Aýa raıy
Astana 6 °S
Almaty 0 °S
valıýta baǵamy
USD 421.58
EUR 496.83
RUB 5.53
CNY 62.20

BUU Jarǵysyndaǵy murat-maqsattar kádege aspaıdy degen pikirmen múlde kelispeımin - Qasym-Jomart Toqaev

2020 jyldyń 21 qyrkúıek 2020 22:25

NUR-SULTAN. QazAqparat - Qazaqstan BUU-nyń mıssııasy men Jarǵysyn berik ustanady. Bul týraly BUU Bas Assambleıasynyń onlaın formatta ótken 75-sessııasynda Qazaqstan Prezıdenti Qasym-Jomart Toqaev aıtty, dep habarlaıdy QazAqparat tilshisi.

«COVID-19 indetin aýyzdyqtaý asa qıyn bolyp otyr. Álemde jappaı qarýlaný úderisi qaıtadan beleń alyp keledi. Strategııalyq damý maqsattaryn júzege asyrý isi turalap qaldy. BUU Jarǵysynda bekitilgen murat-maqsattar budan bylaı kádege aspaıdy degen pikir taraýda. Men óz elimniń Prezıdenti jáne BUU-nyń burynǵy joǵary laýazymdy tulǵasy retinde bul kózqaraspen múlde kelispeımin. Buǵan qaramastan, biz úmit otyn óshirmeı, qaıta ony laýlatýymyz kerek; ortaq murat-maqsattan bas tartpaı, oǵan qol jetkizý úshin kúsh-jigerimizge tyń serpin berýimiz qajet; anarhııaǵa jol bermeı, halyqaralyq quqyqqa negizdelgen qoǵamdastyq qurýdy jalǵastyrýǵa tıispiz», - dedi Memleket basshysy.

Qazaqstan Prezıdentiniń atap ótýinshe, bul – óte kúrdeli mindetter.

«Aldaǵy onjyldyq 2030 jylǵa deıingi ornyqty damýdyń Kún tártibinde turǵan mindetterin júzege asyrý jáne qazirgi zamanǵy daǵdarystardy eńserýdiń tıimdi jolyn tabý úshin sheshýshi kezeń bolady. Bul aýqymdy maqsat ortaq kúsh-jigerdi jáne jaýapkershilikti talap etedi. Biz Bas hatshy Antonıý Gýterrıshtiń tabandy kóshbasshylyq qyzmetine rızashylyq bildiremiz. Sondaı-aq, onyń Birikken Ulttar Uıymyndaǵy tıimdilikti, ashyqtyq pen aıqyndyqty arttyrý jónindegi qazirgi jumysyna qoldaý kórsetemiz»,- dedi Qasym-Jomart Toqaev.

Memleket basshysy Qazaqstan BUU-nyń mıssııasy men Jarǵysyn berik ustanatyndyǵyn basa aıtty.

«Sonymen qatar, elimiz turaqty, ádiletti jáne órkendegen álem qurý jolyndaǵy ortaq mindetti júzege asyrýǵa atsalysady. Birikken Ulttar Uıymy aýqymdy ári birden-bir ámbebap halyqaralyq uıym retinde shyn máninde balamasyz bolyp qala beretinine senimdimin», - dedi Qazaqstan Prezıdenti.

Eske salaıyq, búgin Nıý-Iorkte BUU Bas Assambleıasynyń mereıtoılyq 75-sessııasy ótti. Onda Q.Toqaev shara qatysýshylaryna beıneúndeý joldady.


Joǵary qaraı