Aýa raıy
Astana -14 °S
Almaty -3 °S
valıýta baǵamy
USD 421.58
EUR 496.83
RUB 5.53
CNY 62.20

COVID-19: Qazaqstanda búgin Jalpyulttyq aza tutý kúni

2020 jyldyń 13 shilde 2020 00:00

NUR-SULTAN. QazAqparat – Qazaqstanda koronavırýs pandemııasynyń qurbany bolǵan azamattardy eske alýǵa baılanysty búgin - Jalpyulttyq aza tutý kúni. Nur-Sultan ýaqytymen saǵat 12:00-de búkil el boıynsha bir mınýttyq únsizdik jarııalanady.

Elimizde qalyptasqan ahýalǵa baılanysty halyqqa úndeý jasaǵan QR Prezıdenti Qasym-Jomart Toqaev 13 shildeni – Ulttyq aza tutý kúni dep jarııalaıtyny týraly málim etken bolatyn. Tıisti ókimge Memleket basshysy kelesi kúni qol qoıdy.

«Ár qazaq – meniń jalǵyzym» degendeı, Ár azamatymyzdyń qazasy meniń júregime qatty batady. Mynaý alapat indet aramyzdan talaı asyldarymyzdy julyp áketýde. Búginde qara jamylyp otyrǵan azamattardyń qaıǵylaryna ortaqtasyp, kóńil aıtamyn. Sol úshin 13 shildeni – Ulttyq aza tutý kúni dep jarııalaımyn. Biraq, bizdiń kúresimiz jalǵasa beredi», - dedi Qasym-Jomart Toqaev óz úndeýinde.

Prezıdent búkil kúsh jigerimizdi jınap, indetpen kúrese berýimiz kerektigin aıtty.

Memleket basshysy koronavırýsqa qarsy qosymsha sharalardy da atap ótti: naqtyraq aıtqanda, elde alǵashqy medıtsınalyq-sanıtarlyq kómek kúsheıtilip, aýrýhanalarda tósek oryndarynyń sany arttyrylady. Qoldanystaǵy zerthanalar testileýge qol jetimdilikti arttyrý úshin qaıta jabdyqtalyp, PTR-testileý úshin 8 mobıldi ortalyq qurylady. Ondaı ortalyqtar aýyl-aımaqtarda da ashylmaq.

Esterińizge sala keteıik, Qazaqstanda koronavırýs ınfektsııasyn juqtyrýdyń alǵashqy oqıǵasy osy jyldyń 13 naýryzynda tirkelgen edi. COVID-19 Germanııadan kelgen eki azamattan anyqtaldy. 26 naýryzda Qazaqstanda koronavırýstan bolǵan birinshi ólim týraly habarlama keldi - 64 jastaǵy áıel qaıtys boldy.

QR Prezıdenti janyndaǵy Qazaqstan strategııalyq zertteýler ınstıtýtynyń bólim basshysy Alýa Joldybalınanyń aıtýynsha buǵan deıin 4 sáýirde Qytaıda, 22 mamyrdan bastap 3 kúnge – AQSh-ta, 27 mamyrdan bastap 10 kúnge – Ispanııada aza tutý kúni jarııalanǵan. Óıtkeni osy memleketterde atalǵan aýrýdan edáýir adam shyǵyny bolǵan edi.

Sonymen birge saıasattanýshy Qazaqstanda 2019 jyldyń 28 jeltoqsanynda jarııalanǵan Jalpyulttyq aza tutý kúninen keıin araǵa jarty jyl ýaqyt salyp, koronovırýs indetinen adamdardyń qaza bolýyna baılanysty qaraly kún jarııalanǵanyn aıtady. Jalpy táýelsizdik alǵannan bastap, ıaǵnı 1991 jyldan beri Qazaqstanda aza tutý kúni toǵyzynshy ret jarııalanyp otyr.

12 shildedegi jaǵdaı boıynsha Qazaqstanda koronavırýs ınfektsııasyn 58 253 adam juqtyrǵan. 33814 adam jazylyp shyǵyp, 375 adam kóz jumǵan.


Joǵary qaraı