Aýa raıy
Nýr-Sýltan +7 °S
Almaty +14 °S
valıýta baǵamy
USD 449.85
EUR 485.43
RUB 5.71
CNY 70.69

Darhan Myńbaı: Beıbit ómirdi qalpyna keltirý – ár azamattyń jaýapkershiligine baılanysty

2022 jyldyń 6 qańtar 2022 16:52

NUR-SULTAN. QazAqparat – Eldegi bolyp jatqan tótenshe oqıǵaǵa baılanysty QR Parlamenti Májilisiniń depýtaty Darhan Myńbaı óz pikirin bildirdi, dep habarlaıdy QazAqparat.

«Almatyda ne boldy? Adam nanǵysyz soıqan boldy. Kóptiń kóleńkesine tyǵylǵan sodyrtektester, adam keıpinde esirgen, elirgen, buqpantaılaǵan aıýandar buzyq oılaryn iske asyrdy. «Adam alasy ishinde» degendeı, qylmystyq tobyr lań saldy. Qıratýdan, jaıratýdan bastap, kisi sabaý, ózgeniń menshigine qol salý, bireýdiń múlkin tonaý, órteý, kózge túsken kúlli dúnıeniń kúlin kókke ushyrý agressııanyń aranyn ashyp kórsetti. Soǵysta emes, beıbit kúnde kóz jumý, zábir kórip, zardap shegý, bútindi búldirý, qaraqshylyqqa barý – naǵyz qylmys, keshirilmeıtin kúná. Qudaıdyń aldynda kúnáharlyq jasap, qarapaıym adamdardyń nalasyna qaldy. Jelilerde, telearnalarda kórsetilgendeı, ar soty arashalaı almaıtyn arsyzdyq, arandatýshylyq oryn aldy. Tótennen, bótennen kelgenge qarsy turar tosqaýyl birden tabyla ketpegeni de túrli oıǵa qaldyrǵany jasyryn emes», deıdi depýtat.

Sonymen qatar, ol qalyptasqan jaǵdaıdy der kezinde baqylaýyna alǵan el prezıdentiniń áreketine toqtalyp, konstıtýtsııalyq quzyretke saı sheshimder qabyldanǵanyn atap ótti.

«El tarıhynda buryn-sońdy bolmaǵan túbegeıli batyl qadamdy halyq birden qoldady. Elimizdiń tutastyǵy, halqymyzdyń taǵdyry, beıbit adamdar ómiriniń qaýipsizdigi qyl ústinde turǵanyn eskerte kelip, Memleket basshysy Qazaqstannyń bolashaǵy úshin basyn báıgege tigýge daıyn ekenin málimdedi. Tótenshe jaǵdaı jarııalap, áskerı jáne quqyq qorǵaýshy azamattardyń otansúıer isterine baǵa berip, olardy moraldyq jaǵynan myqty bolýǵa jigerlendirdi. Shetelde arnaıy daıyndalǵan elbuzarlar tarapynan jasalǵan shabýyl agressııalyq akt ekendigi de anyq aıtyldy. Iá, ózderiniń otany joq qaskóılerdiń aıaýshylyq seziminen jurdaı bolatyny belgili. Sondyqtan olardy da aıaýǵa bolmas. Beıbit ómirdi qalpyna keltirý dál búginde árbir laýazymdy tulǵanyń, memlekettik qyzmetshiniń, ár turǵynnyń, azamattyń jaýapkershiligine baılanysty. Bul halyqtyń ortaq talaby, shynaıy tilegi», - deıdi Darhan Myńbaı.


Joǵary qaraı