Aýa raıy
Astana +7 °S
Almaty +14 °S
valıýta baǵamy
USD 421.58
EUR 496.83
RUB 5.53
CNY 62.20

BQO-da jaǵdaıy aýyr bosanǵan áıel tikushaqpen Oralǵa jetkizildi

2021 jyldyń 21 qazan 2021 20:11

ORAL. QazAqparat - Batys Qazaqstan oblysynyń Aqsaı qalasynda jaǵdaıy aýyr bosanǵan áıeldi tikushaqpen Oral qalasyna jetkizildi, dep habarlaıdy QazAqparat «Qazavıaqutqarý» AQ baspasóz qyzmetine silteme jasap.

«20 qazanda QR TJM «Qazavıaqutqarý» AQ óndiristik-dıspetcherlik qyzmetine Batys Qazaqstan oblysynyń Aqsaı qalasynda 1984 jylǵy áıeldi shuǵyl tasymaldaý qajettigi týraly Ulttyq shuǵyl medıtsınany úılestirý ortalyǵynan jedel ótinim kelip tústi. Dárigerler bosanǵannan keıingi asqynýdy boldyrmaý úshin áıeldi tikushaqpen tasymaldaý jóninde sheshim qabyldaǵan», delingen habarlamada.

Oral qalasyndaǵy «Qazavıaqutqarýdyń» áýe kemesi ornalasqan jerden dereý Eurocopter EC-145 tikushaǵy ushyp shyqty. Bortta áýe kemesiniń komandıri Ashat Qudabaev jáne ekinshi ushqysh Nıkolaı Sorokoletov sekildi tájirıbeli ushqyshtar bolǵan.

«Ushqyshtar áýe kemesin qondyrý úshin qaýipsiz oryndy anyqtady, Oral qalasynan Aqsaı qalasyna deıin qysqa merzimde ushyp jetti. Onda Shuǵyl medıtsınany úılestirý ortalyǵynyń akýsher-gınekologi jáne reanımatologi bar jedel járdem brıgadasy kútip turdy. Áıeldi 45 mınýt ishinde Oral qalasynyń áýejaıyna tasymaldap, sol jerden ony aýrýhanaǵa medıtsına qyzmetkerleri jetkizdi. Ushý belgilengen marshrýtqa sáıkes jáne sátti ótti», delingen habarlamada.

Aıta keterligi, bıylǵy jyldyń 9 aıynda «Qazavıaqutqarý» AQ áýe kemelerimen shuǵyl medıtsınalyq evakýatsııalaý jelisi boıynsha 629 ushý oryndalyp, ushý saǵaty 1 597 saǵat 49 mınýt boldy. Bul rette 607 naýqas tasymaldanyp, oqıǵa ornynda 43 konsýltatsııa jáne UShMÚO qyzmetkerlerimen 24 operatsııa ótkizildi.


Joǵary qaraı