Aýa raıy
Astana -6 °S
Almaty 1 °S
valıýta baǵamy
USD 421.58
EUR 496.83
RUB 5.53
CNY 62.20

BUU: Qazaqstan úkimettiń ashyq derekteri, onlaın-qyzmetti damytý ındeksinde TMD-da alǵa shyqty

2020 jyldyń 27 qazan 2020 16:22

NUR-SULTAN. QazAqparat – Qazaqstannyń ýákiletti organdary jetekshileri Izraıl men Estonııanyń halyqaralyq sarapshylary jáne BUU-nyń jetekshi mamandarymen birlesip, elektrondyq úkimetti damytýdaǵy zamanaýı ınnovatsııalyq sheshimderdi talqylady. Halyqaralyq konferentsııaǵa Eýropa, Azııa jáne Amerıkanyń 20 elinen memlekettik organdar men elektrondyq úkimetti damytý salasyndaǵy jáne halyqaralyq uıymdardyń, sondaı-aq ýnıversıtetterdiń 100-den astam ókilderi qatysty, dep habarlaıdy QazAqparat.

QR Tsıfrlyq damý, ınnovatsııalar jáne aeroǵarysh ónerkásibi mınıstri Baǵdat Mýsın konferentsııany asha otyryp: «Pandemııa memlekettik jáne áleýmettik qyzmetterdi usynýdyń dástúrli tásilderiniń álsiz jaqtaryn aıqyndap qana qoımaı, kóptegen syn-qaterlerge jaýap berýde tsıfrlyq tehnologııalar mańyzdylyǵyn kórsetti» - dep atap ótti. «BUU zertteý nátıjeleri tsıfrlyq transformatsııa jolynda memleketter aıtarlyqtaı ilgerilýge qol jetkizgenin jáne alǵa qadam jasaǵanyn kórsetedi. Covid-19 pandemııasy jahandyq órshýi aýqymynda memleketter arasyndaǵy ózara tıimdi árekettesý erekshe mánge ıe» - dedi.

Astana memlekettik qyzmet haby Basqarýshy komıteti tóraǵasy Álıhan Baımenov: «Covid-19 pandemııasy senimniń áleýmettik qundylyq qana emes, kez kelgen strategııany, onyń ishinde elektrondyq úkimet strategııasyn iske asyrǵa aýadaı qajet tıimdi ákimshilik kapıtal retindegi mańyzdylyǵyn kórsetti», - dep atap ótti. «Sonymen birge, jańa tehnologııalardy qoldanýda kez kelgen asyra silteýshilikke jol berilmeı, sheshim qabyldaýda ashyqtyq jáne jarııalylyq qatar júrýi kerek. Tájirıbe almasý zamanaýı tehnologııalardy qoldanýǵa da, jańa jaǵdaıda azamattardyń quqyqtary men bostandyqtaryn qorǵaýǵa da qatysty bolýy asa mańyzdy», – dedi.

Al BUU Ekonomıkalyq jáne áleýmettik máseleler jónindegi departamenti (UN DESA) Elektrondy úkimet basqarma jetekshisi Vınchentso Akýaronyń aıtýynsha, memlekettik sektordaǵy tsıfrlyq transformatsııany jedeldetýge degen suranys sońǵy aılarda kúrt ósken. Onyń sózine qaraǵanda, pandemııa úkimetter men qoǵamdardy daǵdarysqa qysqa merzimde jaýap berý, orta merzimde onyń saldaryn joıý, sondaı-aq uzaq merzimde strategııalyq sheshimder men quraldardy ázirleý úshin tsıfrlyq tehnologııalarǵa júginýge májbúr etti. «Bizge osy serpilisti ári qaraı kúsheıtip, tsıfrly progressti odan saıyn ilgeriletip, tsıfrlyq alshaqtyqty eńserý qajettigin esten shyǵarmaı, eldiń ishinde de, memleketter arasynda da eshkimdi nazardan tys qaldyrmaýymyz kerek» - dedi Akýaro.

UN DESA sarapshysy Arpıne Korekıan óz baıandamasynda BUU-nyń 2020-shy jyl boıynsha elektrondyq úkimet damý deńgeıine qatysty zertteýdiń sheshýshi nátıjeleri men trendterin tanystyrdy. Soǵan sáıkes, BUU-ǵa múshe 193 memleket arasynda 126-ǵa jýyq memlekette elektrondyq úkimettiń damý deńgeıi joǵary jáne óte joǵary dep anyqtalǵan, Danııa, Ońtústik Koreıa jáne Estonııa kósh bastap tur. TMD elderi arasynda Qazaqstan úkimettiń ashyq derekteri, onlaın-qyzmetter damý deńgeıi ındeksi jáne teńizge shyǵa almaıtyn elder arasyndaǵy ındeks boıynsha aldyńǵy orynǵa shyqqan.

Izraıl Ulttyq tsıfrlyq mınıstrligi Memlekettik AKT basqarmasy Bas atqarýshy dırektory m.a. Shahar Braha, BUU Azııa men Tynyq muhıty óńirine arnalǵan Ekonomıkalyq jáne áleýmettik komıssııasy AKT jáne apattar qaýpin azaıtý jónindegi departamenti dırektory Tıtsıana Bonapache, Estonııa Elektrondyq basqarý akademııasy Atqarýshy dırektory jáne Basqarma tóraǵasy Hannes Astok COVID-19 pandemııasy kezinde memlekettik qyzmetterdi tıimdi usyný boıynsha ozyq tájirıbelerimen, sondaı-aq biregeı ınnovatsııalyq sheshimderimen bólisti.

Aıta keteıik, «BUU-nyń elektrondyq úkimet jónindegi zertteýi aıasyndaǵy óńir elderinde elektrondyq úkimettiń damýyndaǵy jetistikter men syn-tegeýrinder» atty onlaın-konferentsııany Astana memlekettik qyzmet haby, QR Tsıfrlyq damý, ınnovatsııalar jáne aeroǵarysh ónerkásibi mınıstrligi, BUU Ekonomıkalyq jáne áleýmettik máseleler jónindegi departamenti, «Zerde» holdıngi birlesip uıymdastyrdy.

Konferentsııa barysynda qatysýshylar ózara árekettesý keleshegi jáne osy másele boıynsha jahandyq jáne óńirlik yntymaqtastyqty nyǵaıtý qajettiligin talqylady.


Joǵary qaraı