Aýa raıy
Astana -8 °S
Almaty -8 °S
valıýta baǵamy
USD 421.58
EUR 496.83
RUB 5.53
CNY 62.20

COVID-19 dáriger kózimen - Sheteldegi qazaqtildi BAQ-qa sholý

2020 jyldyń 29 qarasha 2020 13:52

NUR-SULTAN. QazAqparat - «QazAqparat» halyqaralyq aqparat agenttigi sheteldegi qazaq tilinde taraıtyn aqparat kózderine aptalyq sholýyn usynady.

COVID-19 dáriger kózimen - «Qazaq eli» jýrnaly




Túrkııada shyǵatyn «Qazaq eli» jýrnalynda dáriger-anestezıolog Abdýljelıl Gezmıshtiń álem jurtshylyǵyn alańdatqan koronavırýs indeti jáne odan saqtaný, emdeý joldary týraly ǵylymı-tanymdyq maqalasy jaryq kórgen.

«COVID-19 - janýarlarǵa da, adamdarǵa da áser etetin (zoonıkalyq) koronavırýstyń (RNA) bir túri. Bul vırýstyń mýtatsııaǵa ushyraý ereksheligi bar. Koronavırýstyń jıi kezdesetin belgileri: dene qyzýy - 83-99 %, tábettiń joǵalýy - 40-84 %, sharshaý - 44-70 %, ıis sezý qabiletiniń nasharlaýy - 15-30%, tynys alýdyń qıyndaýy - 31-40%, jótelý - 59- 82%, qaqyryq aralasqan jótel - 28-33%, bulshyq ettiń aýyrýy - 11- 35 %. Koronavırýstyń aýyr túriniń belgileri: oıana almaý (qozǵala almaý nemese tura almaý), shatasý, bet pen erinniń kógerýi, qan aralas qaqyryqtyń bólinýi, kókirek tusynyń aýyrýy, leıkotsıtterdiń deńgeıiniń tómendeýi, búırek jumysynyń buzylýy, dene ystyǵynyń kóterilý belgileri bolady. Jalpy, bul joǵary temperatýra men jótel, aýyr túrimen aýyrǵan jaǵdaılarda tynys alý qıyndyǵyn týdyratyn aýrý», - dep jazady Abdýljelıl Gezmısh.

Maqala avtorynyń jazýynsha, Covid-19 dárejesi men deńgeıi ártúrli. Aýrýdyń belgileri az nemese múldem bolmaýy múmkin. Aýyr jaǵdaılarda aýrýhanada nemese qarqyndy terapııa jaǵdaıynda qajetti em júrgizilýi tıis. Ártúrli jastaǵy balalar COVID-19 ınfektsııasyn juqtyrýy múmkin. Degenmen eresektermen salystyrǵanda sımptomdary jeńil ótedi.

«Elý jasqa deıingi naýqastardyń ólim deńgeıi - 0,5%, jetpis jáne jetpis jastan joǵary jastaǵy naýqastardyń ólim deńgeıi 8%-den artyq. Bul vırýs júkti áıelder úshin qaýipti, dese de ınfektsııa juqtyrǵan analar balalaryn emize berse bolady. Óıtkeni vırýstyń ana sútimen juǵatyndyǵy anyqtalmaǵan.

Rastalǵan jaǵdaılardyń ishinde joǵary qan qysymy, qant dıabeti, júrek aýrýy jáne tynys alý júıesiniń buzylýymen aýyratyn naýqastarda ólim deńgeıi bes ese joǵary. Qytaıda júrgizilgen zertteý nátıjesi boıynsha ınfektsııaǵa baılanysty áıelderdiń ólimi - 1,7%, erlerdiń ólimi - 2,8%.

Qaıtys bolǵan naýqastarǵa júrgizilgen aýtopsııada ókpe men júrekke zaqym kelgendigi anyqtalǵan. Vırýs juqtyrǵan adamdar jótelgen, túshkirgen jáne sóılesken kezde aýyzdan shyqqan tamshyda vırýs bolady. Kózge kórinbeıtin bul tamshylar jıi qoldanylatyn ortada vırýstyń qaldyqtary qalyp qoıýy múmkin. Vırýstyń ómirsheńdigi ártúrli, keı jerlerde 80 saǵatqa deıin tura beredi.

Emdeýge baılanysty zertteýler jalǵasyp jatyr. Vaktsına tabylǵanǵa deıin vırýsqa qarsy jáne basqa da dárilermen (Remdesıvır, hlorohın, favıpıravır, teıkoplanın, azıtromıtsın), eksperımenttik emdeý tsıtokın daýylynyń tsıtokın daýylyn beıtaraptandyrý, passıvti ımmýndaý, tynys alýdy qoldaý arqyly emdeý joldary qoldanylady.

Aýrý belgileri baıqalmaıtyn jáne jalpy jaǵdaıy jaqsy naýqastardy karantın sharttaryna sáıkes úıde qadaǵalaımyz (eki aptadan keıin tekserýden ótkiziledi). Jalpy jaǵdaıy ortasha jáne nashar ásirese tynys alý júıesi buzylǵan naýqastardy aýrýhana bólmesinde jáne qarqyndy terapııa jaǵdaıynda qajetti em júrgizýdemiz. Qazir indettiń basyndaǵy túsiniksiz jaǵdaı men qorqynysh joq, aqyryndap úırenip kelemiz.

Bizdiń basty maqsatymyz - densaýlyq saqtaý júıesine sáıkes tıimdi jumys isteý jáne ekinshi tolqyn bolǵan jaǵdaıda eń nashar stsenarııge daıyn bolý. Reti kelgende COVID-19 pandemııasyna baılanysty ómirmen qosh aıtysqan barlyq densaýlyq saqtaý salasynyń qyzmetkerlerin qurmetpen eske alamyn», - dep jazady avtor maqalasynda.

Fotosýretteri - órnekti, eńbegi - kórnekti azamat - CNR




Qytaılyq kazakcnr.com saıtynda Qytaıda turatyn qandasymyz, belgili fotograf, Qytaıdyń «Sınhýa» aqparat agenttiginiń fototilshisi Dáýit Ráshatulynyń shyǵarmashylyǵy týraly aqparat jaryq kórgen.

Atalǵan BAQ-tyń jazýynsha, Dáýit Ráshatuly «Kórikti Barkól jaılaýym, kórkińe sulý toımadym» dep án bolyp shyrqalǵan, asyl meken Shyńjan ólkesiniń Barkól aýdanynda týǵan.

Bala kúninen ónerge yntaly azamat bolyp eseıgen Dáýit 2015 jyly Barkól aýdany ákimshiliginiń úgit-nasıhat bóliminde jumys istegen. Osynda júrip fotoapparatpen jergilikti óńirdiń kórkti tabıǵatyn týrısterge nasıhattaýǵa atsalysqan.




«Talantty azamattyń ómirdegi jumysy ónerge ulasyp, týǵan jerdiń kórkem kórinisi, tabıǵattyń ásem keskini onyń fotoapparatynyń kózinen jaryq etip túrlenip, tamasha týyndyǵa aınalatyn bolǵan. Osylaısha ónerdiń sara jolyna túsken Dáýittiń kóptegen fotosýretteri jergilikti BAQ-tar men qatar «Sınhýa» aqparat agenttigi, Qytaı aqpart agenttygi, Halyq gazeti, Shyńjan gazeti sekildi qytaı tilindegi iri medııalarda jaryq kóredi.Myńnan astam kórkem fototýyndylardyń avtory Dáýit Ráshatulynyń 50- den astam fotosýretteri túrli kórmelerge qoıylyp, marapattalǵan. Sondaı-aq qazirgi kúni Dáýit «Sınhýa» aqparat agenttiginiń jergilikti jerdegi arnaıy usynys etilgen menshikti fototilshisi bolyp jumys atqaryp júr. Osyndaı talapty azamattyń aldaǵy óner saparyna aq jol tilep, bir bólim fototýyndylaryn oqyrmanǵa usynyp otyrmyz», - dep jazady CNR.










Iran men Qazaqstan koronavırýs vaktsınasy jóninde pikir almasty - Fars




Iran men Qazaqstannyń Densaýlyq saqtaý mınıstrleriniń orynbasarlary koronavırýs vaktsınasyna jyldam qol jetkizý úshin eki eldiń iske asyrǵan sońǵy jumystaryn talqyǵa saldy, dep jazady Fars aqparat agenttigi.

«Iran Densaýlyq saqtaý mınıstriniń arnaıy kómekshisi Mohsen Asadı Ları, Irannyń Qazaqstandaǵy elshisi Madjıd Saber jáne Qazaqstan Densaýlyq saqtaý mınıstriniń birinshi orynbasary Marat Shoranov vıdeo formatta ótken suhbatta koronavırýs vaktsınasyna qol jetkizý salasyndaǵy sońǵy jumystar týraly pikir almasty. Bul suhbatta eki tarap Iran men Qazaqstandaǵy koronavırýs pandemııasynyń sońǵy jaǵdaıyn talqylady jáne vaktsınany elde óndirý nemese ony basqa elderden ımporttaý salasyndaǵy talpynystardy sóz etti» dep jazady Rarstoday.

Túrkııadan 857 maman álemdegi tabysty ǵalymdar tizimine endi - TRT




Túrkııadan 857 ǵalym álemdegi eń tabysty ǵalymdar tizimine endi, dep habarlaıdy Túrkııa Radıo Televızııa portaly.

«Qarateńiz tehnıkalyq ýnıversıtetinen jasalǵan málimdemede Starford ýnıversıtetiniń ǵalymy, professor, doktor Djon P. A. Ioannıdıs pen zertteý toby tarapynan daıyndalǵan túrli saladaǵy, álemdegi 7 mıllıon ǵalym arasynan alǵashqy 2 paıyzǵa kirgen 160 myń kisiden quralǵan tizim «Plos Biology» jýrnalynda jarııalandy. Tizim daıyndalǵan kezde ǵalymdar h-ındeksi, taralym jáne silteme sany sııaqty mańyzdy ólshemderdi eskere otyryp sheshim qabyldaǵan. Tizimge Túrkııadan 2019 jylǵy sanaq boıynsha 857 ǵalym kirdi» dep jazady TRT.

«Farıdanyń eki myń áni» atty ózbek fılmi «Oskar» syılyǵyna usynyldy - ÓzA




AQSh kınoakademııasynyń úzdik kınematografııa marapaty - «Oskar» syılyǵynyń 93-shi márte ótetin baıqaýynda «Eń úzdik sheteldik kórkem fılm» nomınatsııasyna Ózbekstan atynan Elqın Toıchıevtiń «Farıdanyń eki myń áni» atty kórkem fılmi qatysady, dep jazady Ózbekstannyń ÓzA memlekettik aqparat agenttigi.

Atalǵan BAQ-tyń jazýynsha, «Ózbekkıno» ulttyq agenttiginiń tapsyrysy boıynsha «Fox Music Cinema» stýdııasy taspalaǵan týyndy ótken aptada Reseıdegi «Máskeý premerasy» halyqaralyq kınofestıvalinde Gran-prı ıegeri bolǵan.

«Farıdanyń eki myń áni» atty kartınada ótken ǵasyrdyń basynda Túrkistanda bolǵan saıası oqıǵalar baıandalyp, ol qarapaıym bir otbasynyń turmysy arqyly kórsetilgen. Aıta ketsek, ótken jylǵy «Oskar» marapatyna Ózbekstan atynan jas rejısser Ýmıd Ҳamdamovtyń «Issıq non» (Ystyq nan) atty tolyq metrajdy fılmi qatysqan» dep jazady ÓzA.

Qazaqstan-Mońǵol úkimetaralyq komıssııasynyń 8-otyrysy ótti - KAZNEWS




Saýda-ekonomıkalyq, ǵylymı-tehnıkalyq jáne mádenı yntymaqtastyq boıynsha Qazaqstan-Mońǵol úkimetaralyq komıssııasynyń 8-otyrysy onlaın ótti, dep habarlaıdy mońǵolııalyq KAZNEWS aqparat portaly.

«Qazaqstan Respýblıkasynyń Saýda jáne ıntegratsııa mınıstri Baqyt Sultanov pen Mońǵolııanyń Eńbek jáne halyqty áleýmettik qorǵaý mınıstri Aıýýshıın Arıýnzaıaanyń qatysýymen ótken otyrysta ekijaqty saýda-ekonomıkalyq qatynastyń bolashaǵy, sondaı-aq aýyl sharýashylyǵy, ınvestıtsııa, kásipkerlik, kólik, eńbek jáne halyqty áleýmettik qorǵaý, standarttaý jáne metrologııa, mádenıet, sport, týrızm, bilim salalaryndaǵy yntymaqtastyq baǵyttary jáne Qazaqstan men Mońǵolııa arasyndaǵy sharttyq-quqyqtyq bazany odan ári damytý máseleleri talqylandy. Ekijaqty saýda-ekonomıkalyq qatynastardy damytý jáne eksporttyq áleýetti arttyrý maqsatynda taraptar kórmeler, dóńgelek ústelder men jármeńkeler ótkizip turý jóninde ýaǵdalastyqqa qol jetkizdi.

Taraptar aýyl sharýashylyǵy salasyndaǵy qazaqstandyq-mońǵol yntymaqtastyqty tereńdetý, atap aıtqanda eki eldiń ǵylymı-zertteý uıymdarynyń ózara árekettestiginiń mańyzdylyǵyn atap ótti.

Sonymen qatar, týrızm jáne mádenıet máselelerin kótere otyryp, osy salalardaǵy ekijaqty perspektıvaly yntymaqtastyq boıynsha oı bólisti. Bul rette, COVID-19 pandemııasyna baılanysty epıdemıologııalyq ahýal turaqtalǵannan keıin «Nur-Sultan – Ulanbatyr» jáne «Almaty – Ulanbatyr» tikeleı áýe reısterin, sondaı-aq «Baıan-Ólgeı – Almaty – Baıan-Ólgeı» halyqaralyq avtobýs qatynasyn qalpyna keltirýdi, ózara mádenı-gýmanıtarlyq is-sharalar ótkizýdi talqylady.

Kezdesý qorytyndysy boıynsha Saýda-ekonomıkalyq, ǵylymı-tehnıkalyq jáne mádenı yntymaqtastyq jónindegi ekijaqty úkimetaralyq komıssııanyń hattamasyna qol qoıyldy. Úkimetaralyq komıssııanyń kelesi otyrysy 2022 jyly Ulanbatyrda ótkiziledi», - dep jazady KAZNEWS portaly.


Avtor Baqytjol Kákesh
Basty sózder: BAQ, Qandastar,
Joǵary qaraı