Aýa raıy
Astana +7 °S
Almaty +14 °S
valıýta baǵamy
USD 421.58
EUR 496.83
RUB 5.53
CNY 62.20

BUU-nyń Aýǵanstanǵa járdem kórsetetin uıymdary Almatyǵa ýaqytsha ornalastyrylady

2021 jyldyń 18 tamyz 2021 23:27

NUR-SULTAN. QazAqparat - Birikken Ulttar Uıymynyń Aýǵanstanǵa járdem kórsetý jónindegi mıssııasy (UNAMA) men AIR-da akkredıttelgen BUU-nyń basqa da agenttikteri Almaty qalasynda ýaqytsha ornalastyrylady. Bul týraly QazAqparat SІM silteme jasap habarlaıdy.

Aýǵanstandaǵy ishki saıası ahýaldyń shıelenisýine baılanysty Birikken Ulttar Uıymy (BUU) óziniń Aýǵanstanǵa járdem kórsetý jónindegi mıssııasyn (UNAMA) jáne AIR-da akkredıttelgen BUU-nyń basqa da agenttikterin Almaty qalasyna ýaqytsha ornalastyrý týraly Qazaqstanǵa ótinish bildirdi.

Qazaqstan men BUU-nyń jan-jaqty ózara is-qımyly rýhy sheńberinde jáne osy uıymnyń tolyq quqyqty múshesi retindegi mindettemeleri aıasynda Prezıdent Qasym-Jomart Toqaev BUU ótinishin qoldaý týraly sheshim qabyldady.

Búgin, 18 tamyzda UNAMA qyzmetkerleri bar alǵashqy bort Almaty áýejaıyna qondy.

Kelgen qyzmetkerler halyqaralyq dıplomattar, BUU pasporttary men ımmýnıtetteriniń ıegerleri bolyp tabylady.

Almatyda UNAMA jáne basqa da BUU agenttikteriniń keńselerin ornalastyrý jáne olardyń odan ári qyzmet etýi ýaqytsha, ıaǵnı Aýǵanstandaǵy jaǵdaı turaqtalǵanǵa deıin, shamamen jarty jylǵa sozylady dep kútilýde.

Qyzmetkerlerdiń turýy, keńse men úı-jaılaryn jalǵa alýy jáne t.b. barlyq shyǵystary tolyǵymen BUU-nyń bıýdjetinen qarjylandyrylady.


Joǵary qaraı