynynda da biz naýqastarmen birge ýaıymdap, solarmen birge qýanamyz»,- deıdi Bıbinur Pernebaeva.

Tájirıbeli dárigerdiń pikirinshe, ortoped dárigerdiń boıynda eń aldymen shydamdylyq pen meıirim bolýy kerek.

«Úmiti úzilip kelgen naýqasty kúızelisten shyǵaryp, onyń jan dúnıesin túsine bilýi qajet. Psıhologııalyq turǵydan kómek kórsetý kerek. Osy jerde aıta keteıin, bizdiń elde ortoped dárigerleri tapshy, saýsaqpen sanarlyqtaı»,- dep oıymen bólisti dáriger.

Sóz sońynda, Bıbinur Pernebaeva barsha áriptesterin kele jatqan kásibı merekelerimen quttyqtady.

«Adam ómirine arasha túsetin dárigerlik mamandyqty tańdaý úlken jaýapkershilik júkteıdi. Sebebi, dáriger adam anatomııasyn óte tereń bilýmen qatar, kez kelgen jaǵdaıǵa daıyn bolýy kerek. Qannan qoryqpaıtyn, adam taǵdyryna nemquraıly qaramaıtyn, kúızeliske tózimdi, júıkesi myqty jan bolýy qajet. Meniń oıymsha, bizdiń medıtsına salasynda boıynda dál osyndaı qasıetteri bar adamdar jumys isteıdi. Men barsha medıtsına qyzmetkerlerin kásibı merekemen quttyqtaımyn. Denderine saýlyq, otbastaryna amandyq tileımin»,- dep qorytyndylady dáriger.


Avtor Alma Muqanova
Basty sózder: Almaty, Medıtsına,
Joǵary qaraı