Aýa raıy
Astana -8 °S
Almaty -9 °S
valıýta baǵamy
USD 421.58
EUR 496.83
RUB 5.53
CNY 62.20

BQO-nyń 3 aýdanynda aerodrom salynbaq

2020 jyldyń 2 jeltoqsan 2020 14:22

ORAL. QazAqparat – Batys Qazaqstan oblysynyń úsh aýdanynda aerodrom salý kózdelýde, dep habarlaıdy QazAqparat tilshisi.

BQO jolaýshylar kóligi jáne avtomobıl joldary basqarmasy basshysynyń orynbasary Qazbek Meńeevtiń óńirlik kommýnıkatsııalar qyzmeti alańynda ótken brıfıngide málim etkenindeı, Bókeı ordasy, Jánibek jáne Qaztalov aýdany ortalyqtarynda úsh aerodrom salý úshin tehnıkalyq-ekonomıkalyq negizdeme ázirlengen.

Qazirgi tańda tehnıkalyq-ekonomıkalyq negizdeme memlekettik saraptamadan ótýde.

Onyń sózine qaraǵanda, shalǵaı aýdan ortalyqtarynda áýejaı salynsa, bul sol aýdandardyń damýyna oń áser etedi, ishki týrızmdi damytýǵa múmkindik beredi. Eń bastysy, Oral men atalǵan aýdandar arasynda úzdiksiz áýe qatynasy ornaıdy.

Kúni búgin Oraldaǵy áýejaı arqyly Nur-Sultan, Almaty, Atyraý, Aqtaý jáne Frankfýrt qalalaryna ushaqtar qatynaıdy.

«Oral» ÁKK» UK» AQ «Oral» halyqaralyq áýejaıy» JShS-men birlesip, Oral qalasynyń áýejaıyn qaıta jańartý jobasyn júzege asyrýda. Bul jumystar «QPO b.v.» kompanııasynyń áleýmettik-ınvestıtsııalyq jobalary aıasynda qarjylandyrylýda. Bas merdiger – «KazConstructionGroup» JShS.

Qaıta jańartý barysynda termınal aýmaǵy 4 myńnan 7 myń sharshy metrge deıin ulǵaıtylmaqshy. Turaqtar uıymdastyrylyp, aýmaq mańy abattandyrylady. Sondaı-aq aerovokzal termınalynyń tehnologııalyq qural-jabdyqtary 1,2 mlrd teńgege jańartylyp, halyqaralyq standartqa, shekara jáne kedendik baqylaý talaptaryna sáıkestendiriledi. Qaıta jańartý quny shamamen 2 mlrd teńgeni quraıdy.

«Qazirgi ýaqytta ǵımarat tolyqtaı buzyldy. Jobaǵa túzetýler engizildi. Onyń jobalaýshysy – «Kýlman» JShS. Ǵımaratqa qaıtadan tehnıkalyq tekserýler júrgizilip, jer teliminiń topografııalyq túsirilimi jasaldy. Ǵımaratty jobalaý kelisilip, eskızdik joba da daıyndaldy. Eski ǵımarattyń aýmaǵy 3850 sharshy metr bolsa, qaıta jańǵyrtýdan keıin 7 myńǵa jetpekshi. Áýejaı jylyna 267 myń jolaýshyny qabyldaı alatyn bolady. Qaıta jańartý jumystaryn 2021 jyly aıaqtaý josparlanyp otyr», dedi Q.Meńeev.


Joǵary qaraı